އީލޮން މަސްކަށް 44 ބިލިއަން ޑޮލަރަށް ޓްވިޓަރ ވިއްކަން ނިންމައިފި
26 އެޕްރީލު 2022 | އަންގާރަ 03:23މި ނިންމުން ނިންމާފައިވަނީ ދެ ދުވަހަށް ދެމިގެންދިޔަ ދިގު ބައްދަލުވުންތަކަކަށްފަހު
އީލޮން މަސްކް
44 ބިލިއަން ޑޮލަރަށް ޓްވިޓަރ ގަތުމަށް ބިލިއަނަރު, އީލޮން މަސްކް ހުށަހެޅި ބިޑް ޓްވިޓަރ އިން ބަލައިގަނެފިއެވެ.
މި ނިންމުން ނިންމާފައިވަނީ މަސްކްއާއި ޓްވިޓަރގެ ބޯޑާއި ދެމެދު އާދިއްތަ ދުވަހު ފެށިގެން ހޯމަ ދުވަހަށް ދިގު ދެމިގެންދިޔަ ބައްދަލުވުމަށް ފަހުގައެވެ.
މިމަހުގެ 14 ވަނަ ދުވަހު މަސްކު ވަނީ 43 ބިލިއަން ޑޮލަރަށް ޓްވިޓަރ ގަންނަން ހުށަހަޅާފައެވެ. މި ހުށަހެޅުން ހުށަހަޅާފައިވަނީ ޓްވިޓަރއަކީ ޕްރައިވެޓް ކުންފުންޏަކަށް ހަދައި, އެ ޕްލެޓްފޯމްގެ ބޭނުން އެންމެ ރަނގަޅު ގޮތުގައި ހިފުމުގެ ފުރުސަތު އާންމުންނަށް ދިނުމުގެ ބޭނުމުގައިކަމަށް ބުނެއެވެ.
އެހެންނަމަވެސް ބައްދަލުވުންތަކަށްފަހު 43 ބިލިއަން ޑޮލަރަށް 1 ބިލިއަން ޑޮލަރު ވަނީ އިތުރުކޮށްފައެވެ. އެއީ އިތުރު ޝެއާ ގަތުމަށް އިތުރުކޮށްފައިވާ އެއް ބިލިއަން ޑޮލަރު ކަމަށް ބެލެވޭ ކަމުގަައި މީޑިއާތަކުން ރިޕޯޓުކުރެއެވެ.
މަސްކް ވަނީ ޓްވިޓަރގެ ފުލް ޕޮޓެންޝަލް އޭނާ ދައްކައިދޭނެކަމަށް ބުނެފައެވެ.
އީލޮން މަސްކަކީ މިހާރުވެެސް ދެ ވަނައަށް ޓްވިޓަރގެ އެންމެ ގިނަ ހިއްސާ އޮންނަ ފަރާތެއެވެ. ފޯބްސްގެ އެންމެ ފަހުގެ ތަފާސްހިސާބުތައް ދައްކާގޮތުން އޭނާއަކީ ދުނިޔޭގެ އެންމެ މުއްސަނދި މީހާއެވެ.
ޓްވިޓަރއިން އެކުންފުނީގެ ޑިރެކްޓަރުންގެ ބޯޑަށް ގުޅުމުގެ ފުރުސަތު އީލޮން މަސްކަށް ހުށަހެޅި ނަމަވެސް އޭނާ ވަނީ އެކަމަށް އިންކާރުކޮށް އެކުންފުނި ގަންނަށް ހުށަހަޅާފައެވެ. އެނަލިސްޓުން ފާހަގަކުރާ ގޮތުގައި ބޯޑުން ގޮނޑިއެއް އިޚުތިޔާރުކުރިނަމަ މަސްކްގެ ހިއްސާގެ އަދަދު 15 އިންސައްތައަށް ދަށަށް ދާނެއެވެ.
