އިސްތިއުފާދޭން ރައީސް ގޮތަބަޔާ އަންގަވާފައިނުވާ ކަމަށް ބޮޑިވަޒީރު މަހިންދަ ރާޖަޕަކްސަ ވިދާޅުވެއްޖެ

މަގާމުން އިސްތިއުފާދެއްވަން ރައީސް ގޮތަބަޔާ ރާޖަޕަކްސަ އަންގަވާފައިނުވާ ކަމަށް ބޮޑިވަޒީރު މަހިންދަ ރާޖަޕަކްސަ ވިދާޅުވެއްޖެއެވެ.

ބޮޑުވަޒީރު މަހިންދަ މިހެން ވިދާޅުވެފައި މިވަނީ އެމަނިކުފާނު މަގާމުން އިސްތިއުފާދެއްވަން ރައީސް ގޮތަބަޔާ އެދިވަޑައިގެންފައިވާކަމަކަށް ލަންކާގެ ބައެއް ނޫސްތަކުން ރިޕޯޓުކުރުމާ ގުޅިގެންނެވެ.

އެގޮތުން ލަންކާގެ ޑެއިލީ މެއިލް ނޫހުން ވަނީ ހުކުރު ދަވަހު ކުރިއަށްދިޔަ ހާއްސަ ކެބިނެޓް ބައްދަލުވުމެއްގައި ލަންކާއަށް މިހާރު ދިމާވެފައިވާ މައްސަލަތައް ހައްލުކުރުމަށް ބޮޑުވަޒީރު މަހިންދަ ރާޖަޕަކްސަ މަގާމުން އިސްތިއުފާދެއްވުމަށް ރައީސް އެދިވަޑައިގެންނެވިކަމަށް ރިޕޯޓުކޮށްފައެވެ. އަދި ރައީސްގެ އެދިވަޑައިގެންނެވުމަށް، މަގާމުން އިސްތިއުފާދެއްވުމުން ގައުމަށް ދިމާވެފައިވާ މައްސަލަތައް ހައްލުކުރެވޭނެ މަގު ފަހިވާނަމަ އައު ސަރުކާރެއް އެކުލަވާލަން އެމަނިކުފާނު ތާއީދުކުރައްވާނެ ކަމަށް މަހިންދަ ވިދާޅުވިކަމަށް އެނޫހުން ވަނީ ރިޕޯޓުކޮށްފައެވެ.

ނަމަވެސް ނިއުސްފަސްޓް އިން ރިޕޯޓުކޮށްފައިވާގޮތުން މަހިންދަ ރާޖަޕަކްސަގެ މީޑިއާ ސެކެޓްރީ ވަނީ އެމަނިކުފާނު މަގާމުން އިސްތިއުފާދެއްވުމަށް ރައީސް އެދިވަޑައިގެންފައި ނުވާކަމަށް ވިދާޅުވެފައެވެ.

ލަންކާގެ ރައީސް އާއި ބޮޑުވަޒީރު ވަނީ ތަކުރާރުކޮށް މަގާމުން އިސްތިއުފާ ނުދެއްވާނެ ކަމަށް ވިދާޅުވެފައެވެ. އެހެން ނަމަވެސް އެގައުމުގެ އިދިކޮޅު ޕާޓީތަކުން ދަނީ ރައީސް އަދި ސަރުކާރުގެ އިތުބާރު ނެތްކަމުގެ މައްސަލައެއް މަޖިލީހަށް ހުށަހަޅައި އެކަމުގެ ވޯޓެއް ނެގުމުގެ މަސައްކަތް ކުރަމުންނެވެ.

ޓައިމްސް އޮފް އިންޑިއާއިން ރިޕޯޓުކޮށްފައިވާގޮތުން އެސްޖޭބީން ވަނީ ރައީސް ގޮތަބަޔާއާއި ސަރުކާރުގެ އިތުބާރު ނެތްކުމުގެ މައްސަލަ މަޖިލީހުގެ ރައީސަށް އަންގާރަ ދުވަހު ހުށަހަޅާފައެވެ. އެގޮތުން އެޕާޓީން ދެ މައްސަލައެއް ހުށަހަޅާފައިވާކަމަށްވެއެވެ.

އެއީ ރައީސް ގޮތަބާޔާ ރާޖަޕަކްސަގެ އިތުރުބާރު ނެތްކަމުގެ މައްސަލައާއި ލަންކާގެ މިހާރުގެ މުޅި ސަރުކާރުގެ އިތުބާރު ނެތްކަމުގެ މައްސަލަ ކަަމަށް އެސްޖޭބީން ފާހަގަކުރެއެވެ.

އެސްޖޭބީން ވަނީ ވީހާވެސް އަވަހަށް މިމައްސަލައިގެ ވޯޓުލުން ކުރިއަށް ގެންދަން ބޭނުންވާކަމަށް ބުނެފައެވެ.

އެސްޖޭބީއާއި ޔުނައިޓެޑް ނެޝަނަލްސް ޕާޓީ ގުޅިގެން ރައީސް ގޮތަބަޔާގެ އިތުބާރު ނެތްކަމުގެ މައްސަލަ މަޖިލީހުގައި ކުރިއަށް ގެންދަން ނިންމާފައިވާއިރު، ރައީސް ގޮތަބަޔާ ވަނީ ލަންކާގައި ހުރިހާ ސިޔާސީ ޕާޓީތަކެއް އެކުލެވޭ، ގުޅިފައިވާ ވަގުތީ ސަރުކާރެއް އެކުލަވާލުމަށް އިދިކޮޅަށް ހުށަހަޅުއްވާފައެވެ.

މަޖިލީހަށް ހުށަހަޅާފައިވާ މި ހުށަހެޅުމާއެކު ގާނޫނީ ގޮތުން ރައީސް މަގާމުން ވަކިނުކުރެވުނު ނަމަވެސް މަޖިލީހުގެ ތާއީދު ރައީސަށް ގެއްލިފައިވާކަން ކަށަވަރުވާނެކަމަށް އިދިކޮޅުން ފާހަގަކުރެއެވެ.

އިދިކޮޅުގެ ހުށަހެޅުމަށް ބޭނުންވާ ވަރަށް ވޯޓު ލިބި ސަރުކާރުގެ އިތުބާރު ނެތްކަމަށް ފާސްވެއްޖެނަމަ ބޮޑުވަޒީރު މަހިންދަ ރާޖަޕަކްސައާއި ކެބިނެޓް އިސްތިއުފާ ދޭންޖެހޭނެއެވެ.

ލަންކާގެ އިދިކޮޅު ޕާޓީތަކުން ބުނަމުން އަންނަނީ އެގައުމަށް މިހާރު ދިމާވެފައިވާ މައްސަލަތަކަށް ހައްލު ހޯދޭނީ ރައީސާއި ބޮޑުވަޒީރު މަގާމުން ވަކިކުރެވިގެން ކަމަށެވެ.