އަހަރަކު އެއްފަހަރު އަޅުގަނޑުމެންނާ ކުރިމަތިވާ ރަމަޟާން މަހަކީ ހުރިހާ ގޮތަކުންވެސް އެހެން މަސްމަހާ ތަފާތު މަހެކެވެ. ރަމަޟާންމަހު ސިއްހަތު ރަނގަޅު އަދި ފައިދާ ހުރި ގޮތަކަށް އަމަލުތައް ބެހެއްޓިދާނެ ބައެއް ކަންކަމަށް އަލި އަޅުވާލާ ޚަލީޖް ޓައިމްސްގައި ލިޔެފައިވާ ލިޔުމެއްގެ ކުރު ތަރުޖަމާއެއް ގެނެސްދެމެވެ.

އަޅުގަނޑުމެންގެ ތެރެއިން ގިނަ މީހުންނަށް އާންމު މަސްމަހުވެސް ނިދި ވަކި ޝެޑިއުލަކަށް ބެހެއްޓުން އޮންނަނީ ދަތި ކަމަކަށް ވެފައެވެ. ރަމަޟާންމަހަކީ ނިދީގެ ކަންތަކަށް އިތުރަށް އޮޅުން އަރާ މަހެކެވެ. ހާރު ކެއުމަށާއި ދަމު ނަމާދަށް ހޭލާ އުޅެން ޖެހެއެވެ. އަދި ދެން ނިދޭނީ ފަތިސްނަމާދަށް ފަހުއެވެ. އެއްބަޔަކު ދަންވަންދެން ހޭލާތިބެފަ ނިދަނީ ހާރު ކައިގެންނެވެ. ނަމަވެސް އަނެއްކާ ފަތިސްނަމާދަށް ތެދުވަން ޖެހެއެވެ. މިހެން ވުމުން ކުރިން ރޭގަނޑު އާންމުކޮން ނިދާ ވަރަށް ވުރެ ނިދި މަދުވެއެވެ. ނަތީޖާއެއްގެ ގޮތުން ދުވާލުގެ ގަޑިތަކުގައި ވަރުބަލިކަމާއި ކަންނެތްކަން އިހްސާސް ކުރެވެއެވެ.

ރަމަޟާންމަހު އޮފީހުގެ މަސައްކަތު ގަޑި މަދެވެ. މިކަމުގެ ފައިދާ ނަގާ ދުވާލުގެ ކޮންމެވެސް ވަގުތެއްގައި ނިދާލާށެވެ. ކުރު ނެޕެއް ނެގި ނަމަވެސް އެކަމުން މީހާގެ މޫޑަށާއި މަސައްކަތުގެ ނަތީޖާ ނެރެވޭ މިންވަރަށް އެދެވޭ އަސަރު ކުރާނެއެވެ.

ރަމްޟާން މަހު ރޯދަ ވީއްލުމަށާ ތަރާވީހަށް އާއިލީ ބައްދަލުވުންތައް އިންތިޒާމު ކުރަންޖެހި ފައިވާ ލއިރު، ފިޓްކޮށް ތިބުމަށް ކުރަމުން އައި ކަސްރަތު ޕްރޮގްރާމާށް ވަގުތު ނުދެވޭތަން އޮންނަނީ އައިސްފައެވެ. ނަމަވެސް ކަސްރަތާ ހަރަކާތްތެރިވުން ދޫކޮށް ނުލާށެވެ. ރަމަޟާން މަހު މާ ބުރަ ވޯކްއައުޓުތައް ޖެއްސުން އާންމުކޮން އެހާ ބުއްދިވެރިނޫންކަމަށް މާހިރުން ވިދާޅުވެއެވެ. ނަމަވެސް ލުއި ވޯކްއައުޓްތަކާ ހިނގުން ޔޯގާ ހެދުން އަދި ދުވުން ފަދަ ކަސްރަތުތައް ކުރުން މުހިންމެވެ.

ރަމަޟާން މަހު މިކަސްރަތުތައް ކުރަން އެންމެ ރަނގަޅު ގަޑިއަކީ ހެދުނު ހޭލައިގެން އޮފީހަށް ދިއުމުގެ ކުރިން އަދި ވަރަށް ހަވީރުގެ ވަގުތު ތަކުގައެވެ. މިގޮތަށް ކަސްރަތު ކުރާއިރު ހަށިގަނޑުގެ ހާލަތު ދެނެގަތުމަށް ބޭނުން ކުރާ ޚާއްސަ ޑިވައިސެއް ބޭނުންކޮށްގެން ހިތުގެ ހިނގުމާ އެއްޗެހި މޮނީޓަރުކޮށްލުން މުހިންމެވެ. މިފަދަ ފީޗަރުތަކާއެކު ހުންނަ އަތުކުރީ ގަޑިއަކީ މިހާރު ވަރަށް އާންމު އެއްޗެކެވެ.

ރަމަޟާން މަހަކީ އަމިއްލަ ހަޔާތުން މާޒީވެ ގޮސްފައިވާ ބައެއް ކަންކަމާމެދު ވިސްނާލާ ކަންކަމުގެ ހައްލު ހޯދުމަށް ފަސޭހަ މަހެކެވެ. އެހެން މަސްތަކުގައި އުޅެމުން އައި އަވަދިނެތި އުޅުމާ ތަފާތުކޮށް އަމިއްލަކަންކަމަށް ވަގުތު ލިބޭ މަހެއް ގޮތަށް އޮންނަނީ ބެލިފައެވެ. މިފަދަ ހުސް ވަގުތުތަކުގެ ބޭނުންކޮށް ހަޔާތުގައި ހުރި ބައެއްކަހަލަ ސްޓްރެސް ފިލުވާލުމަށް މަސައްކަތްކުރެވި ދާނެއެވެ. މިކަމަށްވެސް އެހީ ވާ އެޕްތައް މިހާރު ހުރެއެވެ. މިގޮތުން މެޑިޓޭޓް ކުރުން ނިދުން އަދި އަރާމު ކުރުމަށް ވެސް އެހީވެދޭ ޚާއްސަ އެޕްތައް މިހާރު ލިބެން ހުރެއެވެ.

ރަމަޟާން މަހަކީ އަޅުކަމުގެ މައްސަރަކަށް ވުމުގެ އިތުރުން ޝުކުރުވެރިވުމާއި ސަދަގާތްކުރުމުގެ ވެސް މައްސަރެވެ.

ކޮންމެއަކަސް މި ރަމަޟާން މަސް މިހާރު މިވަނީ އަޅުގަޑުމެންނަށް އަލްވަދާއު ކިޔުމަށް ގާތްވެފައެވެ. މިވަގުތު ގުނަމުން މިދަނީ ފަހު ދިހައިގެ ދުވަސްތަކެވެ. ހުރިހާ އެންމެންވެސް މަސައްކަތް ކުރަމުންދަނީ ފަހުދިހައިގައި ހިމެނޭ ލައިލަތުލް ޤަދްރި ވިލޭރޭގެ ސަވާބާއި މަންފާ ލިބުމަށެވެ. މިކަމަށް އެދިތިބެ ދުއާކުރާ ހާލު، މިހާރު ފަށާ މިފަދަ ރިވެތި އާދަތައް ރަމަޟާން މަހަށް ފަހުވެސް ކުރިޔަށް ގެންދަމާތޯއެވެ.