އީ-ލަރނިންގ ގައިޑްލައިނާ ބެހޭގޮތުން މަޝްވަރާކޮށްފި

މޯލްޑިވްސް ކޮލިފިކޭޝަންސް އޮތޯރިޓީން ތައްޔާރުކޮށްފައިވާ އީ-ލަރނިންގ ގައިޑްލައިނަށް ގެނެސްފައިވާ އިސްލާހުތަކާއެކު, ދިވެހިރާއްޖޭގެ މަތީތަައުލީމުދޭ ޔުނިވަރސިޓީ، ކޮލެޖް އަދި އިންސްޓިޓިއުޓްތަކާ އެ ގައިޑްލައިން ހިއްސާކުރުމަށް އެމް.ކިއު.އޭއިން ސެމިނާރއެއް ބާއްވައިފިއެވެ.

ދިވެހިރާއްޖޭގެ ގައުމީ ޔުނިވަރސިޓީގެ ސެމިނާރ ރޫމްގައި ކުރިއަށްދިޔަ މި ސެމިނާރގައި, މަތީ ތައުލީމު ފޯރުކޮށްދޭ 20 މަރުކަޒަކުން ބައިވެރިވެފައިވެއެވެ. 

ކޮވިޑް-19ގެ ބަލިމަޑުކަމާ ގުޅިގެން ދިވެހިރާއްޖޭގެ މަތީ ތައުލީމުދޭ ޔުނިވަރސިޓީ، ކޮލެޖް އަދި އިންސްޓިޓިއުޓްތަކަށް އެމް.ކިއު.އޭއިން ވަނީ, އެ މަރުކަޒުތަކުން ހިންގަމުން އަންނަ ޕްރޮގްރާމްތައް (ކޮވިޑް-19އާ ގުޅިގެން އައިސްފައިވާ ސިއްހީ ނުރައްކަލުގެ ހާލަތު އުވާލައި އާންމު ހާލަތަށް ބަދަލުވުމާ ހަމައަށް) އީ-ލަރނިންގ ޑެލިވަރީ މޮޑަލިޓީގެ ތެރެއިން ހިންގުމުގެ ޚާއްސަ ހުއްދައެއް ދީފައެވެ.

މޯލްޑިވްސް ކޮލިފިކޭޝަންސް އޮތޯރިޓީން ހާމަކޮށްފައިވާ ގޮތުގައި, އީ-ލަރނިންގ ގައިޑްލައިންގެ ބޭނުމަކީ ފެންވަރު ކަށަވަރުކުރުމާއެކު އީ-ލަރނިންގ ޑެލިވަރީ މޮޑަލިޓީގެ ތެރެއިން ޕްރޮގްރާމްތައް ގެންދާނޭ ގޮތްތަކާއި އީ-ލަރނިންގއަށް ކިޔަވައިދިނުމަށް އެދި މަރުކަޒުތަކުން އެދޭއިރު ކޮންމެހެން ހުންނަން ޖެހޭ ކަންކަން ބަޔާންކޮށްފައިވާ މުހިންމު ގައިޑްލައިނެކެވެ.

މި ސެމިނާރގައި މޯލްޑިވްސް ކޮލިފިކޭޝަންސް އޮތޯރިޓީ ގެ ޗީފް އެގްޒެކެޓިވް އޮފިސަރ ޑރ. އަބްދުލް ހަންނާނު ވަހީދު ވަނީ, ބައިވެރިވެ ވަޑައިގެންނެވި ފަރާތްތަކަށް މި ގައިޑްލައިން ހުށަހަޅުއްވައި ދެއްވައި، މި ގައިޑްލައިނާ ގުޅިގެން ބައިވެރިން ކޮށްފައިވާ މުހިންމު ސުވާލުތަކަށް ޖަވާބު ދެއްވާފައެވެ. އަދި މީގެ އިތުރުން މީގެ ކުރިން ވެސް ވަނީ މި ގައިޑްލައިނަށް މަޝްވަރާ ކުރެވިފައި ކަމަށާއި, ރާއްޖޭގެ މަތީ ތައުލީމުގެ ދާއިރާގެ ތަޖުރިބާކާރުންގެ ލަފަޔާއި އިރުޝާދުވެސް މި ގައިޑްލައިން ހެދުމުގައި ވަރަށް ފުރިހަމައަށް ލިބިފައިވާކަން ޑރ. އަބްދުލް ހަންނާނުގެ ވާހަކަފުޅުގައި ފާހަގަކުރައްވާފައިވެއެވެ.

މިއަދު ބޭއްވުނު ސެމިނާރގައި އެމް.ކިއު.އޭއިން ތައްޔާރުކޮށްފައިވާ އީ-ލަރނިންގ ގައިޑްލައިނަށް މަޝްވަރާ ކުރެވުނުނަމަވެސް، މި ގައިޑްލައިނަށް އަމަލުކުރަން ފަށާނީ އެމް.ކިއު.އޭގެ އެޑްވައިޒަރީ ބޯޑުން އީ-ލަރނިންގ ގައިޑްލައިން ފާސްކޮށް, ދިވެހިސަރުކާރުގެ ގެޒެޓްގައި ޝާއިއުކުރުމުން ކަމަށް އެމް.ކިއު.އޭއިން މައުލޫމާތު ދީފައިވެއެވެ.