ދެން އިންޑިއާ އައުޓް ހަރަކާތް ކުރިއަށްގެންދެވޭނެ ކަމަކަށް ނުބެލެވޭ

އިންޑިއާ އައުޓޭ ކިޔައިގެން އިދިކޮޅުން މަގުމަތީގައި އުޅޭތާ އަހަރަކަށްވުރެ ގިނަދުވަސްވީއެވެ. އެންމެ ފުރަތަމަ ހަރަކާތް ފެށިގެން އައީ ކުޑަކޮށް ނަމަވެސް، ރައީސް ޔާމީން ޖަލުން މިނިވަންވެވަޑައިގަތުމާއެކު ރާއްޖޭގެ ރަށްރަށަށް ވަޑައިގަންނަވަން ފެއްޓެވިއެވެ. އެންމެ ފުރަތަމަ އެމަނިކުފާނުގެ ސަޕޯޓަރުންނާ ބައްދަލުކުރައްވައިވެސް އެކަމަށް ހިތްވަރުދެއްވިއެވެ. އަދި އެއީ ސީދާ އެމަނިކުފާނުގެ އިރުޝާދުގެ ދަށުން ހިންގާ ހަރަކާތެއް ކަމަށް ވިދާޅުވިއެވެ.

މި ހަރަކާތް ހިންގަން ފެށުމުން ސަރުކާރުން މިކަމަށް އެހާ ބޮޑު ސަމާލުކަމެއް ނުދެއެވެ. ހަމައެކަނި އެކަން ކުށްވެރިކޮށް ބަޔާން ނެރެލީއެވެ. ދެންވެސް ބެލީ އަމިއްލައަށް ވިސްނިގެން އެކަން ހުއްޓާތޯއެވެ. އަވައްޓެރި ގައުމަކާ ދެކޮޅަށް ހިންގާ މިފަަދަ ހަރަކާތަކުން ރާއްޖެފަދަ ގައުމަކަށް ލިބޭނެ ގެއްލުން ޚުދު ރައީސް ޔާމީނަށްވެސް އެނގި ވަޑައިގަންނަވާނެއެވެ. އިންޑިއާ އަސްކަރިއްޔާއަށް ރާއްޖޭގައި ޖާގައެއް ނެތްކަމަށް ވިދާޅުވެ، އަތޮޅުތެރޭގެ ރަށްރަށުގައި އިހުތިޖާޖުތައް ކުރިއަށް ގެންދެވިއެވެ. މާލޭގައި ބާއްވަން އުޅުނު އެއްވުން ކުރިއަށް ގެންދިޔުމުގެ ފުރުސަތު ފުލުހުން ނުދިނީ އެ ހަރަކާތުގެ ތެެރެއިން ހަމަޖެހުން ނަގާލަން ރާވާފައިވާކަމަށްބުނެއެވެ. ދެންވެސް ސަރުކާރުން މާބޮޑު ސަމާލުކަމެއް އިދިކޮޅުގެ މިހަރަކާތަށް ނުދެއެވެ.

އެންމެ ފަހުން ރައްޔިތުންގެ މަޖިލީހުގެ 241 ކޮމިޓީއަށް ރައީސް ނަޝީދު ހުށައެޅުއްވީ މި ހަރަކާތުން ރާއްޖޭގެ ސަލާމަތަށް އޮތް ނުރައްކާ ދެނެގަތުމަށް ޚާއްސަ ދިރާސާއެއް ކުރުމަށެވެ. މި ދިރާސާއަށް މައުލޫމާތު ދެއްވުމަށް ވަޑައިގެންނެވި ސަލާމަތީ ޚިދުމަތްތަކާ ބެހޭ ހުރިހާ ބޭފުޅުންވެސް އިއްތިފާގުވާ އެއްކަމަކީ، މިއީ ނުރައްކާތެރި, ގައުމީ ސަލާމަތަށް ނުރައްކާ އޮތް ހަރަކާތެއް ކަމެވެ. މިކަން ހުއްޓުވަންޖެހޭކަމެވެ. އެހެންނަމަވެސް ހުއްޓުވަން ކުރާނެ ކަމެއް އޭރުވެސް ވިދާޅެއްނުވެއެވެ.

މިހެން ކަންތައް ހިނގަމުން އައިސް އެންމެ ފަހުން މާލޭގެ އެކި ހިސާބުތަކުގައި ބެނާ ދަމައި, ފާރުތަކުގައި ލިޔަން ފެށީއެވެ. މާލޭގެ މަލަމަތީގައި ބޮޑު ބެނާއެއް ދެމިއެވެ. ރާޅުގަނޑު ސަރަހައްދުގައި ހުންނަ ރައީސް ޔާމީންގެ އަމިއްލަފުޅު ގޭގައެވެ. މިފަދަ ބެނާތައް މާލޭގެ އެކި ސަރަހައްދުތަކުގައި ދެމުމަށް އިދިކޮޅުން އޮތީ ނިންމާފައެވެ. "އިންޑިއާ އައުޓް" ބެނާ ދެމި މައްސަލާގައި މަޖިލީހުގެ ޖަލްސާގައި ރައީސް ނަޝީދުވެސް ވާހަކަފުޅު ދެއްކިއެވެ. އެމަނިކުފާނު ވިދާޅުވީ އެއީ ކުރެއްވޭނެކަމެއް ނޫންކަމަށެވެ. އެ ކަމަށް ޖާގަ ދެއްވަައިގެން ނުވާނެކަމަށާއި, ސަލާމަތީ ބާރުތަކުން އެ ބެނާތައް ނަގައި، އެކަން ވަގުތުން ވަގުތަށް ހުއްޓުވަންޖެހޭ ކަމަށެވެ.

ބެނާ ދެމިތާ އެއްދުވަސް ފަހުން ފުލުހުންވަނީ އެ ބެނާ ނެގުމަށް ކޯޓު އަމުރު ހޯދާފައެވެ. އަދި އެ އަމުރުގެ ދަށުުން ބެނާ ނެގިއެވެ. ހަމަ އެރޭ ގައުމީ ސަލާމަތާބެހޭ މަޖިލީހުންވެސް ނިންމުމެއް ނިންމިއެވެ. އެއީ އިންޑިއާ އައުޓް ކެމްޕޭނުގެ ސަބަބުން ގައުމީ ސަލާމަތަށް ނުރައްކާވާ ކަމަށެވެ. އެހެންކަމުން އެކަން ހުއްޓުވުމަށް ގަރާރެއް ނެރުއްވިއެވެ.

ގަރާރުގައި ބުނެފައިވަނީ, ދިވެހި ސަރުކާރުގެ ސިޔާސަތަކީ، ގާނޫނު އަސާސީން ކަށަވަރުކޮށްދީފައިވާ، ޚިޔާލު ފާޅުކުރުމުގެ މިނިވަންކަމާއި އެއްވެއުޅުމުގެ މިނިވަންކަމަށް ދެވޭނެ އެންމެ ފުޅާމިނެއްގައި ޖާގަދީ، ޑިމޮކްރެޓިކް މުޖުތަމައުތަކުގައި ޢަމަލުކުރަމުންދާ އަސާސްތައް ދެމެހެއްޓުން ކަމަށާއި، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީން ލިބިދީފައިވާ ޚިޔާލުފާޅުކުރުމުގެ މިނިވަންކަމާއި އެއްވެއުޅުމުގެ މިނިވަންކަމުގެ ނާޖާއިޒު ފައިދާ ނަގައި، އިންޑިޔާއާ ދެކޮޅަށް ހިންގާ ކެމްޕޭނަކީ، ދިވެހިރާއްޖޭގެ ސުލްހަމަސަލަސްކަން ނަގައިލުމުގެ ނިޔަތުގައި، ދިވެހިރާއްޖެއާ އިންޑިޔާއާއެކު އޮތް ޒަމާންވީ ބަދަހި ގުޅުމަށާއި، ރާއްޖޭގެ ތަރައްގީއަށާއި މި ސަރަހައްދުގެ ސަލާމަތާއި ހަމަޖެހުމާއި އަމަންއަމާންކަން ދެމެހެއްޓުމަށް ބައިނަލްއަގުވާމީ ފެންވަރުގައި، ރާވައިގެން ހިންގަމުންގެންދާ ކެމްޕޭނެއްކަމަށް މިގަރާރުގައި ބުނެފައިވެއެވެ.

އެ ގަރާރުގައި ބަޔާން ކުރައްވާފައިވާ ގޮތުގައި، މިއީ އެންމެހާ ބައިނަލްއަގުވާމީ މުއާހަދާތަކާ ވެސް ދެކޮޅު ހަރަކާތެކެވެ.

މި ކެމްޕޭނު ނުހުއްޓުވިއްޖެނަމަ ރާއްޖޭގެ ރައްޔިތުންނަށް ނުރައްކަލެއް ކުރިމަތިވެދާނެ ކަމަށާއި، ފޫނުބެއްދޭނެވަރުގެ ބޮޑު ގެއްލުމެއް ވެސް ލިބިދާނެކަމަށް މި ގަރާރުގައި ވެއެވެ.

އިދިކޮޅުން ބުނަމުން އަންނަނީ މިއީ ބާތިލް ގަރާރެއް ކަމަށެވެ. އަދި މިއީ ޚިޔާލުފާޅުކުރުމުގެ މިނިވަންކަމަށް ހުރަސް އެޅުން ކަމުގައެވެ. އެހެންކަމުން އިންޑިއާއައުޓްގެ ސްޕެލިންގ ބަދަލުކޮށް އަނެއްކާވެސް ބެނާ ދަމަން ފެށީއެވެ. "އިން ޑިއަރ އައުޓް" މިހެން ލިޔެ ދެމި ބެނާތައްވެސް ފުލުހުން ވަނީ ނަގާފައެވެ. އެހެންނަމަވެސް އިދިކޮޅުން ވަނީ "އިންޑިއާ އައުޓް" ހަރަކާތް ނުހުއްޓާނެކަމަށް ބުނެފައެވެ. މާލޭގައާއި އަތޮޅުތެރޭގައިވެސް އިތުރަށް ހަރަކާތް ކުރިއަށްގެންދާނެ ކަމަށް އިދިކޮޅުންވަނީ ބުނެފައެެވެ.

އަނެއްކޮޅުން ރައީސްގެ ގަރާރަކުން މިވަނީ މި ހަރަކާތް ކުރިއަށް ނުގެންދެވޭނެ ކަމަށް ކަނޑައަޅާފައެވެ. މިކަމުން ރާއްޖޭގެ ގައުމީ ސަލާމަތަށް ނުރައްކާއޮތްކަމަށް ކަނޑައަޅާފައެވެ. އެހެންކަމުން މިހަރަކާތަށް ދެން ސަރުކާރުން އެއްވެސް ޖާގައެއް ދޭނެކަމަކަށް ނުބެލެވެއެވެ.