ވޯރލްޑް ބޭންކުން ސްރީލަންކާއަށް 600 މިލިއަން ޑޮލަރު ދިނުމަށް އެއްބަސްވެއްޖެ

ކޮންމެހެން ބޭނުންވާ ޒަރޫރީ ތަކެތި އިމްޕޯޓްކުރުމުގައި އެހީތެރިވުމުގެ ގޮތުން ވޯރލްޑް ބޭންކުން ސްރީލަންކާއަށް 600 މިލިއަން ޑޮލަރު ދިނުމަށް އެއްބަސްވެއްޖެއެވެ.

ސްރީލަންކާގެ ރައީސްގެ މީޑިޔާ ސެކްޝަނުން ނެރުނު ބަޔާނެއްގައި ވަނީ މިހާރު ސްރީލަންކާއަށް ކުރިމަތިވެފައިވާ އިގްތިޞާދީ އަނދަވަޅުން އަރައިގަތުމަށް 600 މިލިއަން ޑޮލަރު ދިނުމަށް ވޯރލްޑް ބޭންކުން އެއްބަސްވެފައިވާކަމަށެވެ. މީގެތެރެއިން 400 މިލިއަން ޑޮލަރު ވަރަށް އަވަހަށް ދޫކުރާނެކަމަށް ބަޔާނުގައި ބުނެފައިވެއެވެ.

ބަޔާނުގައި އިތުރަށް ބުނެފައިވަނީ ލަންކާގެ އިޤްތިޞާދީ ހާލަތު ރަނގަޅުވަންދެން ވޯރލްޑް ބޭންކުން ލަންކާއަށް އެހީތެރިވެދެމުންދާނެ ކަމަށެވެ.

ލަންކާއަށް 1948 ވަނަ އަހަރު މިނިވަންކަން ލިބުނު ފަހުން ކުރިމަތިވި އެންމެ ބޮޑު އިޤްތިޞާދީ އަނދަވަޅު އެޤައުމަށް ވަނީ ކުރިމަތިވެފައެވެ. މިއާއެކު އެންމެ ބޭނުންވާ ތަކެތި ކަމުގައިވާ ކާނާ އާއި، ބޭހާ ތެލަށް ޚަރަދުކުރާނެވަރަށްވެސް ލަންކާ ސަރުކާރުގައި ފައިސާ ނެތެވެ.

މިމަހުގެ ކުރީކޮޅު ލަންކާއިން ވަނީ އިންޓަރނޭޝަނަލް މަނިޓަރީ ފަންޑު (އައިއެމްއެފް)ގެ އެހީތެރިކަން ހޯދުމަށް ވާހަކަތައް ފަށާފައެވެ.

ލަންކާއަށް އައިއެމްއެފުން އެހީތެރިކަން ފޯރުކޮށްދޭން ނިންމާފައިވާއިރު އެޤައުމަށް މިހާރުވެސް 3 ބިލިއަނާއި 4 ބިލިއަން ޑޮލަރު ހަމައެކަނި އެންމެ ބޭނުންވާ ކަންކަން ފުއްދުމަށްވެސް ބޭނުންވެއެވެ. ލަންކާ ސަރުކާރުން ވަނީ އެކި ޤައުމުތަކާއި އެކި ޖަމިއްޔާތަކުގައި ފައިނޭންޝަލް އެހީތެރިކަން ފޯރުކޮށްދިނުމަށް އެދިފައެވެ.

އިންޑިޔާއިން ވަނީ މިހާރުވެސް 1.9 ބިލިއަން ޑޮލަރުގެ އެހީތެރިކަމެއް ލަންކާއަށް ދީފައެވެ. އަދި މިހާރުވެސް އަންނަނީ 1.5 ބިލިއަން ޑޮލަރު އިތުރަށް ހޯދުމަށް ވާހަކަތައް ދައްކަމުންނެވެ.

ސްރީލަންކާއިން އަންނަނީ ޗައިނާއިން ނަގާފައިވާ ލޯނުތައް އަނބުރާ ދެއްކުމަށް 1 ބިލިއަން ޑޮލަރު ހޯދުމަށް އެޤައުމާއެކުވެސް ވާހަކަދައްކަމުންނެވެ.

ސްރީލަންކާގެ ފިނޭންސް މިނިސްޓަރު ވިދާޅުވީ އޭޝިއަން ޑިވެލޮޕްމެންޓް ބޭންކުގެ އެހީތެރިކަމަށްވެސް އެދޭނެކަމަށެވެ.