އެމްޑީޕީގެ ނިންމުންތައް އުސޫލާ ޚިލާފު، އިސްތިއުނާފުކުރާނަން: ފައްޔާޒުގެ ޓީމު
ފައްޔާޒު އިސްމާއީލާ ގުޅޭގޮތުން ނިންމާފައިވާ ނިންމުންތަކަކީ އެމްޑީޕީން އާއްމުކޮށްފައިވާ ގަވާއިދުތަކާއި، އަމަލުކުރަމުންދާ އުސޫލުތަކާވެސް ޚިލާފު ނިންމުންތަކެއް
އެމްޑީޕީގެ ޗެއަރޕަރސަންގެ އިންތިޚާބުގައި ވާދަކުރައްވާ ދެ ކެންޑިޑޭޓުން
އެމްޑީޕީގެ ޗެއަރޕަރސަން ކަމަށް ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއީލުގެ ކެންޕެއިން ޓީމުން، އިންތިޚާބަށް ނުފޫޒު ފޯރުވާކަމަށް ތުހުމަތުކޮށް ހުށައެޅި މައްސަލަތައް ބެލުމަށްފަހު، ނުފޫޒު ފޯރުވާ ދައުލަތުގެ މުދަލާއި ވަސީލަތް ނަހަމަ ގޮތުގައި ބޭނުންކުރާކަމަށް އެމްޑީޕީގެ ކަމާގުޅޭ ކޮމެޓީން ނިންމާފައިވާ ނިންމުން އިސްތިއުނާފުކުރުމަށް ފައްޔާޒުގެ ކެމްޕެއިން ޓީމުން ނިންމައިފިއެވެ.
ފައްޔާޒުގެ "ހިންގާލަން" ކެމްޕެއިން ޓީމުން އެކަމާގުޅިގެން ނެރުނު ބަޔާނެއްގައި ބުނެފައިވަނީ، ފައްޔާޒު އިސްމާއީލާ ގުޅޭގޮތުން ނިންމާފައިވާ ނިންމުންތަކަކީ، އެމްޑީޕީން އާއްމުކޮށްފައިވާ ގަވާއިދުތަކާއި އަމަލު ކުރަމުންދާ އުސޫލުތަކާވެސް ޚިލާފު ނިންމުންތަކެއް ކަމަށެވެ. އަދި އެ ނިންމުންތައް ނިންމާފައިވާ ކޮމެޓީއަކީ އެމްޑީޕީގެ އިންތިޚާބާބެހޭ ގަވާއިދުގެ 46 ވަނަ މާއްދާގައި ބަޔާންކުރާ "އިންތިޚާބުތަކާ ގުޅިގެން ހުށައެޅޭ މައްސަލަތައް ބެލުމަށް، އިންތިޚާބާބެހޭ ކޮމެޓީގެ މެންބަރަކު ހިމެނޭ ގޮތަށް ތިން މެންބަރުންގެ ކޮމެޓީއެއް އިންތިޚާބަށް ކުރިމަތިލުމަށް އިއުލާނުކުރުމާއެކު، އިންތިޚާބާބެހޭ ކޮމެޓީން އުފައްދަންވާނެ" ކަމަށް ބުނާ މާއްދާއާ ޚިލާފަށް އެކުލަވާލާފައިވާ ކޮމެޓީއެއް ކަމަށެވެ.
އަދި ކޮމެޓީން މައްސަލަތައް ބަލާފައިވަނީ އިންތިޚާބާބެހޭ ގަވާއިދުގެ 46 ވަނަ މާއްދާގެ (ށ)ގައި ބަޔާންކުރާ "ކޮމްޕްލެއިންޓްސް ކޮމިޓީއަށް މައްސަލައެއް ހުށަހެޅިއްޖެނަމަ ގިނަވެގެން 48 ގަޑިއިރު ތެރޭގައި އެމައްސަލަ ބަލައި، އެމައްސަލައަކާމެދު ގޮތެއް ނިންމައި، މައްސަލަހުށައެޅި ފަރާތަށް އަންގަންވާނެ" ކަމަށް ބުނާ މާއްދާއާ ޚިލާފަށް ކަމަށްވެސް ބުނެފައިވެއެވެ. "އެމްޑީޕީއަކީ، އަމަލުކުރަންޖެހޭ ގަވާއިދުތައް ވަރަށް ސަރީހަކޮށް ލިޔެ އާއްމުކުރެވިފައިވާ ޕާޓީއެއްކަމަށާއި، އެހެންކަމުން ގަވާއިދުތަކާއި އުސޫލުތަކާ ޚިލާފަށް އެކުލަވާލެވިފައިވާ ކޮމެޓީއަކުން މި ކެމްޕެއިންގެ ކެންޑިޑޭޓުގެ ހައްގުތަކެއް ގެއްލޭ، އަދި ވާދަވެރި ކެންޑިޑޭޓަށް ފަހިވާ ގޮތަށް ނިންމާފައިވާ ނިންމުންތައް މި ކެމްޕެއިނުން ހަރުކަށި އިބާރާތުން ކުށްވެރިކޮށް، އަދި އެ ނިންމުންތައް ބަލައިނުގަންނަކަމަށް "ހިންގާލަން" ކެމްޕެއިން ޓީމުން ނެރުނު ބަޔާނުގައި ބުނެފައިވެއެވެ.
އެ ބަޔާނުގައި ބުނެފައިވަނީ ފައްޔާޒުގެ ކެމްޕެއިން ޓީމުން ގަބޫލުކުރާގޮތުގައި ކޮމެޓީއަށް ހުށަހެޅިގެން ބަލާފައިވާ ޝަކުވާތަކަކީ އިންތިޚާބާގުޅޭ ޝަކުވާތަކެއް ނޫނެވެ. އަދި އެމްޑީޕީގެ ގުނަންތަކުން މި އިންތިޚާބަށް ނުފޫޒު ފޯރުވައި، އިންތިޚާބުގެ ކަންކަން ވަކި ފަރާތަކަށް ފަހިވާ ގޮތަށް ހިންގާކަން ހާމަވާ ކަމަށެވެ. އެހެންކަމުން "ހިންގާލަން" ކެމްޕެއިން ޓީމުގެ ފަރާތުން ޕާޓީގެ ގަވާއިދުތަކާއި އުސޫލުތަކާ ޚިލާފަށް ނިންމާފައިވާ ނިންމުންތައް އިސްތިއުނާފަށް ހުށަހަޅާނެކަމަށް ވަނީ ބުނެފައެވެ.
