ސްރީލަންކާގައި ސަރުކާރާ ދެކޮޅަށް ކުރާ މުޒާހަރާތަކާއެކު ސްކޫލްތަކާ ވިޔަފާރިތައް ބަންދުކޮށްފި

ސްރީލަންކާގައި އެގައުމުގެ ސަރުކާރާ ދެކޮޅަށް ކުރާ މުޒާހަރާތައް ހޫނުވެ ހުކުރު ދުވަހު އެގައުމުގެ އެތައް ހާސް ފިހާރައަކާ ސްކޫލެއް އަދި ވިޔަފާރިއެއް ބަންދު ކުރުމަށްފަހު ޕްރައިވެޓް އަދި ޕަބްލިކް ސެކްޓަރ މަސައްކަތްތެރިން ހަޅުތާލުކުރަން ނުކުމެއްޖެއެވެ.

ހުރިހާ މަސައްކަތްތެރިންވެސް ވަނީ ގައުމުގެ ފައިސާގެ މުއާމަލާތްތަކުގައި އިހުމާލުވެ ގައުމަށް ބޮޑު އިގުތިސާދީ ކާރިސާއެއް ކުރިމަތިކުރުވާފައި ވާތީ ސަރުކާރާ ރައީސްގެ އިސްތިއުފާއަށް ގޮވާލާފައެވެ.

ކޮވިޑް-19 ބަލިމަޑުކަމުގެ ސަބަބުން ލަންކާގެ އިގުތިސާދަށް އައި ލޮޅުމާ އެގައުމުގެ ސަރުކާރުން ނަގަމުންދިޔަ ޓެކްސްތައް މަދުކުރުމުގެ ސަބަބުންނާ ރަޝިއާ ޔޫކްރެއިން ހަނގުރާމައާ ގުޅިގެން ކުރިމަތިވި ގޮންޖެހުންތަކާއެކު މިހާރު ލަންކާގެ ފޮރިން ރިޒަރވްގައި ހުރީ 50 މިލިއަން ޑޮލަރު ކަމަށް އެގައުމުގެ ފިނޭންސް މިނިސްޓަރު ވަނީ ވިދާޅުވެފައެވެ.

ބޭރުފައިސާ ނެތުމުގެ ސަބަބުން އެގައުމަށް އިމްޕޯޓްކުރާ ތެޔޮ، ކާނާގެ ބާވަތްތައް އަދި ބޭހުގެ ބާވައްތަކުގެ ސަޕްލައި ދަށްވެ އަގު ވަނީ ވަރަށް ބޮޑަށް އުފުލިގެން ގޮސްފައެވެ. މިއާއެކު އާންމުންގެ ނުރުހުން ސަރުކާރަށް އަމާޒުވެ އެތައް މިލިއަން ބަޔަކު ވަނީ ސަރުކާރުގެ އިސްތިއުފާއަށް ގޮވާލާ މަގުތަކަށް ނުކުމެ މުޒާހަރާ ކުރަން ފަށާފައެވެ.

އާންމު ހިދުމަތްތައް ފޯރުކޮށްދޭ ފަރާތްތަކާ ފިހާރަތައް ބަންދުކޮށް މީހުން މުޒާހަރާއަށް ނުކުތުމުން އެތައް ބަޔަކު ވަނީ ބަސް އަދި ރޭލުގެ ހިދުމަތްތައް ނުލިބު މަޑުކުރަން ޖެހިފައެވެ. އެގޮތުން ލަންކާގެ ބޮޑެތި ސިޓީ ތަކުގައި އަމިއްލަ ގޮތުން ބަހުގެ ހިދުމަތާ ރޭލުގެ ހިދުމަތްތައް ދޭ ތަންތަން ވަނީ ބަންދުކޮށްފައެވެ. ކޮލޮމްބޯގެ ވެސް މައި ރޭލު ސްޓޭޝަން ބަންދުކޮށްފައިވާއިރު ބަހުގެ ހިދުމަތް ފޯރުކޮށްދެމުން ދިޔައީ ހަމައެކަނީ ސަރުކާރުގެ ހިއްސާ އޮންނަ ބަސް ސްޓޭޝަންތަކުންނެވެ.

ސިއްހީ ހިދުމަތްތެރިންވެސް ވަނީ މިމުޒާހަރާގައި ބައިވެރިވެފައެވެ. ނަމަވެސް އިމަޖެންސީ ހިދުމަތްތައް އެފަރާތްތަކުން ވަނީ ފޯރުކޮށްދީފައެވެ.

މީގެ އިތުރުން މަތީ ތައުލީމު ހާސިލުކުރަމުންދާ އެތައް ސަތޭކަ ކުދިންނެއް ވަނީ ބުރާސްފަތި ދުވަހު މަޖިލިސް ކުރިމަތީގައި އެމީހުން ފެށި މުޒާހަރާ ހުކުރު ދުވަހުވެސް ކުރިއަށް ގެންގޮސްފައެވެ.