ތެދު ބުނުމަކީ ހެޔޮކަންތަކަށް މަގު ދައްކާ ކަމެކެވެ.

ތެދު ބުނުމަކީ ހެޔޮ ބަސް ބުނުމުގެ ތެރޭގައި އެންމެ އިސްކަންދޭންޖެހޭ ކަންތަކެވެ. ﷲ ފިޔަވައި އެހެން އިލާހަކު ނުވާކަމަށް ހެކިވާ ހެކިވުމަކީ، ހެޔޮ ބަސްބުނުމުގެ އެންމެ މަތީ ދަރަޖަކަމުގައި ހިމެނިފައިވަނީ ވެސް އެއްވެސް ޒަމާނެއްގައި އަދި އެއްވެސް ތަނެއްގައި އިންސާނަކަށް ބުނެވޭނެ އެއަށްވުރެ ތެދު ބަހެއް ނެތީމައެވެ.

އާދޭހެވެ. ދުނިޔޭގައިވާ އެންމެ ހަޤީގަތަށް އިގުރާރުވުމުގެ ގޮތުން ބުނާ ބުނުމަކީ، ކީރިތި ރަސޫލާ އާއި އެހެނިހެން ނަބީ ބޭކަލުން ވިދާޅުވެފައިވާ އެންމެ ހެޔޮ ބަސްފުޅު ކަމުގައި ވީހިނދު، ހަގީގަތް ބަޔާންކުރުމުގެ ގޮތުން ބުނާ ކޮންމެ ބަހަކީ، ހެޔޮ ބަހުގެ ތެރެއިންވާ އެއްޗެއް ކަމުގައި އިސްލާމްދީނުގައި ވަނީ ކަނޑައަޅުއްވާފައެވެ. އަދި ތެދު ބުނުމަކީ ތަގުވާވެރިކަމާ ގުޅިފައިވާ، އަދި ތިމާގެ ތަގުވާވެރިކަން ބަޔާންކޮށްދޭ ސިފައެއް ކަމުގައި ވެސް ވަނީ ލައްވާފައެވެ.

މާތްﷲ ވަހީކުރައްވާފައި ވެއެވެ. "يَا أَيُّهَا الَّذِينَ آمَنُوا اتَّقُوا اللَّهَ وَكُونُوا مَعَ الصَّادِقِينَ"

މާނައަކީ: އޭ إيمان ވެއްޖެ މީސްތަކުންނޭވެ! ތިޔަބައިމީހުން اللَّه އަށް تقوى ވެރި ވާށެވެ! އަދި ތެދުވެރިންނާ އެކުގައި، ތިޔަބައިމީހުން ވާށެވެ!

ކީރިތި ރަސޫލާ މުޙައްމަދު ޞައްލަﷲ ޢަލައިހި ވަސައްލަމް ޙަދީޘް ކުރެއްވި ބަސްފުޅެއްގެ މާނާގައިވެއެވެ. ތެދު ބުނުމަކީ، ހެޔޮކަންތަކަށް މަގުދައްކާ ކަމެއް ކަން ކަށަވަރެވެ. އަދި ހެޔޮކަންތައް ކުރުމަޚީ، ސުވަރުގެއަށް މަގުދައްކާ ކަމެއްކަން ކަށަވަރެވެ. އަދި ހަމަކަށަވަރުން ތެދު ބުނާ މީހާ ތެދު ބުނަމުން ގޮސް ﷲގެ ހަޟުރަތުގައި ސިއްދީގަކު ކަމުގައި ލިޔެވިދާ ހުއްޓެވެ.

މިއީ ތެދު ބުނުން އާދަކޮށް، ތެދު ބުނުން މަތީ ދެމިތިބޭ މީހުންނަށް އާޚިރަތް ދުވަހުން އޮތް ދަރަޖައެވެ. އެދުވަހު ސިއްދީގުން ތިބޭހުށީ، ނަބީބޭކަލުންނާއި ޝަހީދުންނާ އެކުގައެވެ.

ނޯޓް: ދީނުގެމަގު މި ނޫހަކީ ރައީސުލްޖުމްހޫރިއްޔާގެ އޮފީހުން 1986ން 2008ށް ނެރުނު ނޫހެކެވެ. މި ނޫސް ނެރުމުގެ ބޭނުމަކީ، އާންމުންގެ މެދުގައި ދީނީ ހޭލުންތެރިކަން އިތުރުކުރުމާއި، އިސްލާމީ އުޚުވަތްތެރިކަމުގެ ރޫހު ފެތުރުމެވެ. މި ނޫސް އޭރު ނެރެފައިވަނީ ހަފްތާއަކު އެއްފަހަރު އެވެ. މި ލިޔުމަކީ ދީނުގެމަގުގައި ލިޔެފައިވާ ލިޔުމެއްގެ ނަކަލެކެވެ.