ޔުއެފާ ޗެމްޕިއަންސް ލީގުގެ ސެމީ ފައިނަލުގެ ފުރަތަމަ މެޗުގައި ރެއާލް މެޑްރިޑާއި ވާދަކޮށް މެންޗެސްޓަރ ސިޓީ ކުރިހޯދައިފިއެވެ.

މި މުބާރާތް 13 ފަހަރު ކާމިޔާބުކޮށްފައިވާ ރެއާލްގެ މައްޗަށް އަމިއްލަ ދަނޑުގައި ސިޓީން ކުރިހޯދީ 4-3 ންނެވެ. މި މެޗުން ރެއާލް ބަލިވި ނަމަވެސް ޓީމުގެ ކެޕްޓަން ކަރިމް ބެންޒެމާ ވަނީ ތާރީޚުގެ ފަތްފުށްތަކުން ޖާގަ ހޯދާފައެވެ. މި މެޗާއެކު ބެންޒެމާ ވަނީ ރެއާލްއަށް 600 މެޗު ކުޅެދީ އެޓީމަށް ކުރިން ކުޅުނު ޕާކޯ ޚެންޓޯއާއި އަރާ ހަމަކޮށްފައެވެ.

އަންގާރަ ދުވަހުގެރޭ ކުޅުނު މި މެޗުގައި ސިޓީން ލީޑު ނެގީ ފުރަތަމަ ހާފުގެ ދެވަނަ މިނެޓުގައެވެ. މިއީ ކެވިން ޑިބްރައިނާ ކާމިޔާބުކޮށްދިން ލަނޑެކެވެ. އޭގެ އިރުކޮޅެއް ފަހުން ފުރަތަމަ ހާފުގެ 11 ވަނަ މިނެޓުގައި ސިޓީއަށް ލީޑު ފުޅާކޮށްދިނީ ގެބްރިއަލް ޖީސޫސްއެވެ. ރެއާލްއަށް ކުޅުމުގެ ތެރެއަށް ވަދެވުނީ އޭގެ ފަހުންނެވެ. ފުރަތަމަ ހާފު ނިމުމުގެ ކުރިން ބެންޒެމާ ވަނީ ލަނޑެއްޖަހާ ފަރަގު ކުޑަކޮށްދީފައެވެ.

ނަމަވެސް ދެވަނަ ހާފު ފެށިގެން 53 ވަނަ މިނެޓުގައި އަނެއްކާވެސް ސިޓީއަށް ލީޑު ފުޅާކޮށްދިނީ ފިލް ފޯޑެންއެވެ. އެކަމަކު ސިޓީއަށް އެލީޑުގައި އޮވެވުނީ އެންމެ ދެމިނެޓުއެވެ. ކައުންޓަރ އެޓޭކެއްގައި ރެއާލްގެ ވިނީޝިއަސް ޖޫނިއަރ ޖެހި ލަނޑުން އަނެއްކާވެސް ރެއާލްއަށް އިތުރު ހިތްވަރެއް ލިބުނެވެ. އޭގެ ފަހުން ސިޓީގެ ބާނާޑޯ ސިލްވާ ލަނޑެއްޖަހާ އަނެއްކާވެސް ލީޑު ފުޅާކުރިއެވެ. ރެއާލްގެ ފަހު ލަނޑު ބެންޒެމާ ކާމިޔާބުކުރީ ޕެނަލްޓީއަކުންނެވެ. މިއީ ސިޓީގެ ލަޕޯޓް އަތުގައި ބޯޅަ ޖެހުމުން ރެއާލްއަށް ލިބުނު ޕެނަލްޓީއެކެވެ.

މެޗުން ބަލިވި ނަމަވެސް ބެންޒެމާ ވަނީ މެޗުގައި ދެލަނޑު ޖަހާފައެވެ. މި ދެލަނޑާއެކު ބެންޒެމާ ވަނީ މި ސީޒަންގައި 41 މެޗު ކުޅެގެން 41 ލަނޑު ހަމަކޮށްފައެވެ. މިއީ މިހާތަނަށް ބެންޒެމާގެ ފަރާތުން އެންމެ ރަނގަޅު ކުޅުމެއް ފެނުނު ޗެމްޕިއަންސް ލީގެވެ. މިފަހަރުގެ މުބާރާތުގައި ބެންޒެމާ ވަނީ 14 ލަނޑު ޖަހާ އެންމެ ގިނަ ލަނޑުޖަހާފައިވާ ބަޔާން މިއުނިކްގެ ލެވަންޑޮސްކީއާއި ހަމަކޮށްފައެވެ. ބަޔާން މުބާރާތުން ކަޓާފައިވާތީ އިތުރަށް ލަނޑުޖަހާ ފުރަތަމަ ފަހަރަށް މުބާރާތުގެ ރަން ބޫޓޫ ހޯދުމުގެ ފުރުސަތު ބެންޒެމާއަށް އެބައޮތެވެ. ބެލެންޑިއޯއަށް ވާދަކުރާ ބެންޒެމާ ޗެމްޕިއަންސް ލީގުގައި ޖެހި 14 ލަނޑުގެ ތެރެއިން ނުވަ ލަނޑު ޖަހާފައި ވަނީ ނޮކްއައުޓް ސްޓޭޖުގައެވެ. މިއީ ބެލެންޑިއޯ ލިބުމަށް އޭނާއަށް އިތުރު ބާރެކެވެ.

ސީޒަންގައި 14 ލަނޑު ޖެހުމާއެކު ބެންޒެމާ ވަނީ ރެއާލްގައި އެއް ސީޒަނެއްގައި ފަސްވަނައަށް އެންމެ ގިނަ ލަނޑުޖެހި ކުޅުންތެރިޔާއަށް ވެފައެވެ.

ސެމީ ފައިނަލުގެ ދެވަނަ މެޗު ރެއާކްގެ ސެންޓިއާގޯ ބެރްނާބެއުގައި ކުޅޭނީ މެއި މަހުގެ ފަސްވަނަ ދުވަހުއެވެ. މި މެޗުން ދެލަނޑުގެ ތަފާތުން ކުރިހޯދައިގެން ރެއާލްއަށް ފައިނަލުގެ ޖާގައެއް ކަށަވަރު ކުރެވޭނެއެވެ. މެޗުން އެއްވަރުކޮށްގެންވެސް ސިޓީއަށް ފައިނަލަށް ދެވޭނެއެވެ.

މުބާރާތުގެ ދެވަނަ ސެމީ ފައިނަލް އޮންނާނީ ބުދަ ދުވަހުގެ ރޭގައެވެ. މި މެޗުގައި ބައްދަލުކުރާނީ ލިވަޕޫލް އާއި ވިޔަރެއާލްއެވެ.