ރައީސް މުއިއްޒުގެ މި ސަރުކާރުގެ ހީލަތްތެރި ރޭވުމުގެ ދަށުން މިހާރު މަޖިލީހަށް ހުށަހަޅާފައި އޮތް މީޑިއާ ކޮންޓްރޯލް ބިލުގެ އަސްލު މަޤްޞަދަކީ ސިޔާސީ ފަރާތްތަކުގެ ސޯޝަލް މީޑިއާ ބްލޮކްކުރުން ކަމަށް ޔޫއޭއީގެ ކުރީގެ ޑެޕިއުޓީ އެމްބެސެޑަރ މުހައްމަދު ފައިސަލް ވިދާޅުވެއްޖެއެވެ.

ފައިސަލް މިފަދައިން ވިދާޅުވީ ހޮނިހިރު ދުވަހުގެ ރޭ އެކްސްގައި ކުރެއްވި ޕޯސްޓެއްގައި އެވެ.

ފައިސަލް ވިދާޅުވީ މި ސަރުކާރުގެ ރޭވުމުގެ ދަށުން މަޖިލީހަށް މިހާރު ހުށަހަޅާފައި އޮތް މީޑިއާ ކޮންޓްރޯލް ކުރުމުގެ ބިލުގެ މައިގަނޑު މަޤްޞަދަކީ ނޫސްވެރިކަން ހަނިކުރުމުގެ އިތުރުން، ސިޔާސީ ފަރާތްތަކާއި އެކްޓިވިސްޓުންގެ ސޯޝަލް މީޑިއާ އެކައުންޓްތައް، އަދި ޚާއްޞަކޮށް އެކްސް އެކައުންޓް ތައް ބްލޮކްކުރުމަށްކަމަށެވެ.

ރައީސް މުޢިއްޒުގެ ސަރުކާރުން މި ބިލު ފާސްވުމުން، އެމެރިކާގެ ލޯ ފަރމެއްގެ އެހީގައި ވަކި ލޮކޭޝަނަކަށް އަމާޒުކޮށް އެކްސްގެ އެކައުންޓްތައް ރާއްޖޭއަށް ނުފެންނަ ގޮތަށް ބްލޮކްކުރުމަށް މަސައްކަތްކުރާ ކަމަށް މަޢުލޫމާތު ލިބިފައިވާ ކަމަށް ފައިސަލް ވިދާޅުވެފައި ވެއެވެ. އަދި މި މަސައްކަތް ކާމިޔާބުވެއްޖެނަމަ، ޓިކްޓޮކް، ފޭސްބުކް އަދި އިންސްޓަގްރާމްފަދަ އެހެން ޕްލެޓްފޯމްތަކަށް ވެސް މިފަދަ ފިޔަވަޅުތައް އަޅަން ރޭވިފައިވާ ކަމަށް ބެލެވޭ ކަމަށް ވެސް އޭނާ ވަނީ ވިދާޅުވެފައި އެވެ.

ނަމަވެސް، ބައިނަލްއަޤްވާމީ ޤާނޫނީ މާހިރުން ދެކޭގޮތުގައި މިފަދަ ޤާނޫނެއް ތަންފީޒުކުރުމަކީ ޤާނޫނީގޮތުން ކުރެވޭނެ އަދި ކުރަންވާނެ ކަމެއް ނޫންކަމަށާއި މި ބިލަކީ ދިވެހިރާއްޖޭގެ ޤާނޫނުއަސާސީގެ 27 އަދި 28 ވަނަ މާއްދާއިން ކަށަވަރުކޮށްދީފައިވާ ޚިޔާލުފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަމާ ފުށުއަރާ އެއްޗެއްކަމަށް ވެސް ފައިސަލް ވިދާޅުވެފައި ވެއެވެ.

ފައިސަލް މިފަދައިން ވިދާޅުވެފައިވާއިރު، މީޑިއާ ކައުންސިލް، ނޫސްވެރިންގެ އެސޯސިއޭޝަން އަދި ހިއުމަން ރައިޓްސް ކޮމިޝަން އޮފް ދަ މޯލްޑިވްސްގެ އިތުރުން 20 އަށްވުރެ ގިނަ ލޯކަލް އަދި އިންޓަރނޭޝަނަލް ޖަމްޢިއްޔާތަކުން މި ބިލާ ދެކޮޅުކަން ހާމަކޮށް މި ބިލު ވަގުތުން ބޭރުކުރުމަށް ވަނީ ގޮވާލާފަ އެވެ. އަދި 41 މީޑިއާ އަކުން 151 އަށްވުރެ ގިނަ ނޫސްވެރިން ސޮއިކޮށް މި ބިލު އަނބުރާ ގެންދިއުމަށް ގޮވާލައި ވަނީ މަޖިލީހަށް ޕެޓިޝަނެއް ވެސް ހުށަހަޅާފައެވެ.

ފައިސަލް އިތުރަށް ވިދާޅުވެފައިވަނީ ރާއްޖޭގައި އެކްސް ބޭނުންކުރާ 200,000 މީހުންނަކީ އެ ޕްލެޓްފޯމްގެ ޖުމްލަ ބޭނުންކުރާ ފަރާތްތަކުގެ 0.01 އިންސައްތައަށްވުރެ ކުޑަ އަދަދެއް ކަމަށާއި އެހެންކަމުން، ޤާނޫނީ މާހިރުން ދެކޭގޮތުގައި ބޮޑެތި ސޯޝަލް މީޑިއާ ޕްލެޓްފޯމްތަކުން މިފަދަ މަނާކުރުންތަކަށް ބޯލަނބާނެކަމަށް ނުބެލެވޭ ކަމަށެވެ.

އަދި މި ބިލަކީ އިޞްލާޙީ ބިލެއްގެ ބަދަލުގައި، ޤާނޫނުއަސާސީއާ ޚިލާފަށް އެކުލަވާލެވިފައިވާ ބިލެއް ކަމަށް ވެސް ފައިސަލް ފާހަގަކޮށްފައި ވެއެވެ.