ރ. މަޑުއްވަރީގައި ކުރިއަށްދާ ބުލޫޕްރިންޓް ހަބް ފުޓްސަލް ފިއެސްޓާގައި ސްޕާޓަންސް ކުޅުނު ދެވަނަ މެޗުވެސް ކާމިޔާބުކޮށްފިއެވެ.

ސްޕާޓަންސް ދެވަނަ މެޗު ކާމިޔާބުކުރީ ޓީމް ވާލުއާ ވާދަކޮށް 5-1ންނެވެ. ސްޕާޓަންސްގެ އަހުމަދު ސަނާހުއާއި ރިލްވާން ނައީމް, ކޮންމެ ކުޅުންތެރިއަކު މެޗުގައި ދެ ލަނޑު ޖެހިއެވެ. އަނެއް ލަނޑުޖެހީ ހުސެއިން ޝަރީފެވެ. ޓީމް ވާލުގެ ހަމައެކަނި ލަނޑުޖެހީ އަހުމަދު ނާހީއެވެ. މެޗުގެ މޮޅު ކުޅުންތެރިއަކީ ރިލްވާން ނައީމެވެ.

މުބާރާތުގައި އެފްސީ ވަން ރައުންޑްގެ މައްޗަށް ނޮދާންސްވެސް ވަނީ ކުރި ހޯދާފައެވެ. ނޮދާންސް މެޗު ކާމިޔާބުކުރީ 7-3ންނެވެ. މެޗުގައި ނޮދާންސްގެ އިސްމާއީލް ރިފްހާންއާއި އާދަމް މުޒުހިރު, ކޮންމެ ކުޅުންތެރިއަކު ދެ ގޯލް ޖެހިއެވެ. އެޓީމަށް ދެން ލަނޑު ޖަހައިދިނީ މޫސާ ނާޖިހުއާއި ހަސަން ރިޒާއާއި ހަސަން ސާމިރުއެވެ. އެފްސީ ވަން ރައުންޑްގެ ތިން ލަނޑުގެ ތެރެއިން ދެ ލަނޑު ޖެހީ މުހައްމަދު މައިލާން އިބްރާހީމްއެވެ. އަނެއް ލަނޑު ޖެހީ އަބްދުﷲ ރިމާހުއެވެ. މެޗުގެ މޮޅު ކުޅުންތެރިއަކީ ނޮދާންސްގެ މުހައްމަދު މައީސް ޔޫސުފްއެވެ.

ބީބީ ނިއުޖެނެރޭޝަންގެ މައްޗަށް އެފްސީ ހަސް ވަނީ ކުރި ހޯދާފައެވެ. އެޓީމް ކުރި ހޯދީ 6-2ންނެވެ. މެޗުގައި ހަސް އެފްސީގެ މުހައްމަދު އައްޒާމް ހަތަރު ލަނޑު ޖެހިއެވެ. އެޓީމްގެ އަނެއް ދެ ލަނޑު ޖެހީ އިބްރާހީމް އަލީމްއާއި އިބްރާހީމް ތަސްލީމްއެވެ. މެޗުގެ މޮޅު ކުޅުންތެރިއަކީ އައްޒާމްއެވެ. ބީބީ ނިއުޖެނެރޭޝަންގެ ދެ ލަނޑު ޖެހީ އަލީ ޒާހިރުއާއި އިބްރާހީމް މިދުހަތުއެވެ. ބީބީ ނިއުޖެނެރޭޝަން ވަނީ ކުޅުނު ދެ މެޗުންވެސް ބަލިވެފައެވެ.