އިނގިރޭސިވިލާތުގެ އިދިކޮޅު ލީޑަރު ކީއަރ ސްޓަރމަރ އެގައުމުގައި އަޅާފައިވާ ކޮވިޑް-19 އިން ރައްކާތެރިވުމުގެ ފިޔަވަޅުތަކާ ހިލާފުވެފައިވާކަމުގެ ތުހުމަތުތަކާއެކު އެކަމުގެ ތަހުގީގެއް ކުރިއަށްގެންދާނެ ކަަމަށް އެގައުމުގެ ފުލުހުން ބުނެފިއެވެ.
ރޮއިޓަރސްއިން ރިޕޯޓުކޮށްފައިވާގޮތުން 2021 ވަނަ އަހަރު ސްޓަރމަރ ކޮވިޑް-19ގެ ފިޔަވަޅުތަކާ ހިލާފުވެފައިވާ ކަމުގެ ވާހަކަތަކެއް ވަނީ ފެތުރެން ފަށާފައެވެ.
މީގެ ކުރިން އެގައުމުގެ ބޮޑުވަޒީރު ބޮރިސް ޖޯންސަން އާއި ފިނޭންސް މިނިސްޓަރު ރިޝީ ސުނާކް ކޮވިޑްގެ ފިޔަވަޅުތަކާ ހިލާފުވުމުން އެދެބޭފުޅުން މަގާމުން އިސްތިއުފާދެއްވުމަށް ސްޓަރމަރ ވަނީ ގޮވާލާފައެވެ.
މީގެ ކުރިން ސްޓަރމަރ އިންގްލޭންޑްގެ ދެކުނުއިރުމައްޗަށް 2021 ވަނަ އަހަރުގެ އޭޕްރިލް މަހުގެ ތެރޭގައި ކުރި ދަތުރެއްގައި ގިނަ ބަޔަކާއެކު ބިއަރު ބޯން އިން ވީޑިއޯއެއް އާންމުވެ ގިނަ ބައެއްގެ ފާޑުކިއުން އަމާޒުވިއެވެ. ނަމަވެސް އެވީޑިއޯ އާ ގުޅިގެން ފުލުހުން ބުނެފައި ވަނީ ކޮވިޑް-19ގެ އެއްވެސް ފިޔަވަޅަކާ އޭރު ހިލާފުވެފައިވާ ނުވާކަމަށެވެ.
ނަމަވެސް ފުލުހުންނަށް ލިބުނު އައު މައުލޫމާތުތަކަކާ ގުޅިގެން އަނެއްކާވެސް ސްޓަރމަރ ކޮވިޑް-19ގެ ފިޔަވަޅުތަކާ ހިލާފުވެފައިވާ ކަމުގެ ތުހުމަތުތަކެއް ކުރެވޭތީ އެކަން ބަލަމުން ގެންދާކަމަށް ފުލުހުން ވަނީ ބުނެފައެވެ.
މިކަމާ ގުޅިގެން ސްޓަރމަރ ނިސްބަތްވާ ލޭބަރ ޕާޓީން ވަނީ ފުލުހުންގެ ހުރިހާ ސުވާލަކަށް ޖަވާބުދޭން ތައްޔާރު ކަމަށާއި އެއްވެސް ފިޔަވަޅަކާ ސްޓަރމަރ ހިލާފުވެފައި ނުވާނެ ކަމުގެ ޔަގީންކަން އެބައޮތް ކަމަށް ބުނެފައެވެ.
