ރ. މަޑުއްވަރީގައި ކުރިއަށްދާ އަގުބޮޑު ފުޓްސަލް މުބާރާތް "ބުލޫޕްރިންޓް ހަބް ފުޓްސަލް ފިއެސްޓާ"ގައި ސްޕާޓަންސްއާއި އެފްސީ ވަން ރައުންޑް ފެށުން ރަނގަޅުކޮށްފިއެވެ. ދެޓީމްވެސް ވަނީ މުބާރާތުގައި ކުޅުނު ފުރަތަމަ މެޗު ކާމިޔާބުކޮށްފައެވެ.
އެފްސީ ވަން ރައުންޑް މެޗު ކާމިޔާބުކުރީ ބަދަވިއަންސްއާ ވާދަކޮށް 3-1ން މެޗު ކާމިޔާބުކޮށްގެންނެވެ. އެފްސީ ވަން ރައުންޑްގެ ތިން ލަނޑުގެ ތެރެއިން ދެ ލަނޑު ކާމިޔާބުކޮށްދިނީ މެޗުގެ މޮޅު ކުޅުންތެރިޔާ ހަނޫން މޫސާއެވެ. އަނެއް ލަނޑު ކާމިޔާބުކޮށްދިނީ އަބްދުﷲ ރިމާހުއެވެ. ބަދަވިއަންސްގެ ހަމައެކަނި ލަނޑު ކާމިޔާބުކޮށްދިނީ އަހުމަދު ހަލީމްއެވެ.
ސްޕާޓަންސް މެޗު ކާމިޔާބުކުރީ ކާޅު ސްޕޯރޓްސް ކްލަބާ ވާދަކޮށް 2-1ންނެވެ. މެޗުގައި ސްޕާޓަންސްގެ ދެ ލަނޑު ކާމިޔާބުކޮށްދިނީ އަހުމަދު ސަނާހުއާއި ރިލްވާން ނައީމްއެވެ. ކާޅު ސްޕޯރޓްސް ކްލަބްގެ ހަމައެކަނި ލަނޑު ޖެހީ އަބްދުﷲ ރާޝިދުއެވެ. މެޗުގެ މޮޅު ކުޅުންތެރިއަކީ ސްޕާޓަންސްގެ ހުސެއިން ޝަރީފް (އޮންލީ)އެވެ.
މުބާރާތުގައި ޕެންތާރސް ސްޕޯރޓްސް ކްލަބާއި އެފްސީ ޔުނައިޓެޑް ވާދަކުރި މެޗު ނިމުނީ އެއްވަރުވެގެންނެވެ. މެޗު އެއްވަރުވީ 5-5ންނެވެ. މެޗުގައި ޕެންތާރސް ސްޕޯރޓްސް ކްލަބްގެ ހަސަން ތަސްލީމް ހަތަރު ގޯލް ޖެހިއެވެ. އަދި އެފްސީ ޔުނައިޓެޑްގެ އަލީ ހާފިޒު ތިން ލަނޑު ޖެހިއެވެ. މެޗުގެ މޮޅު ކުޅުންތެރިއަކީ ހަތަރު ގޯލްޖެހި ތަސްލީމްއެވެ.
