މިއީ ކާބަފައިންނަށްވުރެ އީމާންތެރިކަމާއި ދީންވެރިކަން ބޮޑުވާންޖެހޭ ޒަމާނެއް

ކަލަކު ވޮޑިގެންވާކަމުގެ މައުޟޫޢުއަކީ ކާއިނާތުގައިވާ އެންމެ ބޮޑު ހަޤީޤަތެވެ. ދުނިޔެއާއި ދުނިޔޭގައި ވާހަކަތަކެއްޗަކާއި އިންސާނުންނަށް އެނގޭ އަދި ނޭނގޭކަންކަމަށް ފިކުރުކޮށް ބަލާލުމުން ކަލަކު ވޮޑިގެންވާކަމުގެ ހެކިތައް ފެނެއެވެ.

މިއީ ސައިންސްގެ ޒަމާނެވެ. އައު ހޯދުންތައް ހޯދަމުންދާ، ޢިލްމީ ގޮތުން ކުރިއަރާފައިވާ ޒަމާނެކެވެ. މިފަދަ ޒަމާނެއްގައި އުޅޭއިރު އަޅުގަނޑުމެން ކާބަފައިންނަށްވުރެވެސް އީމާންތެރިކަމާއި ދީންވެރިކަން މާބޮޑުވާންޖެހޭނެއެވެ. ކަލަކު ވޮޑިގެންވާކަން ޔަޤީންކުރަން ކޮންމެހެން ދިރާސާއެއް ހަދަން ނުޖެހެއެވެ. އިންސާނުންނަށް އަތްލެވޭ، ފެންނަ ހިފާގެންގުޅޭ ތަކެތީގެ ތެރެއިން ކަލަކު ވޮޑިގެންވާކަމުގެ ހެކިތައް މާތްﷲ ދައްކަވާފައިވެއެވެ.

މާތްﷲ ވަނީ، ވިސްނާ ފިކުރުކޮށް ކާއިނާތާއި ދުނިޔެއިން ފެންނަ ތަކެއްޗަށް ބަލާ ދިރާސާކުރުމަށް އަންގަވާފައެވެ. އޭގެ ބޭނުމަކީ އެކަލާނގެ ވޮޑިގެންވާކަން އިންސާނާ ޤަބޫލުކުރުމަށްޓަކައެވެ. ކަލަކު ވޮޑިގެންވާކަމުގެ ހެކިތަކުގެ ތެރެއިން ކައުނާއި، އުޑާއި، އުޑުގައިވާހާއެއްޗަކާއި، ބިމާއި ބިމުގައިވާހާ އެއްޗެއް އުފެދުނުގޮތަށް ބަލާލުމުން އެނގިގެންދެއެވެ. އެކަމުންވެސް ކަލަކުވޮޑިގެންވާކަން އެނގިގެންދާ އިރު، އެތަކެތި އުފެދިފައިވަނީ ހަމަ ހުރެފައި ނޫންކަން ހަމަބުއްދިއަށް ވިސްނާލާ ކޮންމެ އިންސާނަކަށް ވެސް އެނގިގެންދާނެއެވެ.

ދީން ޤަބޫލުނުކުރާ މީހުން އެގޮތަށް ޤަބޫލުކުރިކަމުގައި ވިޔަސް، ދުނިޔެއާއި ދުނިޔޭގައިވާ ތަކެތި އުފެދިގެން އައިގޮތާ ބެހޭ ގޮތުން އިންސާނުން އުފައްދާފައިވާ ތިއަރީތަކާއި ދިރާސާތަކަށް ބަލާލި ނަމަވެސް، ކަލަކުވޮޑިގެންވާކަމުގެ ހެކިތައް އެއިން ކޮންމެ ކަމަކުން ދޭހަވެއެވެ.

އިންސާނުންގެ އަޤީދާއާއި ފުށުއަރާ އެތައް އެއްޗެއް، އިންސާނާ ދިރިއުޅެމުންދާ މާޙައުލުން ފެނެއެވެ. ބާޠިލް އަޤީދާތަކާއި ދީންތައް ބުއްދިއާއި ފުށުއަރައެވެ. ކަލަކު ވޮޑިގެންވާކަމަށް ޤަބޫލުނުކުރާ މީހުންގެ މައިގަނޑު ދަލީލަކީ ކަލަކުވޮޑިގެންވާކަމަށް ސައިންޓިފިކް ހެކި ނެތުންކަމަށް އެމީހުން ބުނެއެވެ. ސައިންސަކީ އިންސާނާގެ ހިއްސުތަކަށްކުރެވޭ ތަޖުރިބާތަކުގެ މައްޗަށް ބިނާވެފައިވާ އިންސާނީ ހޯދުންތަކެކެވެ. މާތްﷲ ކީރިތި ޤުރުއާނުގައި، ކަންކަން ބަލާ ހޯދާ އިންސާނާ ޚަލްޤުކުރެއްވި ގޮތާއިމެދު ވިސްނާ ބެލުމަށް އަންގަވާފައިވެއެވެ.

ސައިންޓިފިކް ނަޒަރިއްޔާތަކަކީ ބަދަލުވަމުންދާ އެއްޗެކެވެ. އީމާންވަނީ ސައިންސުން ސާބިތުވާތީ ނޫނެވެ. އިސްރާއާއި މިޢުރާޖުގެ ދަތުރުފުޅަކީ ސައިންސުން އޭގެ ހަޤީޤަތާހަމައަށް ވާސިލްވެވިފައިވާކަމެއް ނޫނެވެ. އިންސާނުން ހަދާ ތިޔަރީތަކަކީވެސް ފުށުއެރުންތައް ހުންނަ ތިއަރީތަކެކެވެ. ބިގްބޭންގ ތިއަރީގައިވެސް ސައިންސްވެރިންނަށް ޖަވާބު ނުލިބޭ އެތައްކަމެއް އެކުލެވިގެންވާކަމެކެވެ.

އެހެންކަމުން މުޅި ކާއިނާތައް ބެލުމުންވެސް ކާއިނާތުގައިވާ ހަމަ ކޮންމެ އެއްޗެއްވެސް އުފެއްދި ފަރާތެއްވާކަމާއި، ދުނިޔެ އުފައްދަވާފައިވާ ފުރިހަމަކަމާއި ބަދަހިކަމުން ދޭހަކޮށްދެނީ މިތަން އުފެއްދެވި ފަރާތުގެ މަތިވެރިކަމާއި ކުޅަދުންވަންތަކަމެވެ. އަދި ކޮންމެ މަޚްލޫޤެއްގެ ކިބައިގައިވެސް ޚާލިޤަކަށް ބޭނުން ޖެހުމުގެ އިޙްސާސްވަނީ ލައްވާފައެވެ.