100،000 ޑޮލަރު ޑިޕޮސިޓްކޮށްގެން، 10 އަހަރަށް ލަންކާގައި އުޅުމުގެ ވިސާ ދެނީ

އިގުތިސާދީ ހާލަތު ގޯސްވެ ބޭރުގެ ފައިސާއަށް އިންތިހާއަށް ބޭނުންވެފައިވާ ލަންކާއިން، އެގައުމުގަައި ދިގު މުއްދަތަކަށް ދިރިއުޅެވޭނެ ވިސާ ވިއްކަން ނިންމައިފިއެވެ.

ބޭރު ފައިސާ ހޯދުމުގެ ވިސްނުމުގައި ލަންކާގެ ސަރުކާރުން ވަނީ "ގޯލްޑެން ޕެރެޑައިސް ވިސާ ޕްރޮގްރާމް"ގެ ނަމުގައި ޚާއްސަ ޕްރޮގްރާމެއް ފަށާފައެވެ.

ލަންކާ ސަރުކާރާ ހަވާލާދީ ބޭރުގެ ނޫސްތަކުން ރިޕޯޓުކޮށްފައިވާ ގޮތުން، ގޯލްޑެން ޕެރެޑައިސް ވިސާ ޕްރޮގްރާމަކީ، 100،000 ޑޮލަރު ޑިޕޮސިޓްކޮށްގެން 10 އަހަރު ދުވަހު ލަންކާގައި ދިރިއުޅެ، މަސައްކަތްކުރުމުގެ ވިސާ ލިބިގެންދާ ޕްރޮގްރާމެކެވެ.

މިކަމާގުޅިގެން ލަންކާ ސަރުކާރުން ނެރުނު ބަޔާނެއްގައި ބުނެފައިވަނީ، ވިސާ ހޯދުމަށް ފައިސާ ޑިޕޮސިޓްކުރަންޖެހޭނީ ލަންކާގެ ބޭންކަކަށް ކަމަށެވެ. އަދި އެ 10 އަހަރަށް އެފައިސާ ހުންނަން ޖެހޭނީ އެ ބޭންކުގައި ކަމަށެވެ.

މި ޕްރޮގްރާމާ ގުޅޭގޮތުން ލަންކާގެ މީޑިއާ މިނިސްޓަރު ނަލަކަ ގޮޑަހެވާ ވަނީ، މި ވިސާ ޕްރޮގްރާމް ކާމިޔާބުކޮށް ކުރިއަށް ގެންދެވިއްޖެނަމަ މިދަނޑިވަޅުގައި އެގައުމަށް ބޭނުންވާ ބޭރު ފައިސާ ހޯދުމަށް ވަރަށް ބޮޑު އެހީއެއް ލިބިގެންދާނެކަން ފާހަގަކުރައްވާފައެވެ.

މީގެ އިތުރުން ލަންކާ ސަރުކާރުން ވަނީ، މަދުވެގެން 75،000 ޑޮލަރު ޚަރަދުކޮށްގެން އެގައުމުން އެޕާޓްމެންޓް ގަންނަ ފަރާތްތަކަށް 5 އަހަރު ދުވަހުގެ ވިސާއެއް ދިނުމަށް ނިންމާފައެވެ.

ލަންކާގެ އިގުތިސާދީ ހާލަތު ގޯސްވެ އެގައުމުގައި ބައެއް ޒަރޫރީ ކާބޯތަކެއްޗާއި ބޭހުގެ އިތުރުން ތެލުގެ ސަޕްލައި ވަރަށް ބޮޑަށް ދަށަށް ގޮސް، އަގުތައް ވަނީ ވަރަށް ބޮޑަށް އުފުލިފައެވެ. މިއާއެކު އާންމު ރައްޔިތުންގެ ތެރެއިން އެތައް މިލިއަން މީހުންގެ ނުރުހުން ސަރުކާރަށް އަމާޒުވެ އެރައްޔިތުން ދަނީ ސަރުކާރުގެ އިސްތިއުފާއަށް ގޮވާލަމުންނެވެ.

ފާއިތުވި ދެ އަހަރުގެ ތެރޭގައި ލަންކާގެ ފޮރިން ރިޒަރވް ވަނީ ވަރަށް ބޮޑަށް ދަށަށްގޮސްފައެވެ. ސަރުކާރުން ނަގަމުންދިޔަ ޓެކްސްތައް މަދުކުރުމާއި، ކޮވިޑް-19ގެ ސަބަބުން ފަތުރުވެރިކަމަށް އައި ލޮޅުމާއެކު ސަރުކާރުގެ އާމްދަނީ ދަށްވެ، ދަރަންޏަށް ސަރުކާރުން ކުރަމުންދިޔަ ހޭދަތަށް ފެންނަން ފެށިއެވެ.

މިއަހަރަށް ލަންކާއިން ދައްކަންޖެހޭ ބޭރުގެ ދަރަނި 7 ބިލިއަން ޑޮލަރަށް އަރާކަމަށް ރިޕޯޓްތައް ބުނެއެވެ. މީގެ ތެރޭގައި ޖުލައި މަހަށް ހަމަވާ 1 ބިލިއަން ޑޮލަރުގެ ލޯނެއްވެސް ހިމެނެއެވެ. މިއީ އެގައުމުން ޗައިނާއަށް ދައްކަން ޖެހޭ ލޯނެކެވެ.

ޗައިނާއިން ނަގާފައިވާ ލޯނުތައް ރީސްޓަރްކްޗަރކޮށްނުދެވޭނެ ކަމަށާއި، އެހެން ނަމަވެސް އެލޯނުތައް ދެއްކުމަށް އިތުރު ލޯނު ދެވޭނެކަމަށް ޗައިނާއިން ވަނީ ބުނެފައެވެ. ޗައިނާއިން މިހާރު ސްރީލަންކާއަށް ދީފައިވާ ލޯނުގެ އަދަދު 11 ބިލިއަން އެމެރިކާ ޑޮލަރަށް އަރާކަމަށް ރިޕޯޓްތައް ބުނެއެވެ.

ޗައިނާއިން މާލީ އެހީތެރިކަން ހޯދުމާބެހޭގޮތުންވެސް މަޝްވަރާތަކެއް ކުރެވުނެވެ. އޭރު މަޝްވަރާ ކުރެވުނީ، މާލީ އެހީއެއްގެ ގޮތުން 2.5 ބިލިއަން އެމެރިކާ ޑޮލަރު ޗައިނާއިން ހޯދުމަށެވެ. އެއީ މި އަހަރުގެ ޖުލައި މަހަށް ހަމަވާ ލޯނާއެކު ދެއްކުމަށް 1 ބިލިއަން ޑޮލަރާއި، ބޭނުންވާ މުދާ ގަތުމަށް 1.5 ބިލިއަން ޑޮލަރުގެ ކްރެޑިޓް ލައިނެކެވެ.

ލަންކާއިން އެހީ ހޯދުމަށް އިންޓަނޭޝަނަލް މަނިޓަރީ ފަންޑު (އައިއެމްއެފް)އާއެކު ކުރިއަށް ގެންދިޔަ މަޝްވަރާތައް ކާމިޔާބު ކަމަށް އެއިދާރާއިން ސިފަކޮށްފައިވާއިރު، ވޯރލްޑް ބޭންކުން ވަނީ ސްރީލަންކާއަށް އެހީވުމަށް އިމަރޖެންސީ އެއިޑް ޕެކޭޖެއް ތައްޔާރުކުރަމުންދާ ކަމަށް ބުނެފައެވެ.

ސްރީލަންކާގެ ފޮރިން މިނިސްޓަރު އަލީ ސަބްރީއާއި ސެންޓްރަލް ބޭންކްގެ ގަވަރުނަރު ހިމެނޭހެން އެގައުމުގެ މަންދޫބުންގެ ޓީމެއް ވަނީ އައިއެމްއެފްއާއެކު މަޝްވަރާކުރުމަށް އެމެރިކާގެ ވޮޝިންގްޓަނަށް ވަޑައިގެންފައެވެ. މިދަތުރުގައި އައިއެމްއެފްގެ އިތުރުން ވޯރލްޑް ބޭންކް އަދި އިންޑިއާއާއެކު ލަންކާއިން ވަނީ މަޝްވަރާތައް ކުރިއަށް ގެންގޮސްފައެވެ.

އައިއެމްއެފުން ވަނީ ސްރީލަންކާއިން އެއިދާރާއާ ގުޅިގެން ގައުމުގެ ދަރަނިތައް ރީސްޓަރަކްޗަރކުރުމާއި އަދާކުރުމުގެ ކަންތައްތައް ކުރަން ނިންމާފައިވާތީ އެކަމަށް މަރުހަބާ ކިޔާފައެވެ. ސްރީލަންކާއިން ވަނީ އެގައުމުން 12 ބިލިއަން ޑޮލަރުގެ ސޮވްރިން ބޮންޑް ރީސްޓްރަކްޗަރކުރަން ވިސްނާކަމަށް ބުނެފައެވެ.

ސްރީލަންކާގެ ފިނޭންސް މިނިސްޓަރު ސަބްރީ ވަނީ އައިއެމްއެފާއެކު ކުރިއަށްދާ މަޝްވަރާތަކުގައި އެކްސްޓެންޑެޑް ފަންޑް ފެސިލިޓީ ޕްރޮގްރާމްގެ ވާހަކަތައް ދެކެވޭ ކަމަށާއި، އެހެންނަމަވެސް އެޕްރޮގްރާމް ހަމަޖެހެންދެން ބްރިޖް ފައިނޭންސިންގެ ގޮތުގައި 3 ބިލިއަނާ 4 ބިލިއަނާ ދެމެދުގެ އަދަދެއްގެ އެހީ ބޭނުންވާކަމަށް ވިދާޅުވެފައެވެ.

އައިއެމްއެފުން ބުނަނީ ސްރީލަންކާއަށް އިތުރު ލޯނުތަކެއް ދެވޭނީ އެގައުމުން މިހާރު ދައްކަން ޖެހިފައި ހުރި ލޯނުތައް އަނބުރާ ދެއްކުން ފަސްކޮށް، ދަރަނި އަދާކުރެވޭނެ ދެމެހެއްޓެނިވި މަގެއް ހަމަޖެހުމުންކަމަށެވެ. މިކަންތައް ކުރުމަށްޓަކައި، ސްރީލަންކާއިން ދަރަނި ދައްކަންޖެހޭ (ޗައިނާފަދަ) ގައުމުތަކާއެކު ގިނަ މަޝްވަރާތަކެއް ކުރަންޖެހޭނެއެވެ.

ވޯރލްޑް ބޭންކްގެ ތަރުޖަމާނާ ހަވާލާދީ ރޮއިޓަރސްއިން ރިޕޯޓުކޮށްފައިވާ ގޮތުގައި، އެބޭންކުން ސްރީލަންކާއަށް ފޯރުކޮށްދޭން ތައްޔާރުވަމުންދާ އިމަރޖެންސީ އެއިޑް ޕެކޭޖަކީ އެޖައްމިއްޔާއިން ކުރިއަށް ގެންދާ ކޮވިޑް-19 ހެލްތު ޕްރިޕެއަރޑްނަސް ޕްރޮޖެކްޓްގެ ފަންޑު ޝިފްޓުކޮށްގެން ދޭން މަސައްކަތްކުރަމުންދާ އެހީއެކެވެ.

ވޯރލްޑް ބޭންކުން ފޯރުކޮށްދޭ އެހީގެ ތެރެއިން 10 މިލިއަން ޑޮލަރު، ސްރީލަންކާއަށް ބޭނުންވާ ޒަރޫރީ ބޭހުގެ ސާމާނު ހޯދުމަށް ބޭނުންކުރެވޭނެކަން ވަނީ ފާހަގަކޮށްފައެވެ. އަދި އެގައުމުގެ ސްކޫލް ކުދިންނަށް ކާބޯތަކެތި ފޯރުކޮށްދިނުމުގެ އިތުރުން، ފަގީރުންނަށް ފައިސާގެ އެހީ ފޯރުކޮށްދިނުމަށްވެސް މި އެހީ ބޭނުންކުރެވޭނެ ކަމަށް އެޖަމްއިއްޔާއިން ފާހަގަކުރެއެވެ.

މީގެ އިތުރުން، ކައްކާ ގޭހާއި ޒަރޫރީ ކާބޯތަކެއްޗާއި ދަނޑުވެރިކަމަށް ބޭނުންވާ ސާމާނު ހޯދުމަށް އެހީތެރިކަން ފޯރުކޮށްދިނުމާ ގުޅޭގޮތުން މަޝްވަރާތައް ކުރިއަށްދާކަމަށް ވޯރލްޑް ބޭންކުން ބުނެއެވެ.

އައިއެމްއެފް އަދި ވޯރލްޑް ބޭންކުން ހޯދުމަށް މަސައްކަތްކުރާ އެހީގެ އިތުރުން އިންޑިއާއިން ބްރިޖް ފައިނޭންސިންގެ ގޮތުގައި 1.5 ބިލިއަން ޑޮލަރުގެ އެހީ ހޯދުމަށް މަސައްކަތްކުރަމުންދާކަމަށް ސްރީލަންކާގެ ފިނޭންސް މިނިސްޓަރު ވަނީ ވިދާޅުވެފައެވެ. މީގެ އިތުރުން ޖަޕާން އަދި އޭޝިއަން ޑިވެލޮޕްމެންޓް ބޭންކްގެ އެހީއަށް ވެސް އެދިފައިވާނެ ކަމަށް އޭނާ ވަނީ ވިދާޅުވެފައެވެ.