ރާނީ އެހެން އެއްވެސް ވެރިއަކާއެކު ހިނިފުޅު ވަޑުވާފައިނުވާވަރަށް އަޅުގަނޑާއެކު ހިނިފުޅުވެޑުވި: ޓްރަމްޕް
ޓްރަމްޕް މި މޭރުމުން ވާހަކަފުޅު ދައްކަވާފައިވަނީ ޕިއާސް މޯގަން އަށް ދެއްވި ޚާއްސަ އިންޓަރވިއުއެއްގައި
އިނގިރޭސި ރާނީ އާއި އެމެރިކާގެ ކުރީގެ ރައީސް ޑޮނަލްޑް ޓްރަމްޕް
އެހެން އެއްވެސް ވެރިއަކަށް ބޭއްވުނު ރަސްމީ ފަރިއްކޮޅެއްގައި ހިނިފުޅު ނުވަޑުވާވަރަށް އޭނާއާ އެކު ބޭއްވެވި ފަރިއްކޮޅުގައި އިނގިރޭސި ރާނީ ކުއީން އެލިޒަބަތު ހިނިފުޅުވެޑުވި ކަމަށް އެމެރިކާގެ ކުރީގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. ޓްރަމްޕް ވިދާޅުވީ ރާނީއާއެކު އެބައްދަލުވުން ކަނޑައަޅާފައޮތީ ވިހި މިނެޓަށް ކަމަށާއި ނަމަވެސް އެއްގަޑިއިރަށް ވުރެ ގިނައިރު ވެގެން ދިޔަކަމަށެވެ. އަދި ހީވީ މުޅިރޭ އެކުގައި ވާހަކަ ދައްކަވަން ތިއްބެވުނު ހެން ކަމަށެވެ.
އިނގިރޭސި ރާނީއާ ބައްދަލުވެ ވަޑައިގެންނެވި ފަހަރުގެ ހަނދާންތައް ޓްރަމްޕް ކުރައްވާފައިވަނީ ޕިއަރސް މޯގަންގެ އައު ޝޯ، "ޕިއަރސް މޯގަން އަންސްކޭތްޑް" ލޯންޗް ކުރުމުގެ ތެރޭން ދެއްވި އެކްސްކްލޫސިވް އިންޓަރވިއު އެއްގައެވެ. އެއިންޓަރވިއުގައި ޓްރަމްޕް ވަނީ ޕްރިންސް ހެރީ އާއި އަނބިކަނބަލުން މެގަން މަރކެލް އަށް ވެސް ފާޑުވިދާޅުވެފައެވެ. އަދި އެދެބޭފުޅުންގެ ކައިވެނި ހުތުރުގޮތަކަށް ނިމިގެން ދާނެ ކަމަށް ގަބޫލު ކުރައްވާކަމަށް ވިދާޅުވެފައި ވެއެވެ. ރާނީގެ ފިރިކަލުން ޕްރިންސް ފިލިޕްގެ ހަނދާނުގައި ބޭއްވި ޚާއްސަ އިހްތިފާލެއްގައި ޕްރިންސް ހެރީ ބައިވެރިވެ ވަޑައިގެންފައި ނުވާތީ އެކަމާއި ގުޅޭގޮތުން ވެސް ޓްރަމްޕްވަނީ ވަރަށް ބޮޑަށް ފާޑު ވިދާޅުވެފައެވެ. އަދި އެއީ ހެރީ ކުރެއްވި ވަރަށް ގޯސް ކަމެއްގެ ގޮތުގައި ސިފަކުރައްވާފައި ވެއެވެ.
ޑޮނަލްޑް ޓްރަމްޕް ވަނީ އެތައްފަހަރަކު އިނގިރޭސި ރާނީއާ ބައްދަލުވެ ވަޑައިގަންނަވާފައެވެ. މިގޮތުން ފުރަތަމަ ފަހަރު ބައްދަލު ވެފައިވަނީ 2018 ވަނަ އަހަރުއެވެ. ނަމަވެސް ރާނީ އެހާބޮޑަށް ހިނިފުޅު ވެޑުވި ކަމަށް ޓްރަމްޕް މި ވިދާޅުވީ 2019 އަހަރު ޓްރަމްޕްގެ ޝަރަފުގައި ބަކިންގްހަމް ޕެލަސްގައި ބޭއްވެވި ޚާއްސަ ފަރިއްކޮޅެއްގައެވެ. އެފަރިއްކޮޅުގައި ރާނީ ވާހަކަފުޅު ދެއްކެވީ އެމެރިކާއާއި އިނގިރޭސި ވިލާތާ ދެމެދު އޮތް ތާރީޚީ ގުޅުމާއި ބެހޭ ގޮތުން ކަމަށް ވެއެވެ.
