މިސަރުކާރުން ޚިޔާނާތްތެރި ނުވާނެ، ނުފޫޒު ނުފޯރުވާނެ، އަނިޔާވެރި ނުވާނެ: ރައީސް އޮފީސް

މި ސަރުކާރުން އެއްވެސް ކަމަކަށް ޚިޔާނާތްތެރިވުމަށް ޖާގައެއް ނުދޭނެ ކަމަށް ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެއްޖެއެވެ.

އަލީ ޒާހިރު މިފަދައިން ވިދާޅުވީ ހޯމަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކުރެއްވި ޓްވީޓަކާ ގުޅިގެން "ރާއްޖެއެމްވީ" އިން ދެންނެވި ސުވާލަކަށް ޖަވާބުދެެއްވަމުންނެވެ. ރައީސް ނަޝީދު ކުރެއްވި ޓްވީޓެއްގައި ވިދާޅުވީ އެމްޑީޕީން އަދި ޚުދު އެމަނިކުފާނުވެސް ބޭނުންފުޅުވަނީ ވަރަށް އާދައިގެ ކަމެއް ކަމަށެވެ. އެއްވެސް ސަރުކާރަކުން ޚިޔާނާތްތެރި ނުވުމަށާއި، އެކަކާ އަނެކަކާ ތަފާތު ނުކުރުމަށާއި، އަނިޔާވެރި ނުވުމަށް ކަމަށެވެ. އެމްއެމްޕީއާރުސީ މައްސަލައާއި ވެންޓިލޭޓަރު މައްސަލަ ބެލުން އެއީ އިތުބާރު ލިބޭނެ ކަންކަން ކަމުގައި އެމަނިކުފާނު ވިދާޅުވިއެވެ.

މިކަމާއި ގުޅިގެން ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވީ މި ސަރުކާރުން ޚިޔާނާތްތެރިވުމަށް ޖާގައެއް ނުދޭނެ ކަމަށެވެ. އެއްވެސް މީހަކާމެދު ތަފާތުކުރުން ނުގެންގުޅޭނެ ކަމަށާއި، އަދި އެއްވެސް މީހަކަށް އަނިޔާވެރި ނުވާނެ ކަމަށެވެ. އަނިޔާވެރިވުމަށް ފުރުސަތުވެސް ނުދެއްވާނެ ކަމަށް އަލީ ޒާހިރު ވިދާޅުވިއެވެ.

އޭނާ ވިދާޅުވީ ކޮންމެ މީހަކާ މެދުވެސް ހުށަހެޅޭ އަދި ތުހުމަތުކުރެވޭ މައްސަލައެއްވިޔަސް އެކަމެއް ބަލައި ތަހުގީގުކުރާނެ ކަމަށެވެ. އެކަން އެގޮތަށް ކުރުމުގެ ބާރު މުއައްސަސާތަކަށް ދީފައިވާނެ ކަމަށް އަލީ ޒާހިރު ވިދާޅުވިއެވެ. އަދި މިއީ ސަރުކާރުން އެއްވެސް ވަރަކަށް ނުފޫޒު ފޯރުވާނެ ކަމެއް ނޫން ކަމަށްވެސް ވިދާޅުވިއެވެ. މިފަދަ ކަމަކަށް ދައުލަތުގެ އެއްވެސް ބާރަކުން އަދި މުއައްސަސާއަކުންވެސް ނުފޫޒު ނުފޯރުވުމަށް ސަރުކާރުން އެދޭ ކަމަށްވެސް އަލީ ޒާހިރު ވިދާޅުވިއެވެ.