ސްރީލަންކާއަށް ކުރިމަތިވެފައިވާ އިގުތިސާދީ ކާރިސާއާއެކު އެގައުމަށް 100 މިލިއަން ޑޮލަރުގެ އެހީ ހޯދުމަށް ޗައިނާ ސަރުކާރުން ވާގިވެރިވާ އޭޝިއަން އިންފްރާސްޓްރަކްޗަރ އިންވެސްޓްމެންޓް ބޭންކާއެކު އެގައުމުން މަޝްވަރާކުރަމުން ދާކަމަށް އެގައުމުގެ ފިނޭންސް މިނިސްޓަރު އަލީ ސަބްރީ ވިދާޅުވެއްޖެއެވެ.

މިނިސްޓަރު ސަބްރީ ވަނީ އެބޭންކުން ލަންކާއަށް އިމަޖެންސީ އެހީގެ ގޮތުގައި 100 މިލިއަން ޑޮލަރު ދިނުމަށް ވިސްނަމުންދާ ކަމަށް އާދިއްތަ ދުވަހު ވިދާޅުވެފައެވެ.

އޭޝިއަން އިންފްރާސްޓްރަކްޗަރ އިންވެސްޓްމެންޓް ބޭންކަށް އެންމެ ގިނައިން ފަންޑު ކުރާ ގައުމަކީ ޗައިނާއެވެ.

ރޮއިޓަރސްއިން ރިޕޯޓުކޮށްފައިވާގޮތުގައި ސްރީލަންކާއިން ވަނީ ގައުމުތަކުގެ ސްޓޭޓް ބޭންކުތަކުން ފޮރިން އެކްސްޗޭންޖް ލިކުއިޑިޓީ ސަޕޯޓަށް އެދިފައެވެ.

ޗައިނާ އަކީ ސްރިލަންކާއަށް އެންމެ ގިނަ އަދަދަކަށް ލޯނު ދޫކޮށްފައިވާ ގައުމެވެ. މިހާރުވެސް ސްރީލަންކާއިން ޗައިނާއަށް ދަންކަންޖެހޭ ލޯނުގެ އަދަދު 6.5 ބިލިއަން ޑޮލަރަށް އަރާއިރު އޭގެ ތެރޭގައި އުމްރާނީ ބޮޑެތި މަޝްރޫއުތައް ކަމަށްވާ ހައިވޭ ތަރައްގީކުރުމުގެ މަޝްރޫއާ އެއަރޕޯޓް އަދި ވިޔަފާރި ބަނދަރުގެ މަޝްރޫއުތަކަށް ދޫކޮށްފައިވާ ލޯނުތައް ހިމެނެއެވެ.

ޗައިނާ އިން ވަނީ ސްރިލަންކާއަށް 1.3 ބިލިއަން ޑޮލަރުގެ ސިންޑިކޭޓް ލޯން އަދި 1.5 ބިލިއަން ޑޮލަރުގެ ކަރަންސީ ސްވެޕެއް ފޯރުކޮށްދީފައެވެ. މިހާރު އެދެގައުމުން ދަނީ 1.5 ބިލިއަން ޑޮލަރުގެ ކްރެޑިޓްލައިން އެއްބަސްވުމަކާ ގުޅޭ މަޝްވަރާތައް ކުރަމުންނެވެ. އަދި އިތުރު އެއް ބިލިއަން ޑޮލަރުގެ ސިންޑިކޭޓް ލޯނަކާ ގުޅޭ މަޝްވަރާތައްވެސް ކުރަމުންދާ ކަމަށް ރިޕޯޓުތައް ބުނެއެވެ.

ސްރީލަންކާއިން ވަނީ ޗައިނާއަށް ދައްކަންޖެހޭ ލޯނުތައް ރީސްޓްރަކްޗަރ ކުރުމާ ގުޅޭ މަޝްވަރާތައް މި މަހު ފެށިފައިވާކަމަށް ބުނެފައެވެ.

ކޮވިޑް-19ގެ ސަބަބުން ސްރީލަންކާގެ އިގުތިސާދަށް ހީނުކުރާވަރުގެ ގެއްލުން ލިބިފގައިވާއިރު، ދުނިޔޭގެ ބާޒާރުގައި ތެލުގެ އަގު އުފުލުމާއި ސަރުކާރުން ނަގަމުން އައި ޓެކްސްތައް މަދުކުރުމުގެ ސަބަބުން ދައުލަތުގެ އާމްދަނީ ދަށްވެ މިހާރު އެގައުމުގެ ފޮރިން ރިޒަރވް 50 މިލިއަން ޑޮލަރަށް ދަށްވެފައިވާ ކަމަށް މިދިޔަ ހަފުތާގައި އެގައުމުގެ ފިނޭންސް މިނިސްޓަރު ވަނީ ވިދާޅުވެފައެވެ.

އިމްޕޯޓަށް ހަރަދުކުރާނެ ފައިސާ ނެތި ޒަރޫރީ ކާބޯތަކެއްޗާ ތެޔޮ އަދި ބޭހުގެ ސަޕްލައި މަދުވެ އަގުތައް އުފުލިގެން ދިއުމާއެކު އާންމުންގެ ނުރުހުން ސަރުކާރަށް ވަނީ އަމާޒުވެފައެވެ. އަދި މިއާއެކު ސަރުކާރާ ދެކޮޅަށް މުޒާހަރާކުރަން ފަށާފައިވެއެވެ. މުޒާހަރާ ކުރަން ނިކުމެފައިވާ ފަރާތްތަކުގެ ތެރޭގައި ފާދިރީންނާއި ޑޮކްޓަރުންނާއި ނަރުހުން އަދި ޓީޗަރުން ގެ އިތުރުން ކިޔަވާކުދިން ހިމެނެއެވެ.

ލަންކާގެ އެކި ހިސާބުތަކުގައި ސަރުކާރާދެކޮޅަށް މުޒާހަރާކުރަމުންދާތާ މަސް ދުވަހަށްވުރެ ގިނަ ދުވަސްވެފައިވާއިރު، އެގައުމުގެ ރައީސް ގޮތަބަޔާ ރާޖަޕަކްސަ ވަނީ ހުކުރު ދުވަހު އަނެއްކާވެސް އެގައުމުގައި ކުއްލި ހާލަތު އިއުލާނުކުރައްވާފައެވެ.