ކޮމަންވެލްތު ގޭމްސްގެ ބީޗް ވޮލީބޯޅައިގައި ވާދަކުރަން ރާއްޖެއަށް ޚާއްޞަ ފުރުޞަތެއް

ކޮމަންވެލްތު ގޭމްސްއަށް ކޮލިފައިނުވިޔަސް ރާއްޖޭގެ ފިރިހެން ބީޗް ވޮލީބޯޅަ ޓީމަށް, ގޭމްސްގައި ވާދަކުރުމަށް ޚާއްޞަ ފުރުޞަތެއް ދީފިއެވެ. ގޭމްސްގައި ވާދަކުރުމުގެ ފުރުޞަތު ރާއްޖެއަށް ދިނީ އެފްއައިވީބީގެ ޚާއްޞަ ދައުވަތެއްގެ ގޮތުގައެވެ.

މިދިޔަ މަހު ސްރީލަންކާގައި އޮތް ކޮލިފައިންގައި ރާއްޖެ ފައިނަލްގައި ސްރީލަންކާ އަތުން ބަލިވުމުން ފުރުޞަތު ގެއްލުނުވެ. ކޮލިފައިވީ ސްރީލަންކާއެވެ. އެކަމަކު މުބާރާތުގައި ވާދަކުރާ ޤައުމުތައް އަންގާރަ ދުވައު ކޮމަންވެލެތް ގޭމްސް ފެޑެރޭޝަނުން އިއުލާންކުރިއިރު ރާއްޖެ ވަނީ ހިމަނާފައެވެ. އެހެންކަމުން އޭވީސީން ސްރީލަންކާގެ އިތުރުން ރާއްޖެއިން ގޭމްސްގައި ވާދަކުރާނެއެވެ. ބީޗް ވޮލީބޯޅަ މުބާރާތުގެ ފިރިހެން ޑިވިޝަންގައި 12 ޤައުމު އަދި އަންހެން ޑިވިޝަންގައިވެސް 12 ޤައުމުން ވާދަކުރާނެއެވެ.

ކޮމަންވެލްތު ކޮލިފައިންގައި ވާދަކޮށް, ސްރީލަންކާ އަތުން ފައިނަލްގައި ބަލިވީ ރާއްޖޭގެ އިސްމާއީލް ސާޖިދު (ކުޑަކާއްޓޭ) އާއި އާދަމް ނަސީމް (އެޑަމް) ގެ ޕެއަރއެވެ. އެކަމަކު ކޮމަންވެލްތް ގޭމްސްއަށް ދާނީ އެޕެއަރކަމެއް އެސޯސިއޭޝަނުން އަދި ނުބުނެއެވެ. އެކަމަކު ބެލެވޭ ގޮތުގައި ބްރެޒިލްގެ ކޯޗު ވިނީޝިއުސް މާޓިން ޖިއޯނީ ފުރުޞަތު ދޭނީ އެދެކުޅުންތެރިންނަށެވެ. ބްރެޒިލްގެ ތަޖުރިބާކާރު ކޯޗާއެކު ރާއްޖެއިން އަންނަނީ ބީޗްވޮލީބޯޅައިގައި ރަނގަޅު މަސައްކަތްތަކެއް ކުރަމުންނެވެ. މިދައުރުގެ ތެރޭގައި އަފްއައިވީބީގެ ރައީސް އަރީ ގްރާސް ރާއްޖެއަށް ކުރެއްވި ދަތުރުފުޅަށްފަހު ރާއްޖެއަށް ގިނަ ފުރުޞަތުތަކެއް އަންނަނީ ލިބެމުންނެވެ. އޭގެތެރޭގައި ދެއަހަރުގެ ކޯޗިންގ ސަޕޯޓް ޕްރޮގްރާމް ހިމެނެއެވެ.

ކޮމަންވެލްތް ގޭމްސް އޮންނާނީ މިއަހަރުގެ ޖުލައި މަހުގެ 28 ން އޮގަސްޓް 8 އަށް އިނގިރޭސިވިލާތުގެ ބާމިންގހަމްގައެވެ.