އީދު ބަންދާ ދިމާކޮށް ޕާސްޕޯޓް ހެއްދުން އިތުރުވެއްޖެ
ބުރާސްފަތި ދުވަހު އެކަނިވެސް 329 ޕާސްޕޯޓް ނިންމައި ދޫކޮށްފައިވޭ
އިމިގްރޭޝަންގެ ޕާސްޕޯޓް ޚިދުމަތްދޭ ކައުންޓަރެއް
ކުރިއަށް އޮތް އީދު ބަންދާ ދިމާކޮށް ޕާސްޕޯޓް ހެއްދުން އިތުރުވެފައިވާކަމަށް މޯލްޑިވްސް އިމިގްރޭޝަނުން ބުނެފިއެވެ.
މޯލްޑިވްސް އިމިގްރޭޝަނުން އާންމުކޮށްފައިވާ ތަފާސްހިސާބުތައް ދައްކާގޮތުން ބުރާސްފަތި ދުވަހު އެކަނިވެސް 329 ޕާސްޕޯޓް ނިންމައި ދޫކޮށްފައިވެއެވެ. އަދި 227 ޕާސްޕޯޓް އެންރޯލް ކޮށްފައިވެއެވެ. އިމިގްރޭޝަނުން ބުނީ އީދު ބަންދާ ދިމާކޮށް ޕާސްޕޯޓުގެ ޚިދުމަތް ހޯދާ މީހުންގެ އަދަދު އިތުރުވެފައިވާ ކަމަށެވެ.
އިމިގްރޭޝަނުން ބުނީ، ވީހާވެސް ގިނަ ރައްޔިތުންނަށް ޚިދުމަތް ދިނުމުގެ ގޮތުން ބުރާސްފަތި ދުވަހު އިމިގްރޭޝަންގެ ޕާސްޕޯޓް ޚިދުމަތުގެ ގަޑިވެސް އިތުރުކުރި ކަމަށެވެ. އެގޮތުން އޮފިސަރުން ބުރާސްފަތި ދުވަހުގެ ހެނދުނު 09:00 ހަވީރު 05:00 އަށް އަދި ރޭގަނޑު 08:30ން ރޭގަނޑު 11:30 އަށް ޚިދުމަތް ދީފައިވާކަމަށެވެ.
ކޮވިޑްގެ ބަލި މަޑުކަމާއެކު ގައުމުތައް ބަންދުކޮށްފައި އޮތުމަށްފަހު މި އީދަކީ ފަސޭހަކަމާއެކު ގައުމުތަކަށް ދަތުރުކުރެވޭނެ ޗުއްޓީއެއް ކަމުން ގިނަ ބަޔަކު އަންނަނީ ޗުއްޓީއަށް އެކި ގައުމުތަކަށް ދަތުރު ކުރުމަށް ތައްޔާރުވަމުންނެވެ.
