ރައީސުލްޖުމްހޫރިއްޔާ ޒުވާން ޓީޓީ ޓީމަށް ހިތްވަރުދެއްވައިފި

އަންނަ މަހު ރާއްޖޭގައި އޮންނަ ސައުތު އޭޝިޔަން ޖޫނިއަރ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕްގައި ވާދަކުރާ ރާއްޖޭގެ ކުޅުންތެރިންނަށް ރައީސުލްޖުމްހޫރިއްޔާ ހިތްވަރުދެއްވައިފިއެވެ. އެމަނިކުފާނު ރާއްޖޭގެ ޒުވާން ކުޅުންތެރިންނަށް ހިތްވަރުދެއްވީ މިއަދު ޓީމްގެ ކުޅުންތެރިންނާ ބައްދަލުކުރައްވާފައެވެ. ރައީސުލްޖުމްހޫރިއްޔާ ރާއްޖޭގެ ޒުވާން އަންހެން އަދި ފިރިހެން ޓީޓީ ޓީމާ ބައްދަލުކުރެއްވީ މިއަދު މެންދުރުފަހު ރައީސުލްޖުމްހޫރިއްޔާގެ އޮފީހުގައެވެ.

ރައީސުލްޖުމްހޫރިއްޔާ ވަނީ މި މުބާރާތުގައި ބައިވެރިވާ ރާއްޖޭގެ އަންހެން ޓީޓީ ޓީމާއި ފިރިހެން ޓީމަށް މަރުހަބާވިދާޅުވެ، މުބާރާތުގައި ކާމިޔާބީއަށް އެދިވަޑައިގަންނަވާފައެވެ. ރައީސުލްޖުމްހޫރިއްޔާ ވަނީ، ޓީޓީއަކީ ރާއްޖޭގައި އިތުރަށް ކުރިއެރުވިދާނެ ކުޅިވަރެއްކަން ފާހަގަކުރައްވައި, ޓީޓީ ކުރިއެރުވުމަށް ބޭނުންވާ ފުރިހަމަ އެއްބާރުލުން ސަރުކާރުން ދެއްވާނެކަމުގެ ޔަގީންކަން ދެއްވާފައެވެ.

މި ބައްދަލުކުރެއްވުމުގައި މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަހުމަދު މަޚްލޫފާއި ޓޭބަލް ޓެނިސް އެސޯސިއޭޝަން އޮފް މޯލްޑިވްސްގެ އިސްވެރިން ބައިވެރިވެވަޑައިގެންނެވިއެވެ. މި ބައްދަލުކުރެއްވުމުގައި މި މުބާރާތުގައި ބައިވެރިވާ ރާއްޖޭގެ ޓީޓީ ޓީމުގެ ޖަރޒީއެއް ވަނީ ރައީސުލްޖުމްހޫރިއްޔާއަށް ވެދުމަށްއަރުވާފައެވެ.

ދެކުނު އޭޝިއާ ސަރަހައްދުގެ 7 ގައުމެއްގެ ޖޫނިއަރ އެތުލީޓުން ބައިވެރިވާ މި މުބާރާތް ކުރިޔަށްދާނީ މެއި މަހުގެ 9ން 12ށް ރާއްޖޭގައެވެ. މުބާރާތުގައި އެތުލީޓުން ބައިވެރިވާ ގައުމުތަކުގެ ތެރޭގައި; ރާއްޖޭގެ އިތުރުން ސްރީލަންކާ، ބޫޓާން، ނޭޕާލް، ބަންގްލަދޭޝް، އިންޑިޔާ އަދި ޕާކިސްތާން ހިމެނެއެވެ. މުބާރާތަށް ރާއްޖޭގެ އަންހެން ޓީމް ތައްޔާރުވަނީ އެންމެ ކުޑަމިނުން ރިހި މެޑެއްޔެއް ހޯދުމަށެވެ. ފިރިހެން ޓީމް އަދި ސީދާ މެޑެއްޔަށް މުބާރާތުގައި ވާދަކުރަން ދެއަހަރެއްވަރު ވާނެކަމަށް ޓީޓީ އެސޯސިއޭޝަންގެ ރައީސް އަލީ ރަޝީދު ވިދާޅުވިއެވެ.