ކޮވިޑް-19 ގެ ޙާލަތަށް ބަލައި އާސަންދައިން ދީފައިވާ ލުއިތައް އުވާލުމަށް އެ ކުންފުނިން ނިންމައިފިއެވެ.
އާސަންދައިން ބުނީ، ކޮވިޑް-19 އާއި ގުޅިގެން ދިވެހިރާއްޖޭގައި އިޢުލާނު ކުރެވުނު ސިއްޙީ ކުއްލި ނުރައްކަލުގެ ޙާލަތު އުވާލުމާ ގުޅިގެން، އާސަންދަ ސްކީމްގެ ދަށުން ޚިދުމަތް ހޯދުމުގައި ޢާއްމު ރައްޔިތުންނަށް ދިމާވެފައިވާ ދަތިތައް ޙައްލުކުރުމުގެ ގޮތުން އެހާލަތުގައި ދެވިފައިވާ ލުއިތައް އުވާލެވިފައިވާ ކަމަށެވެ.
ވުމާއެކު، ކުރިން އާސަންދަ ސްކީމްގެ ދަށުން ޚިދުމަތް ފޯރުކޮށްދެވެމުން ގެންދެވުނު ގޮތަށް، ސްކީމްގެ ޚިދުމަތްތައް ބަދަލުކުރެވިފައިވާ ކަމަށް ކުންފުނިން ބުނެއެވެ.
އާސަންދައިން ވަނީ މިހާރު ގެނެވިފައިވާ ބައެއް ބަދަލުތައްވެސް ހިއްސާކޮށްފައެވެ. އެގޮތުން އޮންލައިން ކޮންސަލްޓޭޝަންގެ ޚިދުމަތް ފޯރުކޮށްދެވޭނީ ހަމައެކަނި "ވިނަވި" ޕޯޓަލް މެދުވެރިކޮށް ޚިދުމަތް ފޯރުކޮށްދޭ މަރުކަޒުތަކުން އެކަނިކަމަށް ކުންފުނިން މައުލޫމާތު ދެއެވެ.
އޭގެ އިތުރުން، އޮންލައިން ކޮންސަލްޓޭޝަންގެ ތެރެއިން ބަލިމީހާއަށް އިތުރު އެއްވެސް ޚިދުމަތެއް ނަގަން ރިކުއެސްޓް ކުރާނަމަ، އެ ރިކުއެސްޓެއް އިންނަންވާނީ "ވިނަވި" ޕޯޓަލްގެ ތެރެއިން ފޮނުވިފައި ކަމަށް އާސަންދައިން ބުނެއެވެ. އެގޮތުން "ވިނަވި" ޕޯޓަލްއިން ރިކުއެސްޓު ކުރެވިފައި ނުވާ ސަރވިސްއަކަށް ޚިދުމަތެއް ނުދެވޭނެކަންވެސް ކުންފުނިން ފާހަގަ ކުރެއެވެ.
ދިގުމުއްދަތަކަށް ބޭސްކުރަންޖެހޭ ބަލިތަކަށް ބޭސްފަރުވާ ކުރާ ފަރާތްތަކަށްވެސް ކުރިން ޚިދުމަތް ފޯރުކޮށްދެމުން ދިޔަ ގޮތަށް، ކޮންމެ ބޭސް ސިޓީއަކަށްވެސް ބޭސް ދޫކުރެވޭނީ އެއްފަހަރުކަމަށް ކުންފުނިން ބުނެއެވެ. އަދި އަލުން ބޭސް ނަަގަން ޖެހޭނަމަ، އައު ބޭސްސިޓީއެއް ހޯދަންޖެހޭނެކަން ވަނީ ބަޔާން ކޮށްފައެވެ.
