ހައިކޯޓުގެ ދެ ފަނޑިޔާރަކު ވަކިކުރުމަށް ޖޭއެސްސީން މަޖިލީހަށް ފޮނުވައިފި
25 އެޕްރީލު 2022 | ހޯމަ 06:31ދެ ފަނޑިޔާރުން ފަނޑިޔާރު ކަމުގެ މަގާމުން ވަކިކުރުމާ މެދު ގޮތެއް ނިންމައި ދިނުމަށް ޖޭއެސްސީންވަނީ އެދިފައި
ހައިކޯޓު
ހައިކޯޓުގެ ފަނޑިޔާރު، އަލްއުސްތާޛް އަބްދުއް ރައޫފް އިބްރާހިމް އަދި އަލްއުސްތާޛް އަބްދުﷲ ހަމީދު ވަކި ކުރުމާމެދު ގޮތެއް ނިންމުމަށް ޖޭއެސްސީން މަޖިލީހަށް ފޮނުވައިފިއެވެ.
މި މައްސަލަ ދިރާސާ ކުރުމަށް ޖުޑިޝަރީ ކޮމިޓީއަށްވަނީ ފޮނުވާފައެވެ. ސަރުކާރުން އާއްމު އުސޫލްތަކުގެ ބޭރުން ދިން ލުއިދަތަކާއެކު އިނާޔާތުގެ ގޮތުގައި ފްލެޓާ ހަވާލުވެފައިވާ މައްސަލަ ޖޭއެސްސީން ބަލައި، މި އަމަލަކީ ގާނޫނުތަކާ ޚިލާފަށް ފަނޑިޔާރުން ހިންގާފައިވާ އަމަލެއްކަން ސާބިތުވާކަމަށް ޖޭއެސްސީން ބުނެފައިވެއެވެ.
ޖޭއެސްސީން މި ދެ ފަނޑިޔާރުންގެ މައްސަލަ ބަލައި ނިންމި ގޮތުގެ ރިޕޯޓުގައި ބުނެފައިވަނީ، ވަކި ފަނޑިޔާރުންތަކަށް ފްލެޓް ދީފައިވަނީ ފްލެޓްގެ އަގުގެ 1 އިންސައްތަފަދަ ޑައުން ޕޭމެންޓްގެ ގޮތުގައި ދެއްކުން ފަދަ މާލީ ލުއިތަކަކާއެކު ކަމަށެވެ. އަދި ފްލެޓް ލިބޭ މީހާ ނުވަަތަ އޭނާގެ އަނބިމިހާ ނުވަތަ ފިރިމީހާގެ ނަމުގައި ގޯއްޗެއް ނެތުން ފަދަ ސަރުކާރުން ފްލެޓް ދިނުމުގައި ބަލާ އާންމު އުސޫލްތަކުގެވެސް ބޭރުން ރައްޔިތުންގެ މަޖިލީހުގެވެސް ދައުރެއް ނެތި، ސީދާ އެ ފަނޑިޔާރުންނަށް ދިން އިނާޔަތެއްގެ ގޮތުގައި ކަމަށާއި، ރައްޔިތުންގެ މަޖިލީހުން ކަނޑައެޅުމަކާ ނުލައި ޤާނޫނު އަސާސީގެ 52ވަނަ މާއްދާއާ ޚިލާފަށް ސީދާ ސަރުކާރުން ހަމަޖައްސައިދިން މި އިނާޔަތާއި، ހައިކޯޓުގެ ފަނޑިޔާރު އަބްދުއްރައޫފް އިބްރާހިމް އަދި އަބްދުﷲ ހަމީދު ހަވާލުވުމަކީ ޤާނޫނޫ އަސާސީގެ 142ވަނަ މާއްދާއާއި ފަނޑިޔާރުންގެ ޤާނޫނޫގެ 2ވަނަ މާއްދާގެ (ށ) އާއި 32ވަނަ މާއްދާގެ (ހ)ގެ 2ވަނަ ނަމްބަރާއި 5ވަނަ ނަމްބަރާއި، 33ވަނަ މާއްދާގެ (ށ)އާއި، ފަނޑިޔާރުންގެ ސުލޫކީ މިންގަނޑުގެ 3.1 އަދި 3.2 އާއި ޚިލާފަށް ކޮށްފައިވާކަމެއް ކަން ސާބިތުވާ ކަމަށެވެ.
މި ދެ ފަނޑިޔާރުން ކޮށްފައިވާކަން ސާބިތުވާ އަމަލަކީ ޤާނޫނު އަސާސީގެ 154ވަނަ މާއްދާގައި ބަޔާންކުރާ ފަނޑިޔާރު ކަމުގެ މަގާމާ އެކަށީގެން ނުވާ އަމަލެއް ކަމަށެވެ. އެހެން ކަމުން މި ދެ ފަނޑިޔާރުން ފަނޑިޔާރު ކަމުގެ މަގާމުން ވަކިކުރުމާ މެދު ގޮތެއް ނިންމައި ދިނުމަށް ޖޭއެސްސީންވަނީ މަޖިލީހުގައި އެދިފައެވެ.
