ނުސީދާ އިބާރާތްތަކާއި ކުރެހުންތައް ބޭނުންކޮށްގެން "އިންޑިއާ އައުޓް" ކެމްޕޭން ހިންގުމަށް ކުރަމުންދާ ކަންތައްތަކަކީ ކޯޓު އަމުރަށް ގޮން ޖެހުމުގެ އަމަލުތަކެއްކަމަށް ބެލެވޭނެކަމަށް ކްރިމިނަލް ކޯޓުން ބުނެފިއެވެ.

މިދިޔަ އޭޕްރީލް މަހުގެ 21 ވަނަ ދުވަހު ރައީސް ނެރުއްވި ގަރާރެއްގައި ބުނެފައިވަނީ، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީން ލިބިދީފައިވާ ޚިޔާލުފާޅުކުރުމުގެ މިނިވަންކަމާއި އެއްވެއުޅުމުގެ މިނިވަންކަމުގެ ނާޖާއިޒު ފައިދާ ނަގައި އިންޑިޔާއާ ދެކޮޅަށް ހިންގާ ކެމްޕޭނަކީ، ދިވެހިރާއްޖޭގެ ސުލްހަމަސަލަސްކަން ނަގާލުމުގެ ނިޔަތުގައި ރާވައިގެން ހިންގަމުންގެންދާ ކެމްޕޭނެއް ކަމަށެވެ.

އިދިކޮޅުން ހިންގާ ހަރަކާތަކީ، ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާތަކާ ވެސް ދެކޮޅު ހަރަކާތެއްކަމަށް ގަރާރުގައި ބުނެފައިވެއެވެ.

ރައީސްގެ ގަރާރު ތަންފީޒުކުރުމުގެގޮތުން ފުލުހުން އަންނަނީ، މާލޭގެ އެކި ސަރަހައްދުތަކުގައި އިދިކޮޅުން ދަމަމުން އަންނަ އިންޑިއާ އައުޓް ބެނަރތައް ނަގަމުންނެވެ.

އެގޮތުގެ މަތިން ކޯޓު އަމުރުގެ ދަށުން ބައެއް ބެނަރތައް ނަގާފައިވީނަމަވެސް، އިންޑިއާ އައުޓްގެ ސްޕެލިންގ ބަދަލުކޮށްގެންނާއި، އިންޑިއާގެ ދިދަ ރަމްޒުވާގޮތަށް ގްރެފިޓީ ބޭނުންކޮށްގެން މި ކެމްޕޭން ގެންދަނީ ފުޅާކުރަމުންނެވެ. އޭގެތެރޭގައި ޕީޕީއެމް އޮފީސް ހިންގާ ހ. ހުރަފާ ގޭގައިވެސް އަލުން އިންޑިއާ އައުޓް ބެނަރ ދަމާފައިވާއިރު، ފުލުހުން ވަނީ ކޯޓު އަމުރުގެ ދަށުން އެ ބެނަރވެސް ނަގާފައެވެ.

ރާއްޖެއެމްވީއަށް އެނގިފައިވާ ގޮތުގައި ފުލުހުން ކޯޓު އަމުރަށް އެދި ހުށައަޅާފައިވަނީ، ބައިނަލްއަގުވާމީ ގުޅުންތަކަށް ނުރަނގަޅު އަސަރުކުރާގޮތަށް، އަދި އިންޑިއާގައި ދިރިއުޅޭ، އަދި އެގައުމަށް ޒިޔާރަތްކުރާ ދިވެހި ރައްޔިތުންގެ މަސްލަހަތަށް ބުރޫއަރާގޮތަށް، އެ ގައުމަށް ނިސްބަތްކޮށް ނަފްރަތާއި ފިތުނަ އުފައްދާކަމަށް ބަޔާންކޮށްފައެވެ.

އިންޑިއާގެ ގަދަރާއި ކަރާމަތަށް އުނިކަން ލިބޭފަދަ ގޮތަކަށް ކ. މާލެ ހ. ހުރަފާގޭގެ އިމާރާތުގެ ބޭރުގައި އާއްމުކޮށް ފެންނާނެހެން ބެނަރއެއް ހަރުކޮށްފައިވާއިރު، އިންޑިއާއާ ދެކޮޅުކަން ހާމަވާފަދަ ގޮތަކަށް، އެގައުމުގެ ގައުމީ ދިދައިގެ ކުލައާއި ނިޝާންތައް ބޭނުންކޮށްފައިވާކަމަށް ފުލުހުން ބުނެއެވެ.

ކްރިމިނަލް ކޯޓުގެ އަމުރުގައި ބުނެފައިވަނީ، އިންޑިއާގެ ރަސްމީ ދިދައިގެ ހުރުމަތް ކެނޑޭފަދަ، އަދި އިންޑިއާގެ ދިދައަށް އިހުތިރާމް ކުޑަވާފަދަ ކުރެހުންތަކުގެ ގްރެފިޓީއާއި ބެނަރތައް މާލޭގެ އެކި ތަންތަނުގައި ހަރުކުރަމުން ގެންދަނީ ކޯޓު އަމުރާއި، ނިންމުމަށް ގޮންޖެހުމަށް ކަމަށެވެ.

އެއީ ނުސީދާ އިބާރަތްތަކާއި ކުރެހުންތައް ބޭނުންކޮށްގެން ކެމްޕޭންގެ މެސެޖުތައް ފާޅުކުރުމުގެ ގޮތުން ކުރާ ކަމެއްކަމަށް ބެލުމުގެ އިހުތިމާލު އޮތްކަން އަމުރުގައި ވަނީ ފާހަގަކޮށްފައެވެ.

ކްރިމިނަލް ކޯޓުން މި އަމުރު ނެރުމުގައި ދިވެހިރާއްޖޭގެ ރައީސުލްޖުމްހޫރިއްޔާގެ ނަމްބަރު 5/2022 ގަރާރަށް ރިއާޔަތްކޮށްފައިވެއެވެ.

ރާއްޖެއެމްވީއަށް އެނގިފައިވާ ގޮތުގައި ޕީޕީއެމް އޮފީހުގައި ފަހުން ހަރުކުރި ބެނަރ ނެގުމަށް 1 މޭގައި ފުލުހުން ވަނީ އެ ގޭގެ ވެރިފަރާތަށް އަންގާފައެވެ. އެހެންނަމަވެސް، އެ އެންގުމަށް އަމަލުކޮށްފައިނުވާތީ، ކޯޓު އަމުރު ހޯދައިގެން ގޮސް ފުލުހުން އެ ބެނަރ ނަގާފައިވަނީ އާދިއްތަ ދުވަހުގެ ރޭގެ ވަގުތެއްގައެވެ.