130 ކިލޯގެ މަސްތުވާތަކެތީގެ މައްސަލަައިގައި ދައުލަތުން ދައުވާކޮށްފައިވާ މީހުންގެ ތެރެއިން އެކަމުގައި އިސްކޮށް އުޅުނުކަމުގެ ތުހުމަތުވާ ދެ މީހުން ބޭސްފަރުވާއަށް ދޫކޮށްލުމަށް ކްރިމިނަލް ކޯޓުން ނިންމި ނިންމުން ދައުލަތުން ހައިކޯޓުގައި އިސްތިއުނާފު ކޮށްފައިވާއިރު، އެ މައްސަލައިގެ އަޑުއެހުމެއް ހައިކޯޓުގައި ކުރިއަށް ގެންގޮސްފިއެވެ.

130 ކިލޯ ޑްރަގް މައްސަލައިގައި އިސްކޮށް އުޅުނުކަމުގެ ތުހުމަތުކޮށް، އެކަމާއި ގުޅޭ ދައުވާ އުފުލާފައިވަނީ ގއ. ވިލިނގިލި، ލައިޓްހައުސް، ޝަހީބް އިބްރާހިމްއާއި، ހއ. ހޯރަފުށި، ވައިލެޓްވިލާ އަހުމަދު މޫސާގެ މައްޗަށެވެ.

އެމީހުން ޝަރީއަތް ނިމެންދެން ބަންދުކޮށްފައި ވަނިކޮށް ބޭސްފަރުވާއަށް 2 މަހަށް ދޫކޮށްލުމަށް ނިންމެވީ 6 އޭޕްރީލް 2022 ގައި ކުރިއަށްދިޔައަޑުއެހުމުގައެވެ.

އެ ނިންމުން ދައުލަތުން އިސްތިއުނާފު ކުރުމުން 17 އޭޕްރީލްގައި ކުރިއަށްދިޔައަޑުއެހުމުގައިދައުލަތުން ވަނީ އެ ދެމީހުން ދޫކޮށްލި މައްސަލަ ދައުލަތުން އިސްތިއުނާފު ކުރާ ސަބަބުތައް ބަޔާންކޮށްފައެވެ. އެގޮތުން ޝަހީބު އިބްރާހިމްގެ ފަރާތުންވެސް އަދި އަހުމަދު މޫސާގެ ފަރާތުންވެސް އަވަސް ފަރުވާދޭން ޖެހޭ ސީރިއަސް ބައްޔެއް ހުރިކަން ފާހަގަކޮށްފައި ނުވާކަމަށް ދައުލަތުގެ ވަކީލާ ވިދާޅުވިއެވެ.

މީގެއިތުރުން، ބޭސްފަރުވާއާއި ގުޅޭގޮތުން ދައްކާނެ އިތުރު ވާހަކައެއް ނެތް ކަމަށާއި، މިހާރު ޙާލު ރަނގަޅު ކަމަށް އަހުމަދު މޫސާގެ ފަރާތުން ބުނެފައިވާއިރު، ޝަހީބު އިބްރާހިމްގެ ފަރާތުން ސިއްޙީ ޙާލަތާއި ގުޅޭގޮތުން ފާހަގަކުރި ކަންބޮޑުވުންތަކާއި ގުޅިގެން ޖަލުގެ ޑޮކްޓަރުންނަށް ދައްކައި، ބޭސްފަރުވާ ފޯރުކޮށްދެވިފައިވާކަމަށް ވަކީލާ ވިދާޅުވިއެވެ.

މީގެއިތުރުން، އެމީހުންގެ މައްސަލައިގައި ހިމެނޭ ހެކިންނަކީ އެމީހުންނާ އެކުގައި އުޅޭ މީހުންކަމަށްވުމާއެކު، ހެއްކަށް ނުފޫޒު ފޯރުވުމުގެ ފުރުސަތުވެސް ބޮޑުކަމަށް ދައުލަތުން ބުނެއެވެ. އެ ދެމީހުން ބަންދުން ދޫކޮށްލަން ޖެހޭފަދަ ޙާލަތެއް ވުޖޫދުވެފައި ނުވާކަމަށް ދައުލަތުގެ ވަކީލާ ވިދާޅުވިއެވެ.

އެ ނުކުތާތަކަށް ޝަހީބުގެ ފަރާތުން ވަނީ ރައްދުވެސް ދީފައެވެ. އެގޮތުން ޝަހީބުގެ ފަރާތުން ހުށައަޅާފައިވާ ޝަކުވާތަކަށް އެކަށީގެންވާ ގޮތެއްގައި ފަރުވާ ފޯރުކޮށްދެވިފައިނުވާކަމަށް އޭނާގެ ވަކީލު ވިދާޅުވިއެވެ. ވަކީލު ވިދާޅުވި ގޮތުގައި ދައުލަތުން އެކަށީގެންވާ ބޭސްފަރުވާ ފޯރުކޮށް ނުދޭކަން ލިޔެކިޔުންތަކުން އެނގެއެވެ.

އޭނާއަކީ ޑިޕްރެޝަނާއި އެންޒައިޓީ ތަހައްމަލު ކުރަމުންދާ ފަރާތެއްކަމަށްވެސް އޭނާގެ ވަކީލު ވިދާޅުވިއެވެ. އޭނާ މީގެ ކުރިން ދަންޖެހުމަށްވެސް މަސައްކަތް ކޮށްފައިވާކަމަށް ޝަހީބުގެ ވަކީލު މަހުފޫޒު ސައީދު ފާހަގަކުރެއްވިއެވެ.

އެއަށްފަހު އަހުމަދު މޫސާގެ ފަރާތުން އިސްތިއުނާފަށް ޖަވާބުދީފައިވާއިރު، އޭނާގެ ފަރާތުންވެސް ވަނީ އެކަށީގެންވާ ގޮތެއްގައި ބޭސްފަރުވާ ފޯރުކޮށްދެވިފައި ނުވާކަމަށް ބަޔާންކޮށްފައެވެ.

އެއަށްފަހު ޚުލާސާ ގޮތެއްގައި ދައުލަތާއި، ދައުވާ ލިބޭ ފަރާތްތަކުންވެސް ވަނީ ވާހަކަދައްކާފައެވެ.

މި މައްސަލައިގެ ބެންޗުގައި މިހާރު ހިމެނިވަޑައިގަންނަވަނީ ފަނޑިޔާރު ހާތިފް ހިލްމީ، ފަނޑިޔާރު ހަސަން ޝަފީއު އަދި އަދި ފަނޑިޔާރު ހުސައިން ޝަހީދުއެވެ.

އާދިއްތަ ދުވަހުގެ އަޑުއެހުމުގައި ރިޔާސަތުގައި އިންނެވި ފަނޑިޔާރު ހުސައިން ޝަހީދު ވަނީ އޭނާގެ ރައުޔު އިއްވަވާފައެވެ. ފަނޑިޔާރު ވިދާޅުވާ ގޮތުގައި ސިއްޙީ ޙާލަތަށް ރިއާޔަތްކޮށް ބަންދުން ދޫކޮށްލެވިދާނެކަން ހައިކޯޓުގެ ގަޒިއްޔާއެއްގައި ބަޔާން ކޮށްފައިވީނަމަވެސް، އެހެން ބަންދުން ދޫކޮށްލުމުގައި ބަލަންޖެހޭ ޝަރުތުތަކެއް އެބަ ހުއްޓެވެ. އެގޮތުން ބަލާއިރު، އަވަސް ފަރުވާދޭން ޖެހޭ ސީރިއަސް ބައްޔެއް ހުރިކަމާއި، ބަންދުގައި ބަހައްޓައިގެން އެކަށީގެންވާ ފަރުވާ ނުދެވޭކަންވެސް އެނގެން ނެތްކަމަށް ފަނޑިޔާރު ވިދާޅުވިއެވެ.

ފަނޑިޔާރު ވިދާޅުވި ގޮތުގައި ކުށުގެ ބާވަތާއި، ކުށުގެ ކުޑަބޮޑު މިނާއި، ކުށް ކޮށްފައިވާ ޙާލަތުގެ އިތުރުން، ހެއްކަށް ނުފޫޒު ފޯރުވަފާނެތޯވެސް ބަލަން ޖެހެއެވެ.

މީގެ އިތުރުން، ސިއްޙީ ފަރުވާ އެކަށީގެންވާ ގޮތެއްގައި ފޯރުކޮށްދެވިފައިނުވޭތޯ ބަލާއިރު، ޝަރީއަތް ނިމެންދެން ބަންދުކޮށްފައިވާ ފަރާތެއް ނުވަތަ އެނޫންވެސް ފަރާތެއްގެ ސިއްޙީ ޙާލަތަށް ބަލައި ބަންދުން ދޫކޮށްލަންޖެހޭ އުސޫލެއް ނެތްކަމަށް ފަނޑިޔާރު ވިދާޅުވިއެވެ.

ބަންދު މުރާޖައާ މަޖިލީހަކީ ކަރެކްޝަންސްގެ މަދަނީ ޒިންމާ އަދާކުރާ މިންވަރު ބަލައި، އެކަމަށް ފަނޑިޔާރު ގޮތް ނިންމަވަންޖެހޭ ފަދަ މަޖިލީހެއް ނޫންކަމަށާއި، އެފަދަ މައްސަލަތަކުގައި އެކި ގާޒީން އެކި ގޮތަށް ނިންމެވުމުގެ ސަބަބުން ތަފާތު ނުކުރުމުގެ ޙައްޤަށްވެސް އުނިކަން އަންނަކަމަށް ފަނޑިޔާރު ވިދާޅުވިއެވެ. ކަރެކްޝަންސްގެ ޒިންމާ އަދާ ނުކުރުމާއި ގުޅޭ މައްސަލަތައް މީގެ ކުރިންވެސް ސިވިލް ކޯޓަށް ހުށައެޅި ބަލާފައިވާކަމަށް ފަނޑިޔާރު ވިދާޅުވިއެވެ.

ވުމާއެކު، ޝަހީބު އިބްރާހިމް ޝަރީއަތް ނިމެންދެން ބަންދުކޮށްފައި ހުއްޓައި އޭނާ ޝަރުތުތަކާއެކު ދޫކޮށްލުމަށް ކްރިމިނަލް ކޯޓުން ނިންމި ނިންމުމަކީ ޝަރުއީ އަދި ޤާނޫނީ އުސޫލުތަކާ ޚިލާފަށް ނިންމާފައިވާ ނިންމުމެއްކަމަށް ވިދާޅުވެ، އެ ނިންމުން ސަސްޕެންޑް ކުރަން ޖެހޭކަމަށް ގާޒީ ނިންމެވިއެވެ. މި ރައުޔަށް ފަނޑިޔާރު ހަސަން ޝަފީއު ވަނީ ތާއީދު ކުރައްވާފައެވެ. ނަމަވެސް އެ ނިންމެވުމަށް ވާސިލުވުމަށް ފާހަގަ ކުރައްވާ ސަބަބު ތަފާތުކަމަށް އޭނާ ވިދާޅުވިއެވެ.

ފަނޑިޔާރު ހަސަން ޝަފީއު ވިދާޅުވި ގޮތުގައި ސިއްޙީ ޙާލަތެއްގެ ސަބަބުންވެސް ބަންދުގައި ހުރި ޙާލަތަށް ބަދަލެއް އައުމުގެ އިހްތިމާލު އެބަ އޮތެވެ. އެފަދަ ސިއްޙީ ޙާލަތެއް ކުރިމަތިވެފައިވާނަމަ ބަންދުގައި ހުރި ޙާލަތަށް ބަދަލު ގެނެވިދާނެކަމަށް ދެކިވަޑައިގަންނަވާކަމަށް އޭނާ ވިދާޅުވިއެވެ. ނަމަވެސް މި މައްސަލައިގައި ވަގުތުން އެމީހުން ދޫކޮށްލަންޖެހޭ ފަދަ އިސްތިސްނާ ސަބަބެއް ފެންނަން ނެތްކަމަށް ފަނޑިޔާރު ވިދާޅުވިއެވެ.

ފަނޑިޔާރު ހާތިފް ހިލްމީވެސް ވަނީ ކްރިމިނަލް ކޯޓުގެ ނިންމުން ރަނގަޅު ނޫންކަމަށް ރައުޔު ނެރުއްވާފައެވެ.