އިނގިރޭސި ރާނީގެ ޕްލެޓިނަމް ޖުބުލީއަށް ލިބިވަޑައިގަތީ "ކުއީން ބާބީ" އެއް

އިނގިރޭސި ރާނީ އެލިޒަބަތު ދެވަނައިގެ ރަނިކަމަށް 70 އަހަރު ފުރުމުގެ މުނާސަބަތުގައި އެކަމަނާއަށް "ބާބީ ޑޯލް" އެއް ހަދިޔާކުރެވިއްޖެ އެވެ.

ރާނީ އެލިޒަބަތު ސިފަވާ މި ބާބީ ޑޯލް އަކީ އެމެރިކާގެ "މެޓަލް އިންކް" އިން އުފެއްދި ބާބީ ޑޯލް ކަލެކްޝަންގެ އެންމެ ފަހުގެ ޑޯލްއެވެ. ރާނީ އާއި ވައްތަރު މި ބާބީ ޑޯލް ވަނީ އެކަމަނާއަށް ހަދިޔާ އަށް އަރުވާފަ އެވެ.

"މެޓަލް އިންކް" އިން ބުނީ މިއީ ރާނީގެ ރަނިކަމުގެ 70 އަހަރު ފުރުމުގެ މުނާސަބަތުގައި އެ ކުންފުނިން ކުރި ކަމެއް ކަމަށާއި، އެކަމަނާއަށް އެރުވި ޓްރިބިއުޓެއް ކަމަށެވެ.

ޑޯލް ލައްވާފައި ހުރީ އައިވަރީ ގައުންއެކެވެ. އަދި ނޫ ކުލައިގެ ޝޭޝް އެއް އަޅުވާފައިވާ އިރު، ރިބަންތަކާއި ރާނީ ކައިވެނިފުޅު ބައްލަވައިގެންނެވި ދުވަހު ތުރުކުރައްވައިގެން ހުންނެވި ތާޖުކޮޅު ވެސް ޑޯލްގެ ބޮލުގައި އަޅުވާފައިވެއެވެ.

ރާނީގެ އުމުރުފުޅުން މިހާރު 96 އަހަރު ވެފައިވަ އިރު، އެކަމަނާއަށް ރަނިކަން ލިބިވަޑައިގެންނެވީ އެކަމަނާގެ ބައްޕާފުޅު ކިންގް ޖޯޖް 6ވަނަ، ފެބްރުއަރީ 1952 ގައި އަވަހާރަވުމުންނެވެ.

ރާނީއާއި ވައްތަރު ބާބީ ޑޯލް ލަންޑަންގެ ހެރޮޑްސް، ސެލްފް ރިޑްޖްސް އަދި ހަމލޭސް އިން ގަންނަން ލިބެން ހުންނާނެކަމަށް މެޓަލް އިންކް އިން ބުނެއެވެ.

ރާނީގެ ސިއްހަތު އަދިވެސް ރަގަޅެވެ. ތަޚުތުގައި އަދި އިތުރު ތިން އަހަރެއްހައި ދުވަސް ހޭދަކުރައްވައިފިނަމަ ދުނިޔޭގެ ތާރީޚުގައި ވެސް އެންމެ ގިނަދުވަހު ތަޚުތުގައި އިންނެވުމުގެ ރެކޯޑް ލިބިވަޑައިގަންނަވާނެއެވެ. މިވަގުތު އެރެކޯޑުގެ ވެރިޔަކީ ފްރާންސްގެ ލުއިސް ސާދައެވެ. އޭނާ 72 އަހަރު ރަސްކަން ކުރެއްވިއެވެ.