ޖޭމްސް ރޮޑްރިގޭސް އާއެކު  އަންނަ ސީޒަނުގައިވެސް ހުންނާނީ  އެއް ކްލަބެއްގައި ކަމަށް އޭނާއާއެކު ރެއާލް މެޑްރިޑަށް ކުޅެމުން އަންނަ މޮރާޓާ ބުނެފިއެވެ.

ބުރާސްފަތި ދުވަހު ކުޅުނު އިންޓްނޭޝަނަލް ފްރެންޑްލީ މެޗެއްގައި ކޮލޮމްބިއާ އާއި ސްޕެއިން އެއްވަރުވި މެޗަށްފަހު ނޫސްވެރިންނާ ވާހަކަ ދައްކަމުން މޮރާޓާ ބުނެފައިވަނީ، ޖޭމްސް ރޮޑްރިގޭސްއަކީ މޮޅު ކުޅުންތެރިއެއް ކަމަށާއި، އަންނަ އަހަރުގައިވެސް ދެމީހުން ތިބޭނީ އެކުގައި އެއް ޓީމެއްގައި ކަމަށެވެ.

އަންނަ ޓްރާންސްފާގައި މޮރާޓާ އަދި ރޮޑްރިގޭސް ވެސް ރެއާލް ދޫކޮށްލާނެކަމުގެ ވާހަކަ ތަކެއް ވަނީ ފެތުރިފައެވެ. އެގޮތުން މޮރާޓާ ހޯދުމަށް އިނގިރޭސި ކުލަބު މެންޗެސްޓާ ސިޓީ އާއި އިޓަލީގެ އޭސީ މިލާނުން ވެސް މަސައްކަތް ކުރަމުން އަންނަ ކަމަށް މޯޑިއާ ރިޕޯޓަތަށް ބުނެއެވެ.

އިތުރަށް ވާހަކަ ދައްކަމުން މޮރާޓާ ބުނެފައިވަނީ، ސްޕެއިނުގައި ކުޅެން ކޮންމެ ކުޅުންތެރިއެއްވެސް ބޭނުން ވާނެ ކަމަށެވެ. ކޮލަމްބިއާއާ  ދެކޮޅަށް އަމިއްލަ ފަސްގަނޑުގައި ކުޅުނު ސްޕެއިނަށް މެޗު 2-2 އިން އެއްވަރުކޮށްލެވުނީ މެޗުގެ ވަރަށް ފަހު ވަގުތު މޮރާޓާ ކާމިޔާބުކޮށްދިން ލަނޑުންނެވެ.

މެޗާ ގުޅޭ ގޮތުން މޮރާޓާ ބުނީ، މެޗުގައި ސްޕެނުގެ ކުޅުންތެރިން ދެއްކި ކުޅުމާމެދު ހިތްހަމަ ޖެހޭ ކަމަށާއި. މެޗުގެ ނަތީޖާ އެއްވަރު ކޮށްލެވުނީވެސް އެންމެ ފަހު ވަގުތާ ޖެހެންދެން ކުޅުންތެރިން ދެއްކި ކުޅުމުގެ ސަބަބުން ކަމަށެވެ.

އެގޮތުން ދެ ގައުމަކީވެސް ގިނަ ފުޓުބޯޅަ ފޭނުން އުޅޭ ގައުމެއް ކަމަށާއި، ދެ ޓީމުގައިވެސް ހުނަރުވެރި ކުޅުންތެރިން ތިބި ކަމަށާއި ދެޓީމަކީވެސް ދާދި ހަމަހަމަ ދެޓީމު ކަމަށް އޭނާ ބުންޏެވެ.