އެމެރިކާ މާކެޓްގައި ދިވެހިރާއްޖެ އަކީ ދުނިޔޭގެ އެންމެ މަގުބޫލު އެއް މަންޒިލްގެގޮތުގައި އިޝްތިހާރުކުުރުމަށް މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ވިޒިޓް މޯލްޑިވްސް) އިން އެމެރިކާގައި ކުރިއަށްދިޔަ 'އެޑްވެންޗާ އެލެވޭޓް' 2022 ފެއަރގައި ބައިވެރިވެއްޖެއެވެ.

މި ފެއަރ ކުރިއަށް ގެންގޮސްފައިވަނީ މެއި 3 އިން 5 ގެ ނިޔަލަށް އޮރެގަން, އުނައިޓެޑް ސްޓޭޓްސްގައެވެ. މި ފެއަރގައި އެމްއެމްޕީއާރުސީއިން އެމެރިކާ މާކެޓްގައި ދިވެހިރާއްޖޭގެ ރީތި ނަން ދަމަހައްޓާ ވަރުގަދަކުރަން މަސައްކަތްކޮށްފައިވެއެވެ.

މި 3 ދުވަހުގެ ފެއަރއަކީ އެމެރިކާގެ މަޝްހޫރު ޓްރެވެލް ޓްރޭޑް ކޮމިޔުނިޓީ ކަމުގައިވާ އެޑްވެންޗާ ޓްރެވެލް ޓްރޭޑް އެސޯސިއޭޝަން (އޭޓީޓީއޭ) އިން ބާއްވާފައިވާ ފެއަރއެކެވެ. ރާއްޖެ އިޝްތިހާރުކުރުމަށް ގިނަ ފުރުސަތުތަކެއް މި އެޑިޔުކޭޝަނަލް އަދި ނެޓްވޯކިން ކޮންފެރެންސްއިން އެމްއެމްޕީއާރުސީއަށް ލިބިފައިވެއެވެ. އެމެރިކާގެ ޓްރެވެލް ޓްރޭޑްއާ ބައްދަލުކޮށް ފަތުރުވެރިކަމުގެ ދާއިރާގެ ޒަރިއްޔާއިން ރަނގަޅުގޮތެއްގައި ދުނިޔެއަށް ގެނެވޭނެ ބަދަލުތަކާ މެދު މަަޝްވަރާކޮށްފައިވެއެވެ. މި ފެއަރގައި މިއަހަރުގެ ތީމް އަކީ 'ޝައިން' އެވެ. ސަބަބަކީ މި ފެއަރގައި އެޑިޔުކޭޝަނަލް ސެޝަންތަކާއި ކްރިއޭޓިވް ނެޓްވޯކިން ފުރުސަތުތަކުން ފަތުރުވެރިކަމުގެ ދާއިރާއަށް އަލިއަޅުވާލެވިގެން ކުރިއަށްގޮސްފައިވާތީއެވެ.

ރާއްޖެއަކީ ގުދުރަތީގޮތުން ޖަޒީރާ މަންޒިލެއްގެގޮތުގައި އުފެދިފައި އޮތުމުން ރާއްޖެއަކީ ފަތުރުވެރިން ދަތުރުކުރަން އެންމެ ރައްކާތެރި އެއް މަންޒިލްކަން މި ފެއާރގައި އިޝްތިހާރު ކުރެވިގެން ދިޔައެވެ. ރާއްޖޭގެ ފަތުރުވެރިކަމުގެ ޕްރޮޑަކްޓް ކަމުގައިވާ ރިޒޯޓް, ގެސްޓްހައުސް, ލިވަބޯޑް, ހޮޓެލް އަދި ރާއްޖެއިން ފަތުރުވެރިންނަށް ލިބެން ހުންނަ ޚާއްސަ ތަޖުރިބާތައްވެސް މި ފެއާރގައި އިޝްތިހާރުކޮށްފައިވާއިރު، އެޑްވެންޗާ ޓްރެވެލް ކޮމިޔުނިޓީއަށް ހާއްސަކޮށް ރާއްޖޭގެ ވޯޓާރ ސްޕޯޓްސް އަދި ޑައިވިން ފަދަ ތަޖުރިބާތައް މި ފެއާގައި އިޝްތިހާރުކޮށްފައިވެއެވެ. ރާއްޖޭގެ ފަތުރުވެރިކަމުގެ ދާއިރާގައި ލަގްޒަރީގެ އިތުރުން އެކި ސެގްމެންޓްތައް ހުންނަކަން ދައްކައިދީ, ރާއްޖޭގެ ފަތުރުވެރިކަމުގެ ދާއިރާއަކީ ސަސްޓެއިނަބަލް އަދި ކޮމިޔުނިޓީ-އިންކްލޫސިވް ދާއިރާއަކަށް ހެދުމަށް ކުރާ މަސައްކަތާ މެދު ވާހަކަދައްކާފައިވެއެވެ. އެގޮތުން ރާއްޖޭގެ ލޯކަލް ޓޫރިޒަމް އިންޑަސްޓްރީ އަދި 'ތްރިލިން ސައިޑް އޮފް ލައިފް' ފަދަ ސެގްމެންޓްތައް މި ފެއަރގައި އިޝްތިހާރުކުރިއެވެ.

މި ހަރަކާތުގައި ބައިވެރިވުމުގެ އެއް މަގްސަދަކީ އެމެރިކާ މާކެޓުގައި ފަތުރުވެރިން ދަތުރުކުރުމަށް އެންމެ އެކަށީގެންވާ އަދި ރައްކާތެރި މަންޒިލްގެ ގޮތުގައި ދިވެހިރާއްޖެ ދެމެހެއްޓުން ކަމުގައި ވިޒިޓް މޯލްޑިވްސްއިން ބުނެފައިވެއެވެ. މިފަދަ ހަރަކާތްތަކުގައި ބައިވެރިވުމުގެ ބޭނުމަކީ މި މާކެޓުން ރާއްޖެ އަންނަ ފަތުރުވެރިންގެ އަދަދު އިތުރުކޮށް، ޕެންޑަމިކުގެ ކުރިން ހުރި މިންވަރަށް މި މާކެޓުން ރާއްޖެއަށް ފަތުރުވެރިން ގެނައުމެވެ. މި އިވެންޓުގައި ބައިވެރިވެފައިވަނީ އެމެރިކާ މާކެޓަށް އަމާޒުކޮށް އެމްއެމްޕީއާރުސީއިން ގެންގުޅޭ މާކެޓިން ސްޓްރެޓަޖީގެ ދަށުންނެވެ. މި ސްރެޓަޖީ ބިނާކޮށްފައިވަނީ މި މާކެޓުގައި ހިންގާ ބޮޑެތި ފެއަރ އަދި އިވެންޓްތަކުގާ ބައިވެރިވެ، ރާއްޖެ އިޝްތިހާރުކުރުމުގެ އިތުރުން މި މާކެޓުގެ ޓްރެވެލް ޓްރޭޑްއާއި ގުޅުން ބަދަހިކޮށް ވަރުގަދަކުރުމަށެވެ.

މިދިޔަ އަހަރު ރާއްޖެއަށް އެމެރިކާއިން 55,760 ފަތުރުވެރިން ވަނީ ޒިޔާރަތްކޮށްފައެވެ. އެގޮތުން މިދިޔަ އަހަރު ނަގާ ކިޔޭ ބޮޑު އެއް މާކެޓްގެގޮތުގައި އެމެރިކާ ވެގެންދިޔައެވެ. މިއަހަރު 20 އޭޕްރިލްގެ ނިޔަލަށް ބަލާއިރު ދިވެހިރާއްޖެއަށް އެމެރިކާއިން 24,171 ފަތުރުވެރިން ޒިޔާރަތްކޮށްފައިވެއެވެ. މިގޮތުން އެމެރިކާއަކީ މި އަހަރު 6 ވަނަ އެންމެ ބޮޑު މާކެޓެވެ. އަދި މި އަހަރު ޖުމްލަ 560،996 ފަތުރުވެރިން ދިވެހިރާއްޖެ އަަށް ޒިޔާރަތްކޮށްފައިވެއެވެ. މި އަހަރުގެ ފުރަތަމަ ހަތަރު މަހުގެ ތެރޭގައި ބައި މިލިޔަނަށް ވުރެ ގިނަ ފަތުރުވެރިން ދިވެހިރާއްޖެ ޒިޔާރަތްކުރުމަކީ މި ދާއިރާއަށް ލިބުނު ވަރަށް ބޮޑު ކާމިޔާބެކެވެ.

އެމެރިކާ މާކެޓަށް އަމާޒުކޮށް އެމްއެމްޕީއާރުސީއިން ފާއިތުވެދިޔަ އަހަރު ތެރޭގައި ގިނަ ހަރަކާތެއް ވަނީ ކުރިއަށް ގެންގޮސްފައެވެ. މި ހަރަކާތްތަކުގެ ތެރޭގައި ޖޮއިންޓް މާކެޓިން ކެމްޕެއިންތަކާއި ޓްރެއިނިންގ ވެބިނާތަކުގެ އިތުރުން ބޮޑެތި ފެއަރތަކުގާ ބައިވެރިވުމާއި ފެމިލިއަރައިޒޭޝަން ދަތުރު ބޭއްވުން ފަދަ ހަރަކާތްތައް ހިމެނެއެވެ. މިފަދަ ހަރަކާތްތައް މި އަހަރަށްވެސް ވަނީ ރާވާފައެވެ. އެގޮތުން މި އަހަރު އުސްޓޯއާ އެނުއަލް ކޮންފެރެންސްގައި ބައިވެރިވުމާއި، ރޯޑްޝޯ ބޭއްވުމާއި، އިތުރު ޓްރެއިނިންގ ވެބިނާ ހިންގުމާއި، އަދި މީޑިޔާ ފޭމްޓްރިޕް ގެ އިތުރުން އެހެން ގިނަ ހަރާކާތެއްވަނީ ރާވާފައެވެ.

4 މާޗް 2022 ވަނަ ދުވަހުން ފެށިގެން ކޮވިޑް-19ގެ ވެކްސިންގެ 2 ޑޯޒް ފުރިހަމަކޮށްފައިވާ ފަރާތްތަކުން ރާއްޖެ އަންނައިރު ޕީސީއާރު ޓެސްޓް ހަދަން ނުޖެހެ ގޮތަށް މިހާރު ވަނީ އުސޫލު ބަދަލުކޮށްފައެވެ. މިގޮތުން ރާއްޖެ އަންނަ މީހުންގެ ތެރެއިން ކޮވިޑް ވެކްސިން ފުރިހަމަކުރިތާ 14 ދުވަސްވެފައިވާ ނަމަ، ޕީސީއާރު ޓެސްޓް ހަދަން ދެން ނުޖެހޭނެއެވެ. މީގެ އިތުރުން، ކޮވިޑް-19 އާއި ގުޅިގެން ދިވެހިރާއްޖޭގައި އިއުލާނުކުރެވިފައިވާ އާންމު ސިއްޙަތުގެ ކުއްލި ނުރައްކަލުގެ ހާލަތު ވަނީ 14 މާރިޗް 2022 ވަނަ ދުވަހުން ފެށިގެން އުވާލާފައެވެ. ދިވެހިރާއްޖޭގައި ކޮވިޑް-19އިން ރައްކާތެރިވުމަށް އަޅާފައިވާ މިފިޔަވަޅުތަކަށް ލުއި ދިނުމުގެ ސަބަބުން ރާއްޖެއަށް ޒިޔާރަތްކުރާ ފަތުރުވެރިންނަށް އިތުރު ފަސޭހައަކަށް ވެގެންދާނެއެވެ.