ފްރާންސްގެ ޕެރިހުން މިސްރުގެ ކައިރޯ އަށް 2016 ވަނަ އަހަރުގެ މެއި މަހު ދަތުރުކުރަމުން ދަނިކޮށް ވެއްޓުނު އިޖިޕްޓުއެއަރ ގެ ޕެސެންޖަރ ޖެޓް ވެއްޓެން މެދުވަރިވީ ކޮކްޕިޓްގައި ސިނގިރޭޓު ބުއިންމުކަމަށް ތަހުގީގުން ހޯދިފައިވާކަމަށް ރިޕޯޓުތައް ބުނެފިއެވެ.
އޭ320 މަރުކާގެ މި ފްލައިޓް ވެއްޓުމުން އޭރު މިސްރުގެ ސަރުކާރުން ބުނަމުން ދިޔައީ އެއީ ޓެރަރިޒަމްގެ އަމަލެއްގެ ސަބަބުން ހިނގި ހާދިސާއެއް ކަމަށެވެ. ނަމަވެސް މިމައްސަލަ ތަހުގީގު ކުރަމުންދާ ފަރާތްތަކާ ހަވާލާދީ ސްކައި ނިއުސްގައި މައްސަލަ ތަހުގީގުކުރާ ފަރާތްތަކާ ހަވާލާދީ ރިޕޯޓުކޮށްފައިވާގޮތުން މިހާދިސާ ހިނގަން މެދުވެރިވީ ޖެޓް ދުއްވަން އިން ޕައިލެޓަކު ކޮކްޕިޓްގައި ސިނގިރޭޓު ބުއިމުން ހިނގި އަލިފާނުގެ ހާދިސާއެއްގެ ސަބަބުންނެވެ.
އެގޮތުން އަލިފާނުގެ ހާދިސާ ހިނގާފައި ވަނީ ސިނގިރޭޓު ބޮމުންދިޔަ ވަގުތު ކޯޕައިލެޓުގެ މާސްކުން އޮކްސިޖަން ނުކުތުމުގެ ސަބަބުން ކަމަށް ރިޕޯޓުތައް ބުނެއެވެ. އެގޮތުން އެ ޕައިލެޓްގެ މާސްކް އޭގެ ތިން ދުވަސްކުރިން މެއިންޓަނަންސް ނިންމުމަށްފަހު އިނީ އިމަޖެންސީ ސެޓިން އަށް ލެވިފައި ކަމަށާއި މީގެ ސަބަބުން އޮކްސިޖަން ނުކުތްލެއް އިތުރުކަމަށް ވަނީ ފާހަގަކޮށްފައެވެ. އަދި މާސްކު އެގޮތަށް ނަގާފައި ބާއްވާފައި އޮތީ ކީއްވެކަމެއް ނޭގޭ ކަމަށްވެސް މައްސަލަ ތަހުގީގުކުރަ ފަރާތްތަކާ ހަވާލާދީ ރިޕޯޓުކޮށްފައިވެއެވެ.
މީގެ އިތުރުން ކޮކްޕިޓްގެ އޯޑިއޯ ރިކޯޑިން އިން ދެ ޕައިލެޓުންވެސް ވަރުބަލިވެ ނިދިއަންނަކަމުގެ ވާހަކަތައް ދައްކާފައިވާ އަޑު އިވޭކަމަށްވެސް ތަހުގީގަށް ވަނީ ފާހަގަވެފައެވެ.
އިޖިޕްޓުއެއަރގެ ފްލައިޓް އެމްއެސް804 ވެއްޓިފައި ވަނީ މެޑިޓޭރިއަން ކަނޑަށެވެ. މިހާދިސާގައި އެޖެޓުން ދަތުރު ކުރަމުންދިޔަ ފަސިންޖަރުންނާ ކްރޫއިންނާއެކު ޖުމްލަ 66 މީހުން ވަނީ މަރުވެފައެވެ.
މިސްރުގެ ޕައިލެޓުންގެ މެދުގައި ކޮކްޕިޓްގައި ސިނގިރޭޓު ބުއިމަކީ އާންމުކަމެއް ކަމަށްވެސް ރިޕޯޓުގައި ފާހަގަކޮށްފައިވެއެވެ. އެގޮތުން މިފްލައިޓްގެ ކޮކްޕިޓް ގައި ހުރި އަޅިކެނޑި ފްލައިޓް ވެއްޓުމުގެ ދެ މަސް ކުރިން ބަދަލުކޮށްފައިވާ ކަމަށްވެއެވެ.
