ސައުދީ އަސްކަރިއްޔާގެ އިސްވެރިން ރިޝްވަތުގެ ގޮތުގައި 9.7 މިލިއަން ޕައުންޑު ހޯދިކަން ހާމަވެއްޖެއެވެ.
މިކަން ހާމަވީ، ސައުދީ އަސްކަރިއްޔާގެ އިސްވެރިންނަށް ރިޝްވަތުގެ ގޮތުގައި ފައިސާ ދޭ ކަމުގެ ތުހުމަތުގައި ދައުވާ އުފުލާފައިވާ އިނގިރޭސިވިލާތުގެ ދެ މީހެއްގެ މައްސަލައިގައި، ސައުތުވާރކްގެ ކްރައުން ކޯޓުގައި ކުރިއަށްގެންދިޔަ އަޑުއެހުމެއްގައެވެ. މިކަމާ ގުޅިގެން ދައުވާ އުފުލާފައިވަނީ، އުމުރުން 65 އަހަރުގެ ޖެފްރީ ކުކް އާއި، ޖޯން މޭސަންގެ މައްޗަށެވެ. މި ދައުވާއަކީ ޖެފްރީގެ ކުންފުނި، އެއަރބަސް ގްރޫޕަށް ސައުދީގެ މިލިޓަރީ ކޮމިއުނިކޭޝަން ހަރުދަނާ ކުރުމުގެ ކޮންޓްރެކްޓް ދިނުމުގައި ކޮރަޕްޝަންގެ އަމަލުތައް ހިންގާފައިވާ ކަމުގެ ތުހުމަތުކުރާ މައްސަލައެކެވެ.
މި ދައުވާއަށް ޖެފްރީ ކުކް ވަނީ އިންކާރުކޮށްފައެވެ.
ޖެފްރީ ކުކް އަކީ އެރަބަސްގެ ސަބްސިޑަރީ ޖީޕީޓީ ސްޕެޝަލް ޕްރޮޖެކްޓް މެނޭޖްމަންޓްގެ މެނޭޖިންގ ޑިރެކްޓަރ އެވެ. އެ ކުންފުންޏަށް ލިބޭ ފައިދާގެ 12.3 އިންސައްތަ ހޭދަކުރަނީ ސައުދީގެ އޮފިޝަލުންނަށް ރިޝްވަތު ދިނުމަށް ކަމަށް ކޯޓުގެ އަޑުއެހުމުގައިވަނީ ފާހަގަކޮށްފައެވެ.
އަޑުއެހުމުގައި ބުނެފައިވަނީ ގަވާއިދުން ރިޝްވަތު ދެމުން އަންނަތާ އެތައް އަހަރެއް ވެފައިވާ ކަމަށެވެ.
ލަންޑަންގައި ހުންނަ ސައުތުވާރކް ކްރައުން ކޯޓުގައި ކުރިއަށްގެންދިޔަ މި އަޑުއެހުމުގައި ބުނެފައިވަނީ، ސައުދީ ޕްރިންސް މުތައިބް ބިން އަބްދުﷲ ހިމެނޭހެން އަސްކަރިއްޔާގެ އިސް ވެރިންނަށް 2007ވަނަ އަހަރުން 2012ވަނަ އަހަރާ ހަމައަށް ރިޝްވަތުގެ ގޮތުގައި 9.7 މިލިއަން ޕައުންޑް ދީފައިވާ ކަމަށެވެ. އަދި މި ފައިސާ ލިބިފައިވަނީ ރަނގަޅަށްކަން ދޭހަވާނެ އެއްވެސް ލިޔެކިޔުމެއް ނެތި ކަމަށެވެ.
މި ކޮންޓްރެކްޓްތައް ހަދާފައިވަނީ އިނގިރޭސިވިލާތާ ސައުދީއަރަބިއްޔާ އާއި ދެމެދު 1970ގެ އަހަރު ތަކުގެ ތެރޭގައި ހަދާފައިވާ ރަސްމީ އެއްބަސްވުންތަކެއްގެ ދަށުން ކަމަށްވާތީ މިކަމުގައި މިނިސްޓްރީ އޮފް ޑިފެންސްގެ އަތެއްވާ ކަމަށްވެސް ވަނީ ތުހުމަތުކޮށްފައެވެ. ފަންޑު ދޫކުރުމުގައި މިނިސްޓްރީ އޮފް ޑިފެންސްގެ ޒިންމާ އޮންނާނެ ކަމަށް ބުނެފައިވެއެވެ. ޖެފްރީ ކުކް ވަނީ މިނިސްޓްރީ އޮފް ޑިފެންސްގައި 30އަހަރަށްވުރެ ދިގު މުއްދަތަކަށް ޚިދުމަތް ކޮށްފައެވެ. އަދި 2006ވަނަ އަހަރުގެ ތެރޭގައިވެސް އަސްކަރީ ބައެއް އެއްބަސްވުންތައް މެނޭޖް ކުރަމުން ދިޔައީ ޖެފްރީ ކުކް ކަމަށް ކޯޓު އަޑުއެހުމުގައިވަނީ ފާހަގަކޮށްފައެވެ.
މި މައްސަލަ އިނގިރޭސިވިލާތުގެ ސީނިއަރ ފްރޯޑް އޮފީހުން ތަހުގީގުކުރަން ފެށީ، ވިސްލްބްލޯވަރއެއް ދިން މައުލޫމަތާކާ ގުޅިގެންނެވެ.
