ފިޠުރު އީދު ބަންދުގައި އައިޖީއެމްއެޗްގެ އޯޕީޑީގެ ހިދުމަތް މެދުކަނޑާލަނީ

ފިޠުރު އީދު ބަންދުގައި އައިޖީއެމްއެޗްގެ އޯޕީޑީގެ ހިދުމަތް މެދުކަނޑާލަން ނިންމައިފިއެވެ.

އައިޖީއެމްއެޗް އިން ކޮށްފައިވާ އިއުލާނެއްގައި ބުނެފައިވަނީ ފިތުރު އީދާއި މެއި މަހުގެ އެއްވަނަ ދުވަހު ފާހަގަކުރާ ބައިނަލްއަގްވާމީ މަސައްކަތްތެރިންގެ ދުވަހާ ގުޅިގެން ސްޕެޝަލިސްޓް އޯޕީޑީ އާއި އެ ހޮސްޕިޓަލްގެ އެހެނިހެން ކްލިނިކް ތަކުގެ ހިދުމަތްތައް ބައެއް ދުވަސްތަކަށް ބަންދުވާނެ ކަމަށެވެ. ނަމަވެސް އަންނަ ހަފްތާގެ އަންގާރަ އަދި ބުދަ ދުވަހު ހެނދުނު 9:00ން ހަވީރު 4:00ށް އޯޕީޑީގެ ހިދުމަތް އާންމު އުސޫލުން ލިބޭނެ ކަމަށް ވަނީ ބުނެފައެވެ.

އޯޕީޑީގެ ޚިދުމަތް ދިނުން މެދުކަނޑާލަން ނިންމާފައިވަނީ ފެށޭ ހަފްތާގެ އާދިއްތަ، ހޯމަ އަދި ބުރާސްފަތި ދުވަހުއެވެ. އެހެންނަމަވެސް އިމަރޖެންސީގެ ޚިދުމަތް ލިބޭނެ ކަމަށް ހޮސްޕިޓަލުން މައުލޫމާތުދެއެވެ.

އައިޖީއެމްއެޗުން މިހެން ނިންމާފައިވާއިރު މިދުވަސްވަރު ޑެންގީހުން ޖެހިގެން ޑޮކްޓަރަށް ދައްކާ މީހުންގެ އަަދަދު އިތުރުވަމުން އަންނާތީ ހެލްތު ޕްރޮޓެކްޝަން އެޖެންސީ (އެޗްޕީއޭ)ން ވަނީ އާންމު ރައްޔިތުން އިތުރަށް ސަމާލުވުމަށް އިލްތިމާސްކޮށްފައެވެ. އެޗްޕީއޭ އިން ނެރުނު ނޫސްބަޔާނުގައި ބުނެފައިވަނީ ކުރިއަށް އޮތް އީދު ޗުއްޓީގައި ގިނަ ބަޔަކު ރަށްރަށަށް ދަތުރުކުރާނެ ކަމަށް ލަފާކުރެވޭތީ ޑެންގީ ފަދަ މަދިރީގެ ޒަރިޔާއިން ފެތުރޭ ބަލިތައް ކޯންޓްރޯލު ކުރުމަށާއި އަދި ބަލި ޖެހިއްޖެ ނަމަ ރައްކާތެރިވުމުގެ ގޮތުން ކުރަން ޖެހޭ ކަންކަމަށް ހާއްސަ ސަމާލުމެއް ދިނުމަށް އިލްތިމާސްކުރާ ކަމަށެވެ.

މަދިރިން ރައްކާތެރިވުމުގެ ގޮތުން ހަށިގަނޑު ރަނގަޅަށް ނިވާވާ ގޮތަށް ހެދުން އެޅުމަށާއި މަދިރި ލޯޝަން އަދި މަދިރި ދުރުކުރުމަށް ބޭނުންކުރާ އެހެންވެސް ބޭސް ބޭނުންކުރުމަށް ބުނެފައިވެއެވެ. ޑެންގީގެ އިތުރުން އަރިދަފުސް ރޯގާ އާއި ވައިރަލްހުން ފަދަ ބަލިތައް އިތުރުވުމުގެ ފުރުސަތު އޮތުމުން އެ ބަލިތަކުން ރައްކާތެރިވުމަށް ވެސް ސަމާލުކަން ދިނުން ވަރަށް މުހިންމު ކަމަށް އެޗްޕީއޭ އިން ބުނެފައިވެއެވެ.