ފުޓްބޯލް ރައިޓާސް އެސޯސިއޭޝަން (އެފްޑަބްލިއުއޭ) ން ހޮވާ އަހަރުގެ އެންމެ މޮޅު ފުޓްބޯޅަ ކުޅުންތެރިޔާގެ އެވޯޑް މުހައްމަދު ސަލާހް އާއި ސޭމް ކާރް ހޯދައިފިއެވެ.
މިއީ ލިވަޕޫލްގެ މުހައްމަދު ސަލާހަށް މި އެވޯޑު ލިބުނު ދެވަނަ ފަހަރެވެ. މީގެ ކުރިން 2018 ވަނަ އަހަރުވެސް އޭނާ ވަނީ މި އެވޯޑު ކާމިޔާބު ކޮށްފައެވެ. މި ސީޒަންގެ ތެރޭގައި ސަލާހް 30 ލަނޑު ޖަހާފައި ވާއިރު، އޭގެ ތެރެއިން 22 ލަނޑު ޖަހާފައި ވަނީ އިނގިރޭސި ޕްރިމިއަރ ލީގުގައެވެ.
މިއީ ޗެލްސީއަށް ކުޅެމުން އަންނަ 28 އަހަރުގެ ސޭމް މި އެވޯޑު ހޯދި ފުރަތަމަ ފަހަރެވެ. އޭނާ ވަނީ ވިމެންސް ސުޕަރ ލީގުގައި 18 ލަނޑު ޖަހާފައެވެ. ލީގުގެ އެންމެ ކުރީގައި އޮތީ ސޭމް ކުޅެމުން އަންނަ ޗެލްސީއެވެ.
މި އެވޯޑާއި ގުޅޭގޮތުން އެފްޑަބްލިއުއޭގެ ޗެއަރ ކެރީ ބްރައުން ބުނީ މި ސީޒަންގައި މި ދެކުޅުންތެރިންގެ ފަރާތުންވެސް ތަފާތު މޮޅު ކުޅުމެއް ފެނިފައިވާ ކަމަށެވެ. އަދި މި ދެކުޅުންތެރިންވެސް ގައުމަށާއި ކްލަބަށް ރެކޯޑުތަކެއް ހަދައިދީފައިވާކަން އޭނާ ފާހަގަކުރިއެވެ. މި ދެކުޅުންތެރިން ދަނޑުމަތީގައި ދައްކާ ކުޅުމުގެ އިތުރުން ފާހަގަ ކުރެވިފައި ވަނީ މޮޅު ލީޑަރުންތަކެއްގެ ގެޮތުގައި ކަމަށްވެސް ބްރައުން ބުންޏެވެ.
