ސަބްމެރިން ކޭބަލް އެޅުމުގެ ސަރވޭ ކުރަމުން ދިޔަ ކުންފުންޏަށް ދެލައްކައެއްހާ ރުފިޔާގެ ޖޫރިމަނާއެއް
ސަބްމެރިން ކޭބަލް އަޅަނީ އަގުހެޔޮކޮށް އަވަސް އިންޓަނެޓްގެ ޚިދުމަތެއް މުޅި ރާއްޖެއަށް ފޯރުކޮށްދިނުމަށް
ސަބްމެރިން ކޭބަލް އެޅުމުގެ ސަރވޭއަށް ރާއްޖެ އައިސްފައިވާ ބޯޓު
ރާއްޖޭގައި އިންޓަނެޓްގެ އަގުހެޔޮކޮށް އަވަސް އިންޓަނެޓްގެ ޚިދުމަތެއް މުޅި ރާއްޖެއަށް ފޯރުކޮށްދިނުމަށް ބޭނުންވާ ސަބްމެރިން ކޭބަލް އެޅުމުގެ ސަރވޭގެ މަސައްކަތް ކުރަމުން ދިޔަ ކުންފުނި ޖޫރިމަނާ ކޮށްފިއެވެ.
މި ސަރވޭއަކީ ސަބްމެރިން ކޭބަލް އެޅުމުގެ މަސައްކަތް ފެށުމަށް، ކޭބަލް އަޅާނެ މަގު ޗެކްކޮށް، އެ މަގުން ކޭބަލް އެޅޭނެ ގޮތް ބެލުމަށް ކުރަމުންދާ ސާރވޭއެކެވެ.
ސަރުކާރުން އަޅާ ފުރަތަމަ ސަބްމެރިން ކޭބަލް އެޅުމުގެ މި މަޝްރޫއު ޙަވާލުކުރީ އިންޑިޔާގެ އެންމެ މުއްސަނދި މީހާ، މުކޭޝް އަމްބާނީގެ ރިލަޔަންސް ޖިއޯ ކުންފުންޏާއެވެ. މިއެއްބަސްވުމުގައި ސަރުކާރުގެ ފަރާތުން ސޮއިކޮށްފައިވަނީ ސަރުކާރުގެ 100 އިންސައްތަ ހިއްސާ އޮންނަ މޯލްޑިވްސް ފަންޑް މެނޭޖްމަންޓް ކޯޕަރޭޝަންގެ ސަބްސިޑަރީ ކުންފުންޏެއްކަމަށްވާ އޯޝަން ކަނެކްޓް މޯލްޑިވްސްގެ ފަރާތުންނެވެ.
ސަރުކާރުން މި ކޭބަލް އަޅަނީ ރާއްޖޭގައި އިންޓަނެޓްގެ އަގުހެޔޮކޮށް އަވަސް އިންޓަނެޓްގެ ޚިދުމަތެއް މުޅި ރާއްޖެއަށް ފޯރުކޮށްދިނުމަށެވެ.
ރާއްޖެއާއި ގުޅާލުމަށް ހަމަޖެހިފައިވަނީ ރިލަޔަންސް ކުންފުނިން އަޅާ އިންޑިޔާ-އޭޝިޔާ އެކްސްޕްރެސް (އައިއޭއެކްސް) ކޭބަލެވެ. މިއީ އިންޑިޔާގެ މުމްބާއީން ފެށިގެން ސިންގަޕޫރާއި ހަމައަށް އަޅާ ކޭބަލެކެވެ.
އެކަމާ ގުޅޭގޮތުން އެންވަޔަރމަންޓަލް ޕްރޮޓެކްޝަން އޭޖެންސީ (އީޕީއޭ) އިން ބުނީ، އެ އުޅަނދު ހުޅުމާލޭގެ އިރުމަތި ފަރާތު ފަރު ބޭރުގައި ސަރވޭތަކެއް ކުރަމުން ދަނިކޮށް، އުޅަނދުގައި ބޭނުންކުރަމުން އައި ސިސްޓަމްގެ ޕޯލްއާއި އެ އުޅަނދުގައި ހަރުކޮށްފައި ހުރި މަލްޓިބީމް އިކޯސައުންޑަރު އެ ފަރުގައި ޖެހިފައިވާކަން އެ ފަރާތުން އަންގާފައިވާކަމަށެވެ.
ވުމާއެކު، މޯލްޑިވްސް ނޭޝަނަލް ޑިފެންސް ފޯސްގެ ކޯސްޓްގާޑާއި ގުޅިގެން އީޕީއޭއިން 13 އެޕްރީލު 2022 ގައި އެ ސަރަޙައްދަށް ކަނޑުފީނައިގެން ސާރވޭތަކެއް ކޮށްފައިވާ ކަމަށާއި މި ސާރވޭއިން ދައްކާ ގޮތުގައި ފަރަށް ގެއްލުންތަކެއް ލިބިފައިވާކަމަށް އީޕީއޭއިން ބުނެއެވެ.
ހުޅުމާލޭގެ ފަރަށް ލިބުނު ގެއްލުންތަކަށް ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން ހެދިފައިވާ "ތިމާވެށްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލުހޯދުމުގެ ޤަވާޢިދު" ގެ ދަށުން 198,112.73 (އެއްލައްކަ ނުވަދިހަ އަށްހާސް އެއްސަތޭކަ ބާރަ ރުފިޔާ ހަތްދިހަ ތިންލާރި) ރުފިޔާއިން އެ އުޅަނދުގެ ވެރިފަރާތް ވަނީ ޖޫރިމަނާ ކުރެވިފައެވެ.
އޭގެ އިތުރުން، 30 ދުވަހުގެ ތެރޭގައި އީޕީއޭއަށް ޖޫރިމަނާގެ ފައިސާ ދެއްކުމަށް އެ އުޅަނދުގެ ދިވެހިރާއްޖޭގެ އެޖެންޓު، އެންޓްރެކް ހޯލްޑިން ޕްރައިވެޓް ލިމިޓެޑަށް 03 މެއި 2022 ގައި ވަނީ އަންގާފައެވެ.
