އަންނަ މަހު ރާއްޖޭގައި އޮންނަ ސައުތް އޭޝިޔަން ޖޫނިއަރ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕްގައި ވާދަކުރުމަށް ރާއްޖޭގެ އެއްވަނަ ޓީޓީ ކުޅުންތެރިޔާ ފާތިމަތު ދީމާ އަލީ ޓީމާ ގުޅިއްޖެއެވެ.

ދީމާ ޓީމާ ގުޅެން ބުދަ ދުވަހު މާލެ އައީ ތައިލެންޑްގައި ތިން މަސްދުވަހުގެ ތަމްރީނުތަކެއް ފުރިހަމަކުރުމަށްފަހުއެވެ. މުބާރާތުގައި ދެ ކެޓަގަރީގައިވެސް ދީމާ ވާދަކުރާނެއެވެ. އެއީ 19 އަހަރުން ދަށަށް އަމާޒުކޮށްފައިވާ ޖޫނިއަރ ކެޓަގަރީއާއި, 15 އަހަރުން ދަށަށް އަމާޒުކޮށްފައިވާ ކެޑޭޓް ކެޓަގަރީއެވެ. ދީމާ ރާއްޖެއައިސް ޓީމާ ގުޅުނުއިރު ޒުވާން ޓީމް ތަމްރީނު ހޯދަމުންދަނީ ގްރިސްގެ ކޯޗެއްގެ ބެލުމުގެ ދަށުންނެވެ. ކޯޗާއެކު ޓީމް ޕްރެކްޓިސް ކުރާތާ އަހަރެއްހާ ދުވަސްވެއްޖެއެވެ. ދާދިފަހުން ކްރޮއޭޝިޔާގެ ޖޫނިއަރ ދެ ކުޅުންތެރިންވެސް ރާއްޖެ އައިސް ޖޫނިއަރ ކުޅުންތެރިންނާއެކު މެޗުތަކެއް ދަނީ ކުޅެމުންނެވެ. މިއީ ސީދާ އަންނަ މަހު އޮންނަ މުބާރާތަށް ރާއްޖޭގެ ޒުވާން ކުޅުންތެރިންނަށް މެޗު ތަޖުރިބާ ހޯދައިދިނުމަށް ގެނައި ދެ ކުޅުންތެރިންނެވެ. އަންހެން ޓީމް މުބާރާތަށް ތައްޔާރުވަނީ ސީދާ މެޑަލް ހޯދާށެވެ. ދީމާއާއެކު ޓީމްގައި ލީޑްކުރާ އައިޝަތު ރަފާ ނާޒިމް ބުނީ އަމާޒަކީ އެންމެ ކުޑަމިނުން ރިހި މެޑައްޔެއް ހޯދުންކަމަށެވެ.

ދީމާއަކީ މޯލްޑިވްސް ސްޕޯރޓްސް އެވޯޑްގައި ހޮވި އެންމެ މޮޅު އަންހެން ޓީޓީ ކުޅުންތެރިޔާއެވެ. އަދި ޖޫނިއަރ އެންމެ މޮޅު އަންހެން އެތްލީޓަކީވެސް ދީމާއެވެ. ރާއްޖޭގެ ޤައުމީ ޗެމްޕިއަނަކީވެސް ދީމާއެވެ. ދީމާ ވަނީ 2019 ވަނަ އަހަރުގެ އިންޑިޔަން އޯޝަން އައިލެންޑް ގޭމްސްގެ އަންހެން ސިންގަލްސް ބައިން ރަން މެޑަލް ހޯދާފައެވެ. އަދި 2019 ވަނަ އަހަރު އޭޝިޔަން ޓޭބަލް ޓެނިސް ހޯޕްސް މުބާރާތުން ރިހި މެޑަލް ހޯދިއެވެ. 2018 ވަނަ އަހަރު ސައުތް އޭޝިޔަން ޖޫނިއަރ ޓޭބަލް ޓެނިސް ޗެމްޕިއަންޝިޕްގެ އަންހެން ކެޓަގަރީގެ 12 އަހަރުން ދަށުގެ ބައިންވެސް ދީމާވަނީ ރިހި މެޑަލް ހޯދާފައެވެ. އަދި 2019 ވަނަ އަހަރު ސައުތް އޭޝިޔަން ހޯޕްސް އަންހެން ސިންގަލްސް ޗެމްޕިއަންކަމާއެކު ދީމާ ރަން މެޑަލް ހޯދިއެވެ.

ސައުތް އޭޝިޔަން ޖޫނިއަރ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕް މުބާރާތް އޮންނާނީ އަންނަ މެއި މަހުގެ 9-11 އަށް މާލޭގައެވެ.