ޓެނިސް ޗެމްޕިއަން ބޮރިސް ބެކަރ ދެއަހަރާއި ބަޔަށް ޖަލަށް!

ޓެނިސް ޗެމްޕިއަން ބޮރިސް ބެކަރއަށް ދެއަހަރާއި ހަމަސް ދުވަހުގެ ޖަލު ހުކުމެއް އިއްވައިފިއެވެ.

ބޮރިސްއަަށް ހުކުމް ކޮށްފައިވަނީ އޭނާގެ ދަރަނި ނުދައްކާ 2.5 މިލިއަން ޕައުންޑަށްވާ މުދާ ފޮރުވައިގެން އުޅުމުގެ މައްސަލައިގައެވެ. އުމުރުން 54 އަހަރުގެ ބޮރިސް ލޯނުގެ ގޮތުގައި ނަގާފައިވާ ތިން މިލިއަން ޕައުންޑު ނުދައްކައިގެން އެމައްސަލަ ކޯޓަށް ވައްދާފައިވަނީ 2017 ވަނަ އަހަރުގެ ޖޫންމަހުއެވެ. ދުނިޔޭގެ ގްރޭންޑް ސްލޭމް ޗެމްޕިއަންކަން ހަފަހަރު ހޯދާފައިވާ ބޮރިސްގެ މައްޗަށް ކުށް ސާބިތުވުމާއެކު ހުކުމް ކުރީ ހުކުރު ދުވަހުއެވެ.

އޭނާގެ ދިފާއުގައި އެކަށީގެންވާ ވަރަށް ހެކި ހުށަހެޅިފަނުވުމާއެކު މި މަހުގެ ހަތަރު ވަނަ ދުވަހު ބޮރިސްގެ މައްޗަށް ވަނީ ކުށް ސާބިތުވެފައެވެ.

މީގެ ކުރިންވެސް އޭނަަގެ މައްޗަށް ވަނީ ފައިސާ އާއި ގުޅޭ ދައުވާތަކެއް އުފުލާފައެވެ. އެގޮތުން ޓެކްސް ނުދައްކައިގެން 2002 ވަނަ އަހަރުވެސް ވަނީ އޭނަަގެ މައްޗަށް ދައުވާ ކޮށްފައެވެ.