ބޮލީވޫޑްގެ ތަރި ރާނީ މިކަރްޖީ ދުވަސްތަކެއްގެ މެދުކެނޑުމަކަށް ފަހު އެނބުރި އައިސް ކުޅޭ ފުރަތަމަ ފިލްމު "ހިޗްކީ"ގެ ޓްރެއިލާ އަންގާރަ ދުވަހު ނެރެފައިވާ އިރު އެ ޓްރެއިލާ އަށް ގިނަ ބަޔަކު ތައުރީފްކޮށްފިއެވެ.
އަންނަ ފެބްރުއަރީ މަހުގެ 23 ވަނަ ދުވަހު ސިނަމާތަކަށް އަންނަ "ހިޗްކީ" އަކީ ރާނީގެ ފިރިމީހާ އަދި މަޝްހޫރު ޑައިރެކްޓަރު އަދިތިޔާ ޗޯޕްޅާގެ ފިލްމު ކުންފުނި ޔަޝް ރާޖް ފިލްމްސް އިން އުފައްދާ ފިލްމެކެވެ.
މިޓްރެއިލާ ނެރުމާ އެކު ބޮލީވުޑްގެ ތަރިން ވަނީ ޓްރެއިލާއަށް ތައުރީފު ކޮށްފައެވެ. އެގޮތުން މަޝްހޫރު ޑައިރެކްޓަރ/ޕްރޮޑިއުސަރ ކަރަން ޖޯހަރު ބުނެފައި ވަނީ "ހިޗްކީ" ގައި ރާނީގެ އެކްޓިން ވަރަށް ކަމުދާ ކަމަށާއި އޭނާގެ ޓެލެންޓަކީ ބަލައިގަނެވޭވަރުގެ ޓެލެންޓެއް ކަމަށެވެ.
ފިލްމީ ތަރި އަދި ރާނީގެ ދެބެއިންގެ ދެދަރި މީހެއް ކަމަށްވާ ކާޖޮލް ބުނެފައި ވަނީ "ހިޗްކީ" ރަނގަޅުވާނެ ކަމަށް އުންމީދުކުރާ ކަމަށާއި ކާމިޔާބީއަށް އެދޭ ކަމަށެވެ.
"ހިޗްކީ" ޑައިރެކްޓްކޮށްފައި ވަނީ 2010 ގައި ރިލީޒް ކުރި ފިލްމް "ވީ އާ ފެމިލީ"ގެ ޑައިރެކްޓަރު ސިދާތު ޕީ މަލޯތުރާއެވެ.
ރާނީ އަށް މިއަހަރު 39 އަހަރު ފުރިފައިވާއިރު އޭނާ ފިލްމު ކުޅުމާ ދުރުވީ ދަރިއަކު ލިބުމުންނެވެ. އޭނާގެ އުފަން ދުވަހު ފޭސްބުކް މެދުވެރިކޮށް ބުނެފައި ވަނީ އޭނާ އަލުން ސްކްރީނަށް އަންނަން ހާސްވެ ހިތްބިރުގެންފައިވާ ކަމަށެވެ.
"އަހަރެން އެނބުރި އަންނަ ފިލްމަށް ކިޔަނީ ހިޗްކީ. އަހަރެން އުއްމީދުކުރަން ހިޗްކީގައި މޮޅު ރޯލެއް އަދާކުރެވޭނެ ކަމަށް. އަދި އެ ފިލްމު ހިތްހަމަ ޖެހޭ ފިލްމަކަށް ވާނެ ކަމަށް. އެންމެންގެ ހެޔޮ ދުއާ ކޮށްދިނުމަށް އެދެން ފިލްމު ކާމިޔާބު ފިލްމަކަށް ވުމަށްޓަކާ،" ރާނީ ފޭސްބުކް މެދުވެރިކޮށް ބުނެފައިވެއެވެ.
ރާނީ އަދިތްޔާ ޗޮޕްރާއާ ކައިވެނި ކުރުމަށް ފަހު އޭނާގެ ދިރިއުޅުމަށް ބޮޑެތި ބަދަލުތަކެއް ގެނެސްފައިވެއެވެ. އޭނާ ކައިވެނި ކުރުމަށް ފަހު އެންމެ ފުރަތަމަ ފެނިފައި ވަނީ 2014 ވަނަ އަހަރު ނިކުތް "މަރްދާނީ" އިންނެވެ. އެ ފިލްމްގައި ވެސް ރާނީ ވަނީ މޮޅު ރޯލެއް އަދާކޮށްފައެވެ. އޭގެ ފަހުން އޭނާ ފިލްމެއް ކުޅެފައެއް ނުވެއެވެ.
