ރައީސްގެ ގަރާރު ބާތިލުކުރުމަށް އެދި އިދިކޮޅު ކޯލިޝަނުން ކޯޓަށް
27 އެޕްރީލު 2022 | ބުދަ 08:50ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާތަކާ ވެސް ދެކޮޅު ހަރަކާތެއް
އިންޑިއާ އައުޓް ކެމްޕެއިންގައި ކުރީގެ ރައީސް ޔާމީން ހަރަކާތްތެރިވެވަޑައިގަންނަވަނީ
އިދިކޮޅު ކޯލިޝަނުން ހިންގާ "އިންޑިއާ އައުޓް" ކެމްޕެއިން ހުއްޓުވުމަށް ކަނޑައަޅުއްވައި ރަައީސުލްޖުމްހޫރިއްޔާ އިބްރާހިމް މުހައްމަދު ސާލިހު ނެރުއްވި ގަރާރު ބާތިލުކުރުމަށް އެދި އިދިކޮޅު ކޯލިޝަނުން ސިވިލް ކޯޓަށް ހުށައަޅައިފިއެވެ.
މި މަހުގެ 21ވަނަ ދުވަހު ރައީސް ނެރުއްވި ގަރާރަކީ ގާނޫނާ ޚިލާފަށް ނެރުއްވި ގަރާރެއް ކަމަށާއި، އެ ގަރާރުގެ ސަބަބުން ޚިޔާލު ފާޅުކުރުމުގެ މިނަވަން ކަމަށް ހުރަސްއެޅޭ ކަމަށް އިދިކޮޅުން އަންނަނީ ބުނަމުންނެވެ. އެހެންކަމުން އެގަރާރަކީ ބާތިލު ގަރާރެއް ކަމަށް ކަނޑައަޅައި ދިނުމަށް ސިވިލް ކޯޓަށް އިދިކޮޅުން ހުށައެޅި މައްސަލައިގައިވަނީ ބުނެފައެވެ.
ރައީސްގެ ގަރާރުގައި ބުނެފައިވަނީ, ދިވެހި ސަރުކާރުގެ ސިޔާސަތަކީ، ގާނޫނު އަސާސީން ކަށަވަރުކޮށްދީފައިވާ، ޚިޔާލު ފާޅުކުރުމުގެ މިނިވަންކަމާއި އެއްވެއުޅުމުގެ މިނިވަންކަމަށް ދެވޭނެ އެންމެ ފުޅާމިނެއްގައި ޖާގަދީ، ޑިމޮކްރެޓިކް މުޖުތަމައުތަކުގައި ޢަމަލުކުރަމުންދާ އަސާސްތައް ދެމެހެއްޓުން ކަމަށާއި، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީން ލިބިދީފައިވާ ޚިޔާލުފާޅުކުރުމުގެ މިނިވަންކަމާއި އެއްވެއުޅުމުގެ މިނިވަންކަމުގެ ނާޖާއިޒު ފައިދާ ނަގައި، އިންޑިޔާއާ ދެކޮޅަށް ހިންގާ ކެމްޕޭނަކީ، ދިވެހިރާއްޖޭގެ ސުލްހަމަސަލަސްކަން ނަގާލުމުގެ ނިޔަތުގައި، ދިވެހިރާއްޖެއާއި އިންޑިޔާއާއެކު އޮތް ޒަމާންވީ ބަދަހި ގުޅުމަށާއި، ރާއްޖޭގެ ތަރައްޤީއަށާއި މި ސަރަހައްދުގެ ސަލާމަތާއި ހަމަޖެހުމާއި އަމަންއަމާންކަން ދެމެހެއްޓުމަށް ބައިނަލްއަގުވާމީ ފެންވަރުގައި، ރާވައިގެން ހިންގަމުންގެންދާ ކެމްޕޭނެއް ކަމަށެވެ.
އަދި އިދިކޮޅުން ހިންގާ ހަރަކާތަކީ، ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާތަކާ ވެސް ދެކޮޅު ހަރަކާތެއްކަމަށް ގަރާރުގައި ބުނެފައިވެއެވެ.
ރައީސްގެ ގަރާރު ތަންފީޒުކުރުމުގެ ގޮތުން ފުލުހުން އަންނަނީ މާލޭގެ އެކި ސަރަހައްދުތަކުގައި އިދިކޮޅުން ދަމަމުން އަންނަ އިންޑިއާ އައުޓް ބެނަރތައް ނަގަމުންނެވެ.
