ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް، މުހައްމަދު ނަޝީދަށް ދިން ހަމަލާއަކީ ދުރާލައި ރާވައިގެން ބަޔަކު ހިންގި އަމަލެއްކަމަށް އެމްޑީޕީން ގަބޫލުކުރާހިނދު, މި އަމަލުގެ ފަހަތުގައި ތިބެގެން ޚަރަދުކުރި ބަޔަކު މިއަދާހަމައަށްވެސް ހޯދިފައި ނުވާތީ އެކަމާ އެމްޑީޕީން ކަންބޮޑުވުން ފާޅުކޮށްފިއެވެ.

ރައީސް ނަޝީދަށް ދިން ހަމަލާއަށް އެއް އަހަރު ފުރުމާގުޅިގެން އެމްޑީޕީން ނެރުނު ބަޔާނުގައި ބުނެފައިވަނީ, އެހަމަލާ ދިނުމަށް ބަޔަކު ޚަރަދުކޮށްފައިވާނަމަ ޚަރަދުކުރި މީހުންނާއި، އެހަމަލާގެ ކުރިންނާއި ފަހުން އެކަމަށް ވާގިވެރިވެ ހިތްވަރުދިން މީހުންނާ ހަމައަށް ތަހުގީގު ފުޅާކޮށް، އަވަސް ނަތީޖާއެއް ނެރެވޭނެ ގޮތަށް އިންތިޒާމުތައް ރޭވުމަށް އިލްތިމާސްކުރާކަމަށެވެ.

ރައީސް ނަޝީދަށް ދިން ހަމަލާއިން އެމަނިކުފާނު ސަލާމަތްވުމަކީ ރާއްޖޭގެ ޑިމޮކްރެސީއަށް ލިބުނު ނަސްރެއްކަމަށް އެމްޑީޕީން ބުނެއެވެ. އެހަމަލާއިން ސަލާމަތްވެވަޑައިގެންނެވި ނަމަވެސް، އެކަމުން ލިބިވަޑައިގެންނެވި އަނިޔާތަކާއި، އެހާލަތުން އަރައިގަތުމަށްޓަކައި ރައީސް ނަޝީދު ދެއްކެވި ހިތްވަރުފުޅު ފާހަގަކޮށް، އެޕާޓީން އެމަނިކުފާނާމެދު ފަހުރުވެރިވާކަމަށް ބަޔާނުގައިވެއެވެ.

ބަޔާނުގައި ވަނީ, މެއި 6، 2021ގެ ހަމަލާއަށްފަހު ރައީސް ނަޝީދުގެ ސަލާމަތީ ކަންކަން ވަރުގަދަކުރުމަށް ސަރުކާރުން އަޅާފައިވާ ފިޔަވަޅުތަކަށް ޕާޓީން މަރުހަބާކިޔާ ކަމަށެވެ. އެފިޔަވަޅުތަކާމެދު އިދިކޮޅު ފަރާތްތަކުން ކިޔަމުންދާ ފާޑުކިޔުންތަކަކީ, ކަމުގެ ނުރައްކާތެރިކަމާއި ބިރުވެރިކަން އެނގިތިބެ، ހަމައެކަނި ސިޔާސީ މަގުސަދެއްގައި ރައީސް ނަޝީދުގެ ނަންފުޅު ކިލަނބުކުރުމަށް ކުރަމުން ގެންދާ މަސައްކަތެއް ކަމަށެވެ.

ރައީސް ނަޝީދު އަވަހާރަކޮށްލުމަށް ހަމަލާދިނީ, އެމަނިކުފާނަކީ އިސްލާމްދީނުގެ އަދުއްވެއްކަމުގައި ސިފަކޮށް، އެ ތަކްފީރީ ޖޯޝުން ހިތްވަރު ނެރެ، ހައްދުފަހަނަ އެޅި ދީނީ ހަރުކަށި ފަރާތްތަކުންކަން, މިހާތަނަށް ހިންގި ތަހުގީގުން އެނގެއެވެ. މިއީ ރާއްޖޭގައި ހަރުކަށި ފިކުރު މޫލާފައިވާ މިންވަރު ހާމަކޮށްދޭ ކަމަކަށްވާއިރު، އެ ހަރުކަށި ވިސްނުން ނައްތާލުމަށްޓަކައިވެސް ދައުލަތުގެ އެންމެހާ އިދާރާތަކުން ޚާއްސަ މަސައްކަތްތަކެއް ކުރަންޖެހޭކަން އެ ޕާޓީން ދެކެމެވެ.

މި ހަމަލާއަށް އެއް އަހަރު ފުރުނުއިރު، އެމައްސަލައާއި ގުޅިގެން ކުރަމުން ގެންދާ ތަހުގީގު އަވަހަށް ފުރިހަމަކުރުމަށާއި, މިހާތަނަށް ދައުވާ އުފުލިފައިވާ މައްސަލަތައް އަވަހަށް ނިންމުމަށް ކަމާބެހޭ ފަރާތްތަކަށް އެ ޕާޓީން ގޮވާލައެވެ. އަދި މި ހަމަލާއަކީ އިންޒާރުގެ ރަނގަބީލެއްކަމުގައި ދެކި، އެފަދަ ކަމެއް ތަކުރާރު ނުވުމަށްޓަކައި އަޅަންޖެހޭ އެންމެހައި ފިޔަވަޅުތައް އެޅުމަށް ކަމާބެހޭ އެންމެހައި ފަރާތްތަކަށް އެ ޕާޓީން ގޮވާލައެވެ.

ރައީސް ނަޝީދަށް ދެވުނު ހަމަލާއަކީ ދިވެހިރާއްޖޭގައި ރައީސްކަން ކުރެއްވި ބޭފުޅަކު އަވަހާރަކޮށްލުމަށް އެފަދަ ގޮތަކަށް ދިން ފުރަތަމަ ހަމަލާއެވެ. މިއީ ރާއްޖޭގެ އަމާންކަމާމެދު ސުވާލު އުފެދުނު ހަމަލާއަކަށްވާއިރު، އެހަމަލާގެ ފުރިހަމަ ތަހުގީގަކުން މެނުވީ، އެފަދަ އިތުރު ހަމަލާތައް ނުހުއްޓުވޭނެ ކަމަށްވެސް އެ ޕާޓީން ދެކެއެވެ. އަދި މިފަދަ ހަމަލާއެއް މިގައުމުގައި ތަކުރާރުވުމަކީ އެ ޕާޓީއާއި، އަދި ދިވެހި ރައްޔިތުންގެ ތެރެއިން ގައުމީ ލޯބި ހުރި އެއްވެސް ރައްޔިތަކު އެދޭނެކަމެއް ނޫންކަމަށް އެމްޑީޕީން ބުނެއެވެ.