މުޒާހަރާގައި މީހަކު މަރުވެފައިވާތީ، އެކަން ތަހުގީގުކުރާނަން: ރައީސް ގޮތަބަޔާ

ސްރީލަންކާގައި އެގައުމުގެ ސަރުކާރާ ދެކޮޅަށް ކުރިއަށްގެންދާ މުޒާހަރާތަކުގެ ތެރެއިން ހިނގި ހަމަނުޖެހުންތަކުގެ ތެރޭގައި މީހަކު މަރުވެފައިވާތީ, އެކަމުގެ ތަހުގީގެއް ފުލުހުން ފަށާނެކަމަށް ލަންކާގެ ރައީސް ގޮތަބަޔާ ރާޖަޕަކްސް ވިދާޅުވެެއްޖެއެވެ.

ގޮތަބަޔާ ވަނީ ބުދަ ދުވަހު، މިކަމާ ގުޅިގެން އިންސާފުވެރި ދެފުށްފެންނަ ތަހުގީގެ އެގައުމުގެ ފުލުހުން ފަށާނެކަމަށް ވިދާޅުވެފައެވެ.

އަންގާރަ ދުވަހު, ލަންކާގެ ވެރިރަށް ކޮލޮމްބޯގެ އިރުއުތުރުން އޮންނަ ރަމްބުއްކަންނާ އަވަށުގައި ކުރިއަށް ދިޔަ މުޒާހަރާ ހޫނުވެ, މުޒާހަރާގެ ބައިވެރިންނާ ފުލުހުންނާ ދެމެދު ހިނގި ކުރިމަތިލުން ތަކުގައި ފުލުހުން ވަނީ ބަޑީގެ ހަމަލާތައް ދީފައެވެ. މިހަމަލާތަކުގައި ގިނަ އަދަދެއްގެ ބަޔަކަށް އެކި ވަރުގެ އަނިޔާ ލިބިފައިވާއިރު، އެކަކު ވަނީ މަރުވެފައެވެ.

ރިޕޯޓުތައް ބުނާ ގޮތުގައި ބަޑީގެ ހަމަލާތައް ދޭން ފަށާފައިވަނީ މުޒާހަރާގެ ބައިވެރިން ރެއިލްވޭ ލައިނެއް ބަންދުކޮށް އެތަނުން ދަތުރުކުރަން މަސައްކަތްކުރި ތެޔޮ ޓޭންކަރަކަށް ހުރަސްއެޅުމުންނެވެ.

ލަންކާއަށް ދިމާވެފައިވާ އިގުތިސާދީ ކާރިސާއާއެކު އެގައުމުގެ އެތައް މިލިއަން ރައްޔިތުންނެއް ދަނީ މަގުތަކަށް ނުކުމެ ސަރުކާރާ ދެކޮޅަށް މުޒާހަރާ ކުރަމުންނެވެ.

ރައީސް ގޮތަބާޔާ ވަނީ ލަންކާ ރައްޔިތުން ޚިޔާލުފާޅުކޮށް ސުލްހަވެރި އިހުތިޖާޖުތައް ކުރުމުގެ ހައްގު ނިގުޅައިނުގަންނަވާނެކަމަށް ވިދާޅުވެ ޓްވީޓް ކުރައްވާފައެވެ. އަދި ރަމްބުއްކަންނާގައި ހިނގާދިޔަ ކަންތައްތަކަކީ ވަރަށް ހިތާމަވެރި ކަންތައްތައް ކަމަށާއިި އެކަންތައް އިންސާފުވެރިކަމާއެކު ދެފުށްފެންނަގޮތަށް ތަހުގީގުކުރާނެކަމަށް ވިދާޅުވިއެވެ.

ލަންކާގެ ފުލުހުންގެ ތަރުޖަމާނު އަޖިތު ރޯހަނާ ވަނީ, މިހާދިސާ ތަހުގީގުކުރުމަށް 20 މެމްބަރުންގެ ޓީމެއް އެކުލަވާލާފައިވާކަމަށް ވިދާޅުވެފައެވެ. މިހާތަނަށް މިކަމާގުޅިގެން އެކަކު ހައްޔަރުކޮށްފައިވާކަމަށް އޭނާ ވިދާޅުވެއެވެ.

މިހާދިސާގައި މަރުވި އުމުރުން 41 އަހަރުގެ ކޭ.ޑީ ޗަމިންދާ ލަކްޝަންއަކީ މުޒާހަރާގެ ބައިވެރިއެއް ނޫންކަމަށާއި, އޭނާ އެހަމަނުޖެހުންތަކުގެ މެދުގައި ތާށިވީ ރަމްބުއްކަންނާގެ ޕެޓްރޯލް ސްޓޭޝަނަށް އޭނާގެ ސައިކަލަށް ޕެޓްރޯލް އަޅަން ގޮސް އުޅެނިކޮށްކަމަށް އޭނާގެ އާއިލާއިން ބުނެއެވެ. ޗަމިންދާ ލަކްޝަންގެ އަންހެން ދަރިފުޅު ވަނީ އޭނާގެ ބައްޕަގެ މަރަށް އިންސާފު ހޯދަން ބޭނުންވާކަމަށް ބުނެފައެވެ.

އަންގާރަ ދުވަހު ހެދުނުންފެށިގެން ކުރިއަށްދިޔަ މުޒާހަރާގައި ރޭލު ދަތުރުކުރާ މަގު ބަންދުކުރުމާގުޅިގެން, މީހުން ދުރަށް ޖެއްސުމަށް ފުލުހުން އާންމުންނާ ދިމާލަށް ބަޑިޖެހިކަން ލަންކާގެ ފުލުހުން ވަނީ ކަށަވަރުކޮށްދީފައެވެ.

ފުލުހުންގެ ތަރުޖަމާނު އެސްއެސްޕީ ނިހާލް ތަލްދުވާ ވިދާޅުވީ, މުޒާހަރާގެ ބައިވެރިން އެތަނުން ނުކުތުމަށް ފުލުހުން އިންޒާރުދިންނަމަވެސް ތަބާނުވާކަމަށާއި, އޭގެފަހުން މުޒާހަރާގެ ބައިވެރިން މަސައްކަތްކުރީ ތެޔޮ ބައުޒަރުގައި ރޯކޮށްލުމަށް ކަމަށެވެ. މީގެއިތުރުން ކުރޮޅީގައި ރޯކޮށްލުމަށާއި, ތަންތަނަށް ގެއްލުން ދިނުމަށްވެސް މަސައްކަތް ކޮށްފައިވާކަމަށް އޭނާ ވިދާޅުވިއެވެ.

ފުލުހުންގެ ތަރުޖަމާނު ވިދާޅުވީ, އެއްވުން ރޫޅާލުމަށްޓަކައި ފުލުހުން ކަރުނަ ގޭސް ޖަހާފައިވާ ކަމަށާއި, އޭގެފަހުން މުޒާހަރާގެ ބައިވެރިން ހިލަ އުކަންފެށިކަމަށެވެ. އަދި ހަމަޖެހުން ގާއިމުކުރުމަށް ފުލުހުން ބަޑިޖަހާފައިވާ ކަމަށާއި، އެކަމުގެ ސަބަބުން އާންމުންގެ ބަޔަކު ޒަޚަމްވިކަމަށެވެ.