އިރާޤުގެ ސަޤާފީ މިއުޒިކް ދިރުވުމުގެ ޙަރަކާތްތައް "މޮސުލް އިންޓަރނޭޝަނަލް މިއުޒިކް ފެސްޓިވަލް" ގަައި މިވަނީ ފަށާފައެވެ. އިރުމަތީ އިރާޤުގެ މޮސުލްގައި ކުރިއަށްދާ މި ޙަރަކާތް ބަލާލުމަށް ގިނަ ބަޔަކު އެއްވެފައިވެއެވެ.

މިއީ ޔުނެސްކޯއާއި، ޔޫރަޕިއަން ޔޫނިއަންގެ އެހީއާއެކު، "އެކްޝަން ފޯރ ހޯޕް" ޖަމިއްޔާއިން އިންތިޒާމުކުރާ ޙަރަކާތެކެވެ. މި ފެސްޓިވަލްގެ މަޤްސަދަކީ ކުރިއަރަމުން އަންނަ މިއުޒިޝަނުންނަށް ހިތްވަރު ދިނުމާއި، މިއުޒިކް ބޭންޑުތަކުގެ ގުޅުން ބަދަހި ކުރުން ކަމަށް އެ ޖަމިއްޔާގެ ޑިރެކްޓަރ ބަސްމާ އަލް ހުސައިނީ ރޮއިޓަރސްއާ ވާހަކަދައްކަވަމުން ވިދާޅުވެފައިވެއެވެ.

ފާއިތުވެ ދިޔަ ދުވަސްތަކުގައި ގިނަ މިއުޒިޝަނުން ވަނީ މޮސުލްގައި ޓްރެއިނިންގ ހޯދައިި، އައު ގްރޫޕުތައްވެސް އުފައްދާފައެވެ. އެގޮތުން މި ފަހުންވެސް 4 މިއުޒިކް ގްރޫޕެއް ވަނީ އުފައްދާފައެވެ. އެ ގްރޫޕުތަކުން ވަނީ މި ފެސްޓިވަލްގައި ހުށައެޅުންތައް ހުށައަޅައިދީފައެވެ.

މި ފެސްޓިވަލްގައި އެކި ޤައުމުތަކުގެ ހުށައެޅުންތައް ހުށައަޅަމުންދާއިރު، އެންމެ ފާހަގަކޮށްލެވޭ ކަމަކީ ކޮންމެ ގްރޫޕަކުންވެސް އެ ޤައުމެއްގެ ތާރީޚާއި ސަޤާފަތް ދިރުވޭނެފަދަ ހުށައެޅުންތައް ހިމަނަމުންދާކަން ކަމަށް ބަސްމާ ވިދާޅުވިއެވެ. އެގޮތުން އިރާޤުންވެސް ވަނީ "ސީރިއަކް"، "ޓާރްކްމަން"، ފަދަ ސަޤާފީ ރާގުތައް ހުށައަޅައިދީފައެވެ. މިއީ އެ ޤައުމުގެ ކައިވެނި ޙަފްލާތަކާއި ބޮޑެތި ޙަފްލާތަކުގައި މަޝްހޫރު ރާގުތަކެވެ.

އޭނާ ބުނި ގޮތުގައި ފެސްޓިވަލްގެ ބައިވެރިންނަށް ރަނގަޅު ތަމްރީނު ދީ، މި މަސައްކަތަށް މަގުފަހިކޮށްދިނުމަކީ އެ ޖަމިއްޔާގެ މަޤްސަދެކެވެ.

މި ޙަރަކާތުގެ ބައިވެރިން ބުނެފައިވަނީ، މިއީ ކޮންމެ އަހަރަކުވެސް ބާއްވަން ރަނގަޅު ޙަރަކާތެއް ކަމަށެވެ. އެގޮތުން އެތައް އަހަރެއް ވަންދެން ހަނގުރާމައާއި، އަޅުވެތިކަން ތަހައްމަލު ކުރަމުން އައި އިރާޤު ރައްޔިތުންނަށްވެސް މިއީ ހިތްހަމަޖެހިލައި، ސަޤާފަތް ދިރުވަން ލިބޭ ވަގުތުކޮޅެއްކަމަށް ޙަރަކާތުގެ ބައިވެރިން ބުނެއެވެ.