ވަރުބަލިކަމެއްނެތި ރާއްޖެ އިޝްތިހާރުކުރުމުގެ މަސައްކަތް ކުރިއަށް ގެންދަންޖެހޭކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ކޮވިޑް-19އަށްފަހު ރާއްޖޭގެ ފަތުރުވެރިކަމުގެ ރިކަވަރީ ކުރިއަށްދާއިރު ފަތުރުވެރިކަން އިތުރަށް ރަނގަޅުކޮށް ހަރުދަނާކުރުމަށް ކުރަމުންދާ މަސައްކަތްތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަފުޅުދައްކަވަމުން ޓޫރިޒަމް މިނިސްޓަރު ވިދާޅުވީ ކޮވިޑް-19ގެ ހާލަތަށްފަހު އާންމު ހާލަތެއްގައި ގިނަ ޤައުމުތައް އޮތްއިރު ހުރިހާ ގައުމަކުންވެސް މަސައްކަތްކުރަމުންދަނީ އެގައުމަކަށް ފަތުރުވެރިން ޒިޔާރަތްކުރާ މިންވަރު އިތުރުކުރުމަށް ކަމަށެވެ. ވަކިން ޚާއްސަކޮށް މިފަދަ ދަނޑިވަޅެއްގައި އިތުރު ބާރެއް ލައި ވަރުބަލިކަމެއް ނެތި ފަތުރުވެރިކަން އިޝްތިހާރުކުރުމުގެ މަސައްކަތް ކުރިއަށްގެންދަން ޖެހޭކަމަށް މިނިސްޓަރު ވިދާޅުވިއެވެ.
ފަތުރުވެރިކަން އިޝްތިހާރުކުރުމުގެ މަސައްކަތް ހަވާލުކޮށްފައިވާ ކުންފުނީގެ ހައިސިއްޔަތުން މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)އިން ވަރަށް ރަނގަޅު މުހިންމު މަސައްކަތްތަކެއް ކުރަމުންދާކަމަށް މިނިސްޓަރު ވިދާޅުވިއެވެ. މިދިޔަ އަހަރަށްވުރެ މިއަހަރު އަންނަ ފަތުރުވެރިންގެ އަދަދުތައްވެސް ދަނީ ރަނގަޅުވަމުން ކަމަށާއި، މިއީ މާކެޓުކުރަން ކުރާ މަސައްކަތްތަކުގެ ނަތީޖާ ކަމަށް މިނިސްޓަރު ވިދާޅުވިއެވެ.
މާކެޓިން ބައި ހުރިހާ ފަރާތްތަކުންވެސް ކުރިއަށްގެންދޭ. އަޅުގަނޑުމެންވެސް ލިބޭ ކޮންމެ ފުރުސަތެއްގައި ރާއްޖެއަށް އައުން މުހިންމު ކަމުގެ ވާހަކަތައް ދައްކަމުން މިދަނީ. މިކަން އެންމެ ބޮޑަށް ކާމިޔާބުވެގެންދަނީ ރާއްޖޭގައި ހުންނަ މީހަކު މިތަން ހާދަ ޗާލޭ ހާދަ ނަލައޭ ބުނުމުން.ޓޫރިޒަމް މިނިސްޓަރު ޑރ. އަބްދުﷲ މައުސޫމް
ރާއްޖެ މާކެޓުކުރުމަށް މިހާރު ފޮރިން މިނިސްޓްރީން ވަރަށް މުހިންމު ދައުރެއް އަދާކުރާކަމަށް މިނިސްޓަރު މައުސޫމް ވިދާޅުވިއެވެ. އެޤައުމުތަކުގައި ހުންނަ ރާއްޖޭގެ ފޮރިން މިޝަންތަކުގައި ތިބޭ ބޭބޭފުޅުން މިކަމުގައި ވަރަށް ބޮޑު ރޯލެއް އަދާކުރައްވާ ކަމަށާއި، ރާއްޖޭގެ ފޮރިން މިނިސްޓަރު އަދި އދ. ގެ އާންމު މަޖިލީހުގެ ރައީސް އަބްދުﷲ ޝާހިދު އދ. ގެ އާންމު މަޖިލީހުގައި އިންތިޒާމު ކުރެއްވި ތީމެޓިކް ބަހުސްއަކީ މިކަމުގެ ހެއްކެއް ކަމަށް މިނިސްޓަރު މައުސޫމް ވިދާޅުވިއެވެ.
މި ބަހުސްގައި ރާއްޖޭގެ ފަރާތުން ތަޤުރީރުކުރެއްވީ ނައިބު ރައީސް ފައިސަލް ނަސީމްއެވެ. މި ބަހުސްގައި ތަޤުރީރުކުރައްވަމުން ނައިބު ރައީސް ވަނީ މި ސަރުކާރުން ފަތުރުވެރިކަން ކުރިއަރުވަން ގެންގުޅޭ ސިޔާސަތުތައް ފާހަގަކުރައްވާފައެވެ. ކޮވިޑް-19 ބަލިމަޑުކަމުގެ ސަބަބުން ފަތުރުވެރިކަމުގެ ދާއިރާއަށް ކުރި ނޭދެވޭ އަސަރުތައް ބަޔާންކުރައްވަމުން ޤައުމުގެ ޖީ.ޑީ.ޕީ.ގެ 60 އިންސައްތަ ދަށަށް ދިޔައިރު، 4.6 ބިލިއަން އެމެރިކާ ޑޮލަރަށްވުރެ ބޮޑު ގެއްލުމާ ކުރިމަތިލާން ޖެހުނުކަން އެމަނިކުފާނު ފާހަގަކުރެއްވިއެވެ. އަދި ރާއްޖޭގައި ފަތުރުވެރިކަން ޤާއިމުކުރެވިފައިވާ ގޮތަށް އަލިއަޅުވާލައްވަމުން އެއީ އަމިއްލަ ވިޔަފާރިވެރިންނާއި ސަރުކާރާ ގުޅިގެން މަސައްކަތް ކުރުމުގެ ފުރިހަމަ މިސާލެއް ކަމުގައި އެމަނިކުފާނު ސިފަކުރެއްވިއެވެ.
