ބޭ އޮފް ބެންގާލްގައި އުފެދިފައިވާ ކޮޅިގަނޑު އާދީއްތަ ދުވަހު ތޫފާނާކަށް ބަދަލުވާނެކަމަށް އިންޑިއާގެ މީޓިއަރޮލިޖިކަލް ޑިޕާޓްމަންޓުން ބުނެފިއެވެ.
ބޭ އޮފް ބެންގާލްގެ ދެކުނު އިރުމަތީ ސަރަހައްދުގައި އުފެދިފައިވާ ޑިޕްރެޝަން ތޫފާނަކަށް ބަދަލުވާނެކަން އިންޑިއާގެ މޫސުމާއި ބެހޭ ޑިޕާޓްމަންޓުން ހާމަކޮށްފައިވަނީ ހޮނޮހިރު ދުވަހުއެވެ. އަދި ތޫފާނަކަށް ބަދަލުވުމަށްފަހު މި މަހުގެ 10 ވަނަ ދުވަހާ ހަމައަށް ތޫފާން ދާނީ އުތުރު ހުޅަނގާއި ދިމާލަށް ކަމަށް ވެސް އެ ޑިޕާޓްމަންޓުން ވަނީ ބުނެފައެވެ. އަދި އޭގެ ފަހުން އުތުރު އިރުމައްޗާ ދިމާލަށް ތޫފާން ދަތުރުކުރާނެ ކަމަށް ވަނީ ބުނެފައެވެ.
ތޫފާނާއި ގުޅިގެން އިންޑިއާގެ ކޯސްޓްގާޑުން ތައްޔާރުވެފައިވާ އިރު، އޮޑިއްސާގެ ފަޔަރ ސަރވިސް ވެސް ވަނީ އެލަރޓަށް ގެނެސްފައެވެ. އަދި 175 ޔުނިޓް ތައްޔާރީ ހާލަތަށް ގެނެސްފައިވާ އިރު، ޗުއްޓީގައި ތިބި އޮފިސަރުންގެ ޗުއްޓީ ކުރުކޮށްލުމަށްފަހު ނުކުތުމަށް ވަނީ އަންގާފައެވެ.
ރާއްޖޭގެ މޫސުމާއި ބެހޭ ގައުމީ އިދާރާއިން ބުނީ ބޭ އޮފް ބެންގާލްގައި އުފެދޭ ތޫފާނުގެ ސީދާ އަސަރު ރާއްޖެއަށް ނުކުރާނެ ކަމަށެވެ. ތޫފާނު ދަތުރުކުރާނީ ރާއްޖެއާއި ދުރަށް ކަމަށެވެ. ނަމަވެސް ބުރާސްފަތި ދުވަހާ ހަމައަށް ވިއްސާރަވެ ކަނޑުގަދަވާނެ ކަމަށާއި، ވަކިން ހާއްސަކޮށް މެދުރާއްޖެތެރެއާއި ދެކުނަށް ވައިގަދަވާނެ ކަމަށާއި، ދެކުނަށް ބޯކޮށް ވާރޭވެހޭނެކަމަށް ލަފާ ކުރެވޭ އިރު، ރާއްޖޭގެ އެކި ހިސާބުތަކަށް ވިއްސާރަ ވާނެކަމަށް މެޓް އޮފީހުން ބުނެއެވެ.
މިއަހަރު މެއިގައި އެންމެ އުތުރު އަތޮޅުތަކަށް އާންމުކޮށް ވެހޭވަރަށްވުރެ އިތުރުވާނެ ކަމަށް ބެލެވޭ ކަމަށް މޫސުމާއި ބެހޭ ގައުމީ އިދާރާއިން ބުނެއެވެ. އަދި މެދުރާއްޖެތެރޭގެ ބައެއް ރަށްތަކަށް އާންމުކޮށް ވެހޭވަރަށް ވާރޭވެހޭނެ ކަމަށް ބެލެވޭ އިރު އެހެން ހިސާބުތަކަށް ވާރޭވެހޭ މިންވަރު ކުޑަތަންކޮޅެއް މަދުވާނެކަމަށް ލަފާކުރެވެއެވެ. މިދުވަސްވަރު ފިނިހޫނުމިން އުތުރުއަތޮޅުތަކުގައި އާންމު މިންގަޑުގައި ހުންނާނެކަމަށް ބެލެވޭ ނަމަވެސް އެހެން ހިސާބުތަކުގައި އާންމު މިންގަނޑަށްވުރެ ތަންކޮޅެއް މަތި ވާނެ ކަމަށް ލަފާ ކުރެވޭ ކަމަށް މޫސުމާއި ބެހޭ ގައުމީ އިދާރާއިން ބުނެއެވެ.
