ޓްވިޓަރއިން ފީއެއް ނެގުމާ ދިމާލަށް

ސޯޝަލް މީޑިއާ ޕްލެޓްފޯމުތަކުގެ ތެރެއިން ޓްވިޓަރއަކީ ވަރަށް ވަރުގަދަ އަދި އެހާމެ ބޮޑު ޕްލެޓްފޯމެކެވެ. ދުނިޔޭގެ އެކި ކަންކޮޅުތަކުން އެތައް ބިލިއަން ބަޔަކު ގެންދަނީ މި ޕްލެޓްފޯމު ބޭނުންކުރަމުންނެވެ. މިހާރުވެސް މި ޕްލެޓްފޯމުން އާންމުންނަށް އެތައް ކަމެއް ކުރެވެމުންދެއެވެ. އެތައް ފީޗަރއެއް ހުންނައިރު އެމީހެއްގެ ޚިޔާލު ފާޅުކުރުމާއި، މަދު ބަޔަކަށް އެކި ޓްވީޓުތައް ފެންނާނެހެން ހެދުމާއި، ގިނަ ބައެއްގެ މެދުގައި އެކި މައުޟޫތަކަށް މަޝްވަރާތައް ކުރިއަށް ގެންދެވުމާއި، ޓްވިޓަރ ސްޕޭސް މެދުވެރިކޮށް އެކި މީހުންނާއި ވާހަކަދައްކާލެވުމާއި، ކަންކަމާ ގުޅޭ މައުލޫމާތު ހޯދާލެވިގެން ދެއެވެ.

މިއަށްވުރެވެސް އިތުރު ފީޗަރތައް މިއަށް އިތުރުކޮށްގެން ޓްވިޓަރގެ ބޭނުން އެންމެ ފުރިހަމަގޮތުގައި ހިފިދާނެ ކަމަށް ގިނަ ބަޔަކު ގަބޫލުކުރެއެވެ. މިގޮތަށް ގަބޫލުކުރާ އެއް ފަރާތަކީ ޓްވިޓަރގެ އެންމެ ބޮޑު އެއް ހިސާދާރު ކަމުގައިވާ އީލޮން މަސްކެވެ. އޭނާ ގަބޫލުކުރާ ގޮތުގައި ޓްވިޓަރއަކީ އިތުރަށް ފުޅާކުރެވޭނެ ޕްލެޓްފޯމެކެވެ. މި ޕްލެޓްފޯމުގެ ބޭނުން ހިފޭނެ އިތުރު ގޮތްތައް އަދިވެސް އެބަހުރިކަމަށް އޭނާ ދެކެއެވެ. އަދި މިކަންކަން ހަގީގަތަކަށް ހަދަންވެސް އޭނާ ބޭނުންވެއެވެ. މިގޮތުން ޓްވިޓަރއަކީ އަމިއްލަ ކުންފުންޏަކަށް ހަދައި، އެތަނުގައި އެންމެންނަށްވެސް ޚިޔާލު ފާޅުރުމުގެ މިނިވަންކަން އޮންނަންޖެހޭނެ ކަމަށް އޭނާ ބުނެއެވެ.

މިކަންކަން ހަގީގަތަކަށް ހެދުމަށް އޭނާ ވަނީ ޓްވިޓަރ ގަތުމަށް ނިންމާފައެވެ. ޓްވިޓަރއަކީ ޕްރައިވެޓް ކުންފުންޏަކަށް ހަދައިގެން މި ބަދަލުތައް ގެނެވޭނެ ކަމަށް އޭނާ ގަބޫލުކުރެއެވެ. 44 ބިލިއަން ޑޮލަރަށް ޓްވިޓަރ ގަތުމަށް މަސްކު މިހާރު ވަނީ ހުށަހެޅުމެއްވެސް ހުށަހަޅާފައެވެ. އޭނާގެ މި ހުށަހެޅުން ޓްވިޓަރއިން ވަނީ ބަލައިގެންފައެވެ. މިކަމުގެ މަޝްވަރާތައް އަދިވެސް ކުރިއަށްދެއެވެ. އެހެންނަމަވެސް މިކަމުގައި ނިންމުމެއް އަދި ނިންމާފައެއް ނުވެއެވެ.

އެހެންނަމަވެސް މަސްކު ގެންދަނީ ކުރިއަށް އޮތް ތަނުގައި ޓްވިޓަރއަށް އަންނާނެ އެކި ބަދަލުތައް އޭނާގެ އަމިއްލަ ޓްވިޓަރ އެކައުންޓް މެދުވެރިކޮށް ހިއްސާކުރަމުންނެވެ. މިގޮތުން ޓްވިޓަރގެ ބޭނުން އެއްވެސް ހުރަހެއް ނެތި ހިފޭނެކަމާއި، އެއީ ރައްކާތެރިތަނަކަށް ވެގެންދާނެ ކަމަށް އޭނާ ގެންދަނީ ބުނަމުންނެވެ. އަދި މީހުންގެ މެދުގައި ދެކެވޭ ވާހަކަތަކަށް އިތުރަށް ރައްކާތެރިވާނެހެން ފީޗަރތަކެއް ގެންނަންޖެހޭކަމަށް އޭނާ ބުނެއެވެ. މީގެ އިތުރުންވެސް ކުރިއަށް އޮތް ތަނުގައި ޓްވިޓަރ އަންނާނެ އެކި ބަދަލުތައް އޭނާ ގެންދަނީ ހިއްސާކުރަމުންނެވެ.

ހަމަމިއާއެކު ޓްވިޓަރ ބޭނުންކުރުމަށް ފީއެއް ނަގާ ކަހަލަ ވާހަކައެއްވެސް މަސްކު ވަނީ ހިއްސާކޮށްފައެވެ. އެހެންނަމަވެސް އެއީ ވަކި ބައެއްގެ އަތުން ނަގާނެ ޕީއެއް ކަމަށް އޭނާ ބުނެފައިވެއެވެ. މަސްކު ބުނީ އާންމުންނަށް އަބަދުވެސް ޓްވިޓަރ ހިލޭ ބޭނުންކުރެވޭނެ ކަމަށެވެ. އެހެންނަމަވެސް ސަރުކާރުތަކުގެ ބޭނުމަށް ޓްވިޓަރ ބޭނުންކުރާއިރު ކޮންމެވެސް ވަރެއްގެ ފީއެއް ނެގުން އެކަށީގެންވާކަމަށް އޭނާ ބުނެފައިވެއެވެ. ޓްވިޓަރއަށް ގެންނަން ބޭނުންވާ އެކި ބަދަލުތަކާ ގުޅޭ މަޝްވަރާތައް ކުރިއަށްދާއިރު، އަދި މިއިން އެއްވެސް ކަމެއް ނިންމާފައެއް ނުވެއެވެ.

44 ބިލިއަން ޑޮލަރަށް ޓްވިޓަރ ގަތުމަށް ބިލިއަނަރު, އީލޮން މަސްކް ހުށަހެޅި ބިޑް ޓްވިޓަރއިން ބަލައިގެންފައިވާއިރު، ޓްވިޓަރގެ ގާނޫނީ ވަކީލުން ވަނީ އެއްބަސްވުމުގައި "ސްޕެޝަލް ޕަރމޯފެންސް" ނަމުގައި ބައެއް އިތުރުކޮށްފައެވެ. އެއީ އެއްބަސްވުމާއި އެއްގޮތަށް އަމަލުކުރުމަށް ބާރުއެޅުމުގެ ގޮތުންނެވެ. އެހެންނަމަވެސް އެއްބަސްވުން އުވާލަން ބޭނުންވާނަމަ 1 ބިލިއަން ޑޮލަރު ދައްކަންޖެހޭ ގޮތަށް އޮތުމަކީ އެއްބަސްވުން އުވާލުމަށް އީލޮން މަސްކު އަށް ލިބޭ ބާރެކެވެ. އީލޮން މަސްކު ޓްވިޓަރ ގަތުން މަޑުޖައްސާލަފާނެ އެއް ސަބަބެއްކަމަށް މާހިރުން ބުނަނީ އޭނާގެ ޓެސްލާ ކުންފުންޏެވެ. އީލޮން މަސްކު ޓްވިޓަރ ގަންނަ ވާހަކައަކާއެކު އިލެކްޓްރިކް ވެހިކަލް އުފައްދާ ޓެސްލާ ކުންފުނީގެ ހިއްސާވަނީ ފަސް ވަނަ ފަހަރަށް ދަށަށް ގޮސްފައެވެ. އެއީ އީލޮން މަސްކުގެ އައު ކުންފުނިކަމުގައިވާ ޓްވިޓަރ ހިންގުމަށް ޓެސްލާ ކުންފުނީގެ އޭނާގެ ހިއްސާ ވިއްކާލަފާނެ ކަމަށެވެ.