ގެއަކަށް ވަދެ ބިރުދައްކައި، ހަމަލާދީ މާރާމާރީ ހިންގި ސަމީންގެ ބަންދުގެ މުއްދަތު ޖަހައިފި
ނުރައްކާތެރި ހަތިޔާރު ބޭނުންކޮށްގެން ހަމަލާދީ މާރާމާރީ ހިންގުމަށްފަހު އެ އެޕާޓްމަންޓްގައި ހުރި މުދަލަށް ގެއްލުން ދީފައިވޭ
މަރާމާރީ ހިންގި މައްސަލައިގައި ހައްޔަރުކުރި ސަމީން
މާލޭގެ ގެއެއްގެ އެޕާޓްމަންޓަކަށް ވަދެ ތޫނު ހަތިޔާރު ބޭނުންކޮށްގެން ބިރުދައްކައި، ހަމަލާދީ މާރާމާރީ ހިންގި މައްސަލައަކާ ގުޅިގެން ހައްޔަރުކުރި ސަމީންގެ ބަންދަށް 30 ދުވަސް ޖަހައިފިއެވެ.
މިކަމާއި ގުޅިގެން ފުލުހުން ބުނެފައިވަނީ ރ. މަޑުއްވަރީ / ދެތަނޑިމާގެ، 34 އަހަރުގެ އިބްރާހީމް ސަމީންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 30 ދުވަހުގެ މުއްދަތެއް ދީފައިވާ ކަމަށެވެ.
ފުލުހުން ވަނީ އޭނާގެ ފޮޓޯއާއެކު ހޯދުމަށް އިއުލާންވެސް ކޮށްފައެވެ. ނަމަވެސް އަންގާރަ ދުވަހު އޭނާ އަމިއްލައަށް ފުލުހަށް ހާޒިރުވުމުން ފުލުހުން ވަނީ އޭނާ ހައްޔަރުކޮށްފައެވެ. އޭނާ ހޯދަމުން ދިޔައީ ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުން ތަހުގީގުކުރަމުންދާ މައްސަލައަކާއި ގުޅިގެން ކަމަށެވެ.
ފުލުހުން ބުނީ އިބްރާހީމް ސަމީން ހޯދަމުންދިޔައީ މެއި 2 ވަނަ ދުވަހުގެ ވަގުތެއްގައި މާލޭގެ ގެއެއްގެ އެޕާޓްމަންޓަކަށް ގްރޫޕެއްގެ ބަޔަކު ވަދެ އެތަނުގައި ދިރިއުޅެމުންދާ މީހަކަށް ތޫނު އެއްޗަކުން ބިރުދެއްކި މައްސަލައިގައި ކަމަށެވެ.
އަދި ނުރައްކާތެރި ހަތިޔާރު ބޭނުންކޮށްގެން ހަމަލާދީ މާރާމާރީ ހިންގުމަށްފަހު އެ އެޕާޓްމަންޓްގައި ހުރި މުދަލަށް ގެއްލުން ދީފައިވާ ކަމަށެވެ.
މި މައްސަލަ ފުލުހުން އަންނަނީ ތަހުގީގުކުރަމުންނެވެ.
