ހުޅުދެލީގައި ކުޑަކުއްޖަކު މޫދަށް ވެއްޓި މަރުވެއްޖެ
މަރުވީ 5 އަހަރުގެ ޖޫދު އަހުމަދު ޝިފާއު
ހުޅުދެލީ: މަރުވީ ފަސް އަހަރުގެ ކުއްޖެއް
ދ ހުޅުދެލީގައި ކުޑަކުޑަ ކުއްޖަކު މޫދަށް ވެއްޓި މަރުވެފައި އޮއްވައި ފެނިއްޖެ އެވެ.
މަރުވެފައި ވަނީ އެރަށު ކުރިނބީގޭ އުމުރުން 5 އަހަރުގެ ޖޫދު އަހުމަދު ޝިފާއުއެވެ.
ރާއްޖެ އެމްވީއަށް މައުލޫމާތ ދެއްވަމުން ހުޅުދެލީ ކައުންސިލްގެ ރައީސް އިސްމާއީލް ނިޒާމް ވިދާޅުވީ އެކުއްޖާ މޫދުގައި މަރުވެފައި އޮއްވާ ފެނުނީ ބުރާސްފަތި ދުވަހު ހަވީރު 4:15 ހާއިރު އެރަށު އުތުރުފަރާތު ބަނދަރު ސަރަހައްދު މޫދުގައި އޮއްވާ ކަމަށެވެ. އަދި ވަގުތުން އޭނާ އެރަށު ސިއްހީ މަރުކަޒަށް ގެންދެވުނު ކަމަށް ނިޒާމް ވިދާޅުވިއެވެ.
ހުޅުދެލީ ސިއްހީ މަރުކަޒުން ބުނީ އޭނާ އެ މަރުކަޒަށް ގެނެވުނު އިރުވެސް ވަނީ މަރުވެފައި ކަމަށާއި ބޭރުފުށުން އެއްވެސް ޒަޚަމެއް ފެންނަން ނެތްކަމަށެވެ. އަދި ބުރާސްފަތި ދުވަހުގެ ރޭ އެ ކުއްޖާ ވަނީ ވަޅުލާފައެވެ.
ކައުންސިލްގެ ރައީސް ވިދާޅުވީ މި ހާދިސާއާ ގުޅިގެން އެކަމުގެ ތަހުގީގަށް ފުލުހުންގެ ޓީމެއް އެރަށުގައި ހަރަކާތްތެރިވަމުންދާ ކަމަށެވެ. ނަމަވެސް ފުލުހުންގެ ބަހެއް އަދި ލިބޭގޮތް ވަނީ ނުވެފައެވެ.
