ދިވެހިން ފަހަތުގައި ތިބެގެން އިންޑިއާ އައުޓް ކެމްޕެއިން ނުހިންގާނެ - ރައީސް ނަޝީދު

ދިވެހިން ފަހަތުގައި ތިބެގެން އިންޑިއާ އައުޓް ކެމްޕެއިން ނުހިންގާނެ ކަމުގެ ޔަގީންކަންއެބައޮތް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ކެމްޕެއިނަށް ޗައިނާއިން ޚަރަދު ކުރަމުން އަންނަކަމަށް ދޭހަވާގޮތަކަށް ވާހަކަފުޅު ދައްކަވަމުން ރައީސް ނަޝީދު ވަނީ، އެ ކެމްޕެއިނަށް ކުރަމުން އަންނަ ޚަރަދުތަކާ ގުޅޭ ގޮތުން ސުވާލު އުފައްދަވާފައެވެ.

ރާއްޖޭގެ ފޮރިން ޕޮލިސީއަކީ އަބަދުވެސް އިންޑިއާ ފަސްޓް ޕޮލިސީ ކަމަށާއި، އިންޑިއާގެ ކްރެޑިޓް ލައިން ފެސިލިޓީގެ ދަށުން ރާއްޖޭގައި ހިންގާ ޕްރޮޖެކްޓްތައް މިހާރުވެސް އެބަހުރި ކަމަށެވެ. އެހުރިހާކަމެއް ދަނީ ވަރަށް އޮމާން ކަމާއެކުގައި ކަމަށް ރައީސް ނަޝީދު ވިދާޅުވިއެވެ. އޭގެތެރޭގައި ކަލްޗަރަލް އެކްސްޗޭންޖް ޕްރޮގްރާމްތަކާއި، ގާބިލްކަން އިތުރުކުރުމުގެ ޕްރޮގްރާމް ތަކާއި، ދަރިވަރުން ބަދަލު ކުރުމުގެ ޕްރޮގްރާމްތައް ހިމެނޭ ކަން ރައީސް ނަޝީދު ފާހަގަކުރެއްވިއެވެ. އަދި ދެގައުމުގެ ގުޅުމާއެކު ފާގަތި މުސްތަގްބަލެއް އޮތް ކަމަށް ވިދާޅުވިއެވެ.

ރައީސް ނަޝީދު ވިދާޅުވީ، އިންޑިއާގެ ފަރާތުން ރާއްޖޭގެ އިގްތިސާދަށް ބޮޑެތި ފައިދާ ތަކެއް ކުރަމުން އަންނަ ކަމަށެވެ.

އިދިކޮޅުން ހިންގާ މި ހަރަކާތަކީ ބަލައިގަނެވޭ މަގްބޫލް ހަރަކާތެއް ނޫންކަމަށް ވިދާޅުވިއެވެ.

ރައީސް ނަޝީދު ވިދާޅުވީ، ޚިޔާލު ފާޅުކުރުމުގެ މިނިވަން ކަމުގެ ނިވަލުގައި ނަފްރަތު އުފެއްދުމަށް ފުރުސަތު ދެވިގެން ނުވާނެ ކަމަށެވެ. އެހެންކަމުން ސަރުކާރަށް ގަބޫލްކުރެވުނީ އެފަދަ ކަންކަން ހުއްޓުވުމަށް ޚާއްސަ ގާނޫނެއް އޮންނަން ޖެހޭނެ ކަމަށް ކަމުގައި ރައީސް ނަޝީދު ވިދާޅުވިއެވެ. އެފަދަ ގާނޫނެއްގެ ދަށުން އަވަށްޓެރިންނާމެދު ނަފްރަތު އުފެއްދުމާއި، ދޭދޭ ގުޅުމަށް ބުރޫއަރާ ކަންކަމަށް ޖާގަ ނުދެވޭނެ ކަމަށެވެ.

ރައީސް ނަޝީދު ވިދާޅުވީ، ކުރީގެ ރައީސް ޔާމީނަށް އިންޑިއާއާއި ގުޅޭ ގޮތުން މައްސަލައެއް އޮތްނަމަ އިންޑިއާގެ ކޯޓުތަކަށް ވަޑައިގަންނަވަންވީ ކަމަށެވެ. އެމަނިކުފާނު ވިދާޅުވީ، އެއީ ހަމައެކަނި ކުރީގެ ރައީސް ޔާމީން ގެންގުޅުއްވާ ޚިޔާލީ ވިސްނުންފުޅެއް ކަމަށާއި، މަސައްކަތް ކުރައްވަނީ އެ ވިސްނުންފުޅުގައި ކުލަ ޖެއްސެވުމަށް ކަމަށެވެ. އަދި ރައީސް ޔާމީން ދައްކަވަނީ އެއްވެސް ހަގީގަތެއް ނެތް ވާހަކަފުޅުތަކެއް ކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ، އިދިކޮޅުން ހިންގާ ހަރަކާތަކީ އިންތިޚާބަކާވެސް ގުޅުމެއް އޮތް ކަމެއް ނޫން ކަމަށެވެ.