ސްރީ ލަންކާގައި ކުއްލިހާލަތު އިއުލާނުކޮށްފި

ލަންކާގެ ރައީސް ގޮތަބަޔާ ރާޖަޕަކްސަ އެގައުމުގައި ކުއްލި ހާލަތު އިއުލާނުކުރައްވައިފިއެވެ.

ލަންކާގެ ނޫހެއް ކަމަށްވާ ނިއުސްފަސްޓް ގައި ރިޕޯޓުކޮށްފައިވާގޮތުން ރައީސް ގޮތަބަޔާ، ހުކުރު ދުވަހުގެ 00:00ން ފެށިގެން އެގައުމުގައި ކުއްލި ހާލަތު އިއުލާންކުރަން ނިންމާފައިވާކަމަށް ރައީސްގެ މީޑިއާ ޓީމުން ވަނީ ބުނެފައެވެ.

ރައީސް ގޮތަބަޔާ ކުއްލި ހާލަތު އިއުލާން ކުރައްވާފައި މިވަނީ ހުކުރު ދުވަހު ކެބިނެޓްގެ ހާއްސަ ބައްދަލުވުމެއްވެސް ކުރިއަށް ގެންދެވުމަށްފަހުއެވެ. ކުއްލި ހާލަތު އިއުލާންކުރަން ނިންމި ސަބަބު އަދި ސާފުވެފައެއް ނުވެއެވެ.

ލަންކާގެ ބައެއް ނޫސްތަކުން ވަނީ މިބައްދަލުވުމުގައި ބޮޑުވަޒީރު މަހިންދަ ރާޖަޕަކްސަގެ އަރިހުން މަގާމުން އިސްތިއުފާދެއްވުމަށް ރައީސް އެދިވަޑައިގެންނެވި ކަމަށް ރިޕޯޓުކޮށްފައެވެ. ނަމަވެސް ބޮޑުވަޒީރުގެ މީޑިއާ ސެކެޓްރީ ވަނީ މިކަން ދޮގުކޮށްފައެވެ. ބޮޑުވަރީގެ އަރިހުން މަގާމުން އިސްތިއުފާ ދެއްވުމަށް ރައީސް އެދިވަޑައިގެންފައި ނުވާކަމަށް މީޑިއާ ސެކެޓްރީ ވަނީ ވިދާޅުވެފައިވެއެވެ.

ލަންކާއަށް ދިމާވެފައިވާ އިގުތިސާދީ ކާރިސާގެ ސަބަބުން ރައީސް އަދި ސަރުކާރުގެ އިތުބާރު ނެތްކަމުގެ ވޯޓު ނެގުމަށް އިދިކޮޅުން ދަނީ މަސައްކަތްކުރަމުންނެވެ. އެގޮތުން އިދިކޮޅުން ވަނީ ރައީސް ގެ އިތުބާރު ނެތްކަމުގެ މައްސަލައަކާ ސަރުކާރުގެ އިތުބާރުނެތްކަމުގެ މައްސަލައެއް މަޖިލީހަށް ހުށަހަޅާފައެވެ.

ނަމަވެސް ރައީސް އަދި ބޮޑުވަޒީރުވެސް ވަނީ ތަކުރާރުކޮށް މަގާމުން އިސްތިއުފާނުދެއްވާނެ ކަމަށް ވިދާޅުވެފައެވެ.

ސްރީލަންކާގައި މިދުވަސްކޮޅު ވަރަށް ގިނައަދެއްގެ ބަޔަކު އަންނަނީ ސަރުކާރާ ދެކޮޅަށް މުޒާހަރާތައް ކުރަމުންނެވެ.