ލަންކާގެ ހާލަތާމެދު ކަންބޮޑުވާކަމަށް ވޯރލްޑް ބޭންކުން ބުނެފި

ސްރީ ލަންކާގެ ހާލަތާމެދު ކަންބޮޑުވާކަމަށް ވޯރލްޑް ބޭންކުން ބުނެފިއެވެ.

ވޯލްޑް ބޭންކުން ވަނީ ލަންކާއަށް މިހާރު ކުރިމަތިވެފައިވާ އިގުތިސާދީ ކާރިސާއާމެދު ކަންބޮޑުވާކަން ހާމަކޮށްފައެވެ. ޚާއްސަކޮށް މިކަމުގެ ސަބަބުން އެގައުމުގެ އާންމު ރައްޔިތުންނަށް ލިބެމުންދާ ގެއްލުމާމެދު ކަންބޮޑުވާކަމަށް ވަނީ ބުނެފައެވެ.

ވޯރލްޑް ބޭންކްގެ ދެކުނު އޭޝިއާގެ ނައިބު ރައީސް ހަރޓްވިގް ޝެފަރ ވަނީ ޓްވިޓަރ މެދުވެރިކުރައްވައި, އެބޭންކުން ލަންކާގެ މަސްރަހާ ގުޅޭގޮތުން ހޯދާފައިވާ ހޯދުންތައް ހިއްސާކުރައްވާފައެވެ.

ޝެފަރ ވަނީ ލަންކާގެ މިހާރުގެ ހާލަތާ ގުޅޭގޮތުން ވޯލްޑް ބޭންކުން ވަރަށް ބޮޑަށް ކަންބޮޑުވާކަމަށް ވިދާޅުވެ، އެގައުމަށް އެހީތެރިކަން ފޯރުކޮށްދޭން އެބޭންކުން ތައްޔާރުކަމަށް ވިދާޅުވެފައެވެ. އެގޮތުން ލަންކާއަށް ބޭނުންވާ ޒަރޫރީ ބޭހާއި ބޭސްފަރުވާ ދިނުމަށް ބޭނުންވާ ސާމާނުގެ އިތުރުން, ކާބޯތަކެއްޗާ ތައުލީމާ ގުޅުންހުރި ކަންތައްތަކަށް ބޭނުންވާ އިމަރޖެންސީ އެހީ ފޯރުކޮށްދޭން ވޯރލްޑް ބޭންކުން އޮތީ ތައްޔާރަށް ކަމަށް އޭނާ ވަނީ ވިދާޅުވެފައެވެ.

މީގެ އިތުރުން ލަންކާގެ ފިނޭންސް މިނިސްޓަރު އަދި ސެންޓްރަލް ބޭންކްގެ ގަވަރުނަރު އެމެރިކާއަށް ކުރައްވާ ދަތުރުފުޅުގައި އެބޭފުޅުންނާ ބައްދަލުކުރައްވާފައިވާކަމަށް ޝެފަރ ހާމަކުރެއްވިއެވެ. އަދި މި ބައްދަލުކުރެއްވުމުގައި ގިނަ މަޝްވަރާތަކެއް ކުރެވިފައިވާ ކަމަށާއި, މިއީ ކާމިޔާބު ބައްދަލުވުމެއް ކަމަށް އޭނާ ވަނީ ސިފަކުރައްވާފައެވެ. އެގޮތުން ލަންކާގެ އިގުތިސާދީ ހާލަތު ރަނގަޅުކުރުމަށް އެޅިދާނެ ފިޔަވަޅުތަކާ ގުޅޭ މަޝްވަރާތަކާއި, މިހާރު ގައުމު އޮތް ހާލަތުގެ ސަބަބުން އާންމު ރައްޔިތުންނަށް ކުރިމަތިވެފައިވާ ގޮންޖެހުންތަކަށް އެހީވެވޭނެ ގޮތްތަކާ ގުޅޭ މަޝްވަރާތައް ކުރައްވާފައިވާ ކަމަށް ރިޕޯޓުތައް ބުނެއެވެ.

ލަންކާގެ ފިނޭންސް މިނިސްޓަރު އަދި ސެންޓްރަލް ބޭންކްގެ ގަވަރުނަރު ހިމެނޭހެން އެގައުމުގެ މަންދޫބުންގެ ޓީމެއް ވަނީ ހޯމަ ދުވަހު އެމެރިކާއަށް ވަޑައިގަންނަވާފައެވެ. މިއީ އިންޓަރނޭޝަނަލް މަނިޓަރީ ފަންޑު (އައިއެމްއެފް)އާއެކު މަޝްވަރާ ފެށުމަށް ކުރެއްވި ދަތުރެކެވެ.