އެހެން އަހަރުތަކާ އަޅާބަލާއިރު މިސްކިތްތަކުގެ މަރާމާތަށް ކުރެވޭ ހޭދަ މިއަހަރު ބޮޑުކަމަށް އިސްލާމިކް މިނިސްޓްރީގެ ޕާމަނަންޓް ސެކްރެޓަރީ އަހްމަދު އަދީލް ވިދާޅުވެއްޖެއެވެ.

އާދިއްތަ ދުވަހުގެރޭ ރާއްޖެޓިވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން އަދީލް ވިދާޅުވީ، މިސްކިތްތަކުގެ މަރާމާތު ފަދަ ކަންކަމަށް ކައުންސިލުން އެދުމުން، މިނިސްޓްރީގެ ދަށުން ބަލަހައްޓަމުންދާ މިސްކިތު ފަންޑުން އެކަންކަމަށް އެހީތެރިކަން ފޯރުކޮށްދޭ ކަމަށެވެ. އެގޮޮތުގެ މަތިން ކޮންމެ އަހަރަކުވެސް މިސްކިތްތަކުގެ މަރާމާތަށް ބޮޑު ހޭދައެއް ކުރެވޭކަން އޭނާ ފާހަގަ ކުރެއްވިއެވެ.

އަދީލް ވިދާޅުވީ، މި އަހަރުގެ ރަމަޟާން މަހާ ދިމާކޮށްވެސް ރާއްޖޭގެ މިސްކިތްތަކަށް 5 މިލިއަނެއްހާ ރުފިޔާ މިސްކިތު ފަންޑުން ޚަރަދު ކުރެވިފައިވާ ކަމަށެވެ. ހަމައެއާއެކު، ދައުލަތުގެ ބަޖެޓުންވެސް 15 މިލިއަން ރުފިޔާ މިސްކިތްތަކުގެ މަރާމާތަށް ހޭދަކުރެވުނުކަން އޭނާ ފާހަގަ ކުރެއްވިއެވެ. އަދީލް ވިދާޅުވާ ގޮތުގައި އެއީ ވޭތުވެދިޔަ އަހަރުތަކާ އަޅާބަލާއިރު ބޮޑު ހޭދައެކެވެ.

އޭގެ އިތުރުން، މެންޑޭޓުގައި ނެތްނަމަވެސް ނުވަތަ މިސްކިތްތަކުގެ ބެލެހެއްޓުން ކައުންސިލްތަކާ ޙަވާލުކޮށްފައިވީނަމަވެސް، މިސްކިތްތަކުގެ ހަގީގީ ބެލެނިވެރިއަކީ އިސްލާމިކް މިނިސްޓްރީކަމަށް އޭނާ ވިދާޅުވިއެވެ.

މިހާރުވެސް މިސްކިތްތައް އިމާރަތް ކުރުމާއި، އިމާރަތް ކުރުމުގެ ހުއްދަ ދިނުން ފަދަ ކަންކަމަކީ މިނިސްޓްރީން ކުރާ މަސައްކަތްތަކެވެ. އެހެންނަމަވެސް، މިސްކިތްތައް ފޮޅާ ސާފުކުރުމާއި ބެލެހެއްޓުމަކީ އެތަނެއްގެ ކައުންސިލުގެ ޒިންމާގެ ތެރޭގައި ހިމެނިފައިވާ ކަމެއްކަމަށް އަދީލް ވިދާޅުވިއެވެ.

އަދީލް މިހެން ވިދާޅުވެފައިވާއިރު، ރަމަޟާން މަހަށް ޚާއްސަކޮށްގެން މާލެ ސިޓީގެ މިސްކިތްތައް މަރާމާތު ކުރުމާއި، އާބާތުރަ ފިލުވުމުގެ މަސައްކަތުގެ ދަށުންވެސް 32 މިސްކިތެއް މަރާމާތު ކުރުމުގެ މަސައްކަތް ކުރިއަށް ގެންދިޔައެވެ. އެގޮތުން މާލެ ސަރަޙައްދުގެ 43 މިސްކިތް ބެލެހެއްޓުމަށް ސަރުކާރުން ހަމަޖައްސައިދީފައިވަނީ 1 މިލިއަން ރުފިޔާގެ ބަޖެޓެއް ނަމަވެސް، އެކަމަށް މިނިސްޓްރީންވެސް އެހީތެރިކަން ފޯރުކޮށްދީފައިވެއެވެ.